قازاقستاندىق كاسىپقوي بوكسشى، الەم چەمپيونى بەيبىت شۇمەنوۆكە ىزدەۋ جاريالاندى. بۇل تۋرالى قۇقىقتىق ستاتيستيكا جانە ارنايى ەسەپكە الۋ ورگاندارىنىڭ پورتالىندا جاريالاندى، - دەپ حابارلايدى Almaty-akshamy.kz.
«شۇمەنوۆ بەيبىت. 2-كۇن ىزدەستىرىلىپ جاتىر. تۋعان كۇنى: 19.08.1983، جىنىسى: ەركەك، قازاقستان رەسپۋبليكاسىنىڭ ازاماتى، قازاق. ىزدەستىرۋ ءىسى 22.07.2023 «استانا وڭىردە تىركەلدى». باستاماشى: ق ر ءىىم. ىزدەستىرۋدى جۇرگىزەتىن ورگان: استانا قالاسىنىڭ ەسىل اۋداندىق پب»، - دەلىنگەن حابارلامادا.
ەسكە سالايىق، بۇعان دەيىن استاناداعى ءىرى ساۋدا جانە ويىن-ساۋىق ورتالىعىنىڭ فۋدكورتىندا توبەلەس بولىپ، قولىندا كىشكەنتاي بالاسى بار ادامعا ەكىنشى ەر ادام شابۋىل جاساعانى حابارلانعان ەدى.
كەيىنىرەك پوليسيا وسى جاعدايعا قاتىستى پىكىر ءبىلدىردى. ال ىشكى ىستەر ءمينيسترىنىڭ ورىنباسارى قايرات سۇنتايەۆ استاناداعى كافەدە ەر اداممەن توبەلەسكەن ادام بوكسشى بەيبىت شۇمەنوۆ ەكەنىن راستادى.
كەيىنىرەك بەيبىت شۇمەنوۆ وقيعاعا قاتىستى پىكىر ءبىلدىرىپ، قالاي بولعانىن ايتىپ بەردى.
ايتا كەتەيىك، بەيبىت شۇمەنوۆ – تانىمال قازاقستاندىق كاسىپقوي بوكسشى. مانسابىن 2007 جىلى باستاعان. 19 جەكپە-جەك وتكىزىپ، 17-دە جەڭىسكە جەتكەن. 2 كەزدەسۋىندە قارسىلاسىنا ەسە جىبەرگەن. 2017 جىلى جاراقاتىنا بايلانىستى مانسابىن اياقتاعان.