اتالمىش شارا رەسەيدىڭ «دونگۋز» پوليگونىندا ءوتتى.
24 قىركۇيەكتە شانحاي ىنتىماقتاستىق ۇيىمىنا مۇشە مەملەكەتتەر اسكەري كونتينگەنتتەرى اراسىندا وتكەن «بەيبىت ميسسيا-2021» بىرلەسكەن اسكەري تەرروريزمگە قارسى كوماندالىق-شتابتىق وقۋ-جاتتىعۋى اياقتالدى، دەپ حابارلايدى Almaty-akhamy.kz.
«قازاقستاننىڭ اسكەري كونتينگەنتى «باتىس» وڭىرلىك قولباسشىلىعىنىڭ بارلاۋ-شابۋىلداۋ روتاسى، تانك بولىمشەلەرىمەن جانە ۇشقىشسىز باسقارىلاتىن قۇرىلعىلار ەسەپتوپتارىمەن بىرگە زاڭسىز قارۋلانعان قۇرالىمداردىڭ شابۋىلىن تەجەۋدى، قارسى شابۋىلعا شىعۋدى جانە شارتتى قارسىلاستى جويۋدى پىسىقتادى»، – دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.
ۇرىس ارەكەتتەرى ءۇش كەزەڭدە، بەس وپەراتيۆتى ءىس-قيمىل كورىنىسى رەتىندە ءوتتى. ءبىرىنشى كەزەڭدە – جاعدايدى تۇراقتاندىرۋ جۇرگىزىلدى، سوسىن اۋداندى اقپاراتتىق بۇعاتتاۋ ءىس-قيمىلى ورىندالدى. بۇدان باسقا، شارتتى قارسىلاستىڭ ءىرى قۇرالىمدارىنىڭ جاۋىنگەرلىك قابىلەتىن تومەندەتۋ، سونداي-اق ولاردىڭ ماتەريالدىق قۇرالدارى مەن وق-دارىلەر قورىن جويۋ شارالار كەشەنى ىسكە اسىرىلدى.
ەكىنشى جانە ءۇشىنشى كەزەڭدەردە اسكەري كونتينگەنتتەر تەررورلىق قۇرالىمدى توقتاتۋ ءۇشىن شابۋىل جاساۋ، قالعان قاراقشى توپتاردى جويۋ جانە قاقتىعىستان كەيىنگى رەتتەۋ ءىس-قيمىلدارىن جۇرگىزدى.
شانحاي ىنتىماقتاستىق ۇيىمىنا مۇشە ەلدەر اراسىندا وتكەن «بەيبىت ميسسيا-2021» بىرلەسكەن اسكەري تەرروريزمگە قارسى كوماندالىق-شتابتىق وقۋ-جاتتىعۋىنىڭ تاجىريبەلىك ءىس-قيمىلىنا ءۇندىستان، قازاقستان، جۇڭگو، قىرعىزستان، پاكىستان، رەسەي، تاجىكستان جانە وزبەكستان قارۋلى كۇشتەرىنىڭ اسكەري باسقارۋ ورگاندارى، قۇرلىق اسكەرلەرىنىڭ بولىمشەلەرى جانە اۆياسياسى جۇمىلدىرىلدى. بەلارۋس رەسپۋبليكاسىنىڭ اسكەري كونتينگەنتى وقۋ-جاتتىعۋعا العاش رەت قاتىستى.
