جەكەلەگەن كوتەرمە-بولشەك ساۋدا بازارلارىندا باعانى نەگىزسىز كوتەرۋ بايقالۋدا
پرەمەر-مينيستر ق ر پرەزيدەنتى قاسىم-جومارت توقايەۆتىڭ تاپسىرمالارىن ىسكە اسىرۋ بويىنشا كەڭەس وتكىزدى. وڭىرلەر بويىنشا تۇراقتاندىرۋ قورلارىنداعى قورلار تۇرعىسىنان الەۋمەتتىك ماڭىزى بار ازىق-تۇلىك تاۋارلارىنىڭ باعاسى جانە مونوپولياعا قارسى دەن قويۋ شارالارى قارالدى، دەپ حابارلايدى Almaty-akshamy.kz ق ر پرەمەر-مينيسترىنىڭ باسپا ءسوز قىزمەتىنە سىلتەمە جاساپ.
وڭىرلەر بويىنشا ءبىر اپتا ىشىندە باعانىڭ ەڭ جوعارى ءوسۋى الماتىدا 0،6%-عا، شىعىس قازاقستان، قوستاناي جانە قىزىلوردا وبلىستارىندا 0،4%-عا تىركەلدى.
سوڭعى اپتادا تۇراقتاندىرۋ قورلارىندا 100،7 مىڭ توننا كولەمىندە كارتوپ قورى جاسالدى. سونداي-اق، 31،7 مىڭ توننا ءسابىز، 24،5 مىڭ تونناعا جۋىق قىرىققابات، 23،5 مىڭ توننا پياز، 11،6 مىڭ توننا قاراقۇمىق جارماسى جانە 22 مىڭ توننا كۇنباعىس مايى بار.
بۇگىندە وڭىرلەر كوكونىس ونىمدەرىنىڭ باعاسىن ۇستاپ تۇرۋ ءۇشىن وسى ازىق-تۇلىك قورلارىن ساتا باستادى.
"جەكەلەگەن كوتەرمە-بولشەك ساۋدا بازارلارىندا باعانى نەگىزسىز كوتەرۋ بايقالۋدا. بۇعان جول بەرمەۋ كەرەك. سەبەبى، بۇل ينفلياسيا ۇردىستەرىنە ىقپال ەتەدى. بۇل سالادا مۇمكىن، قاداعالاۋ ورگانىمەن بىرگە ءتارتىپ ورناتۋ قاجەت. جەدەل شارالاردان باسقا، وندىرۋشىلەردىڭ كوتەرمە-بولشەك بازارلارىنا قولجەتىمدىلىگىن قامتاماسىز ەتۋ بويىنشا ناقتى زاڭنامالىق نورمالاردى بەلگىلەۋدىڭ جۇيەلى شارالارىن ازىرلەۋ قاجەت"، – دەدى ءا. سمايىلوۆ.
كەڭەس بارىسىندا ينفلياسيانى باقىلاۋدىڭ كەشەندى شارالارىن قابىلداۋ ماسەلەسى قارالدى.
2022-2024 جىلدارعا ارنالعان ينفلياسيانى باقىلاۋ جانە تومەندەتۋ شارالارى كەشەنىنىڭ جوباسى ازىرلەندى، ول جەدەل جانە ورتا مەرزىمدىك سيپاتتاعى 66 ءىس-شارانى قامتيتىن 5 باعىتتان تۇرادى. ولار ءونىم ءوندىرۋ كولەمىن ۇلعايتۋدى، تاۋارلاردى ساقتاۋدى، لوگيستيكاسىن، تاسىمالداۋدى، تاۋارلاردىڭ بولشەك ساۋداسىن، باعا بەلگىلەۋدى باقىلاۋدى، مونوپولياعا قارسى جانە سىرتقى ساۋدانى رەتتەۋدى كوزدەيدى.
باسەكەلەستىكتى قورعاۋ جانە دامىتۋ اگەنتتىگى باسەكەلەستىكتى قورعاۋ سالاسىنداعى زاڭنامانى بۇزۋعا جول بەرمەۋ، سونداي-اق اتىراۋ، قاراعاندى جانە قوستاناي وبلىستارىندا ساتۋ كەزىندە الەۋمەتتىك ماڭىزى بار ازىق-تۇلىك تاۋارلارىنا ساۋدا ۇستەمەسىن 15%-دان 10%-عا دەيىن تومەندەتۋ بويىنشا 5 اكتى جاسادى.
سونىمەن قاتار كەڭەسكە قاتىسۋشىلار «اۋىل – ەل بەسىگى» باعدارلاماسى اياسىندا ەلىمىزدىڭ باتىس جانە وڭتۇستىك وڭىرلەرىندە قوسىمشا جوبالاردى ىسكە اسىرۋ ماسەلەسىن قاراستىردى. مەملەكەت باسشىسىنىڭ تاپسىرماسىنا سايكەس باعدارلاما شەڭبەرىندە ءبىلىم بەرۋ، مادەنيەت جانە سپورت، دەنساۋلىق ساقتاۋ سالاسىنداعى 130 جوبادان تۇراتىن ءتىزىم جاسالدى.
جالپى، 2022 جىلدىڭ قورىتىندىسى بويىنشا باتىس وڭىرلەردە 8 مەديسينا نىسانى، 15 ءبىلىم بەرۋ نىسانى، 14 سپورت، 15 مادەنيەت نىسانى، وڭتۇستىك وڭىرلەردە 26 مەديسينا نىسانى، 23 ءبىلىم بەرۋ، 14 سپورت، 15 مادەنيەت نىسانى سالىنىپ، جاڭعىرتىلادى.
اتالعان ءىس-شارالاردى ىسكە اسىرۋ رەسپۋبليكانىڭ باتىس جانە وڭتۇستىك وڭىرلەرىندەگى 112 اۋىلدىق ەلدى مەكەندە تۇراتىن 500 مىڭنان استام اۋىل تۇرعىندارىنا مەديسينالىق، ءبىلىم بەرۋ، سپورت جانە باسقا دا قىزمەتتەردى ۇسىنۋ ساپاسىن قامتاماسىز ەتۋگە مۇمكىندىك بەرەدى.