ق ر ۇلتتىق بانكىنىڭ اقشا-كرەديت ساياساتى جونىندەگى كوميتەتى بازالىق مولشەرلەمەنى +/-1،00 پ.ت. پايىزدىق دالىزىمەن جىلدىق 9،75% دەڭگەيىندە بەلگىلەۋ تۋرالى شەشىم قابىلدادى
تيىسىنشە وتىمدىلىكتى ۇسىنۋ جونىندەگى تۇراقتى قولجەتىمدى وپەراسيالار بويىنشا مولشەرلەمە 10،75%، ال وتىمدىلىكتى الۋ جونىندەگى تۇراقتى قولجەتىمدى وپەراسيالار بويىنشا مولشەرلەمە 8،75% بولادى، دەپ حابارلايدى Almaty-akshamy.kz Nationalbank.kz سايتىنا سىلتەمە جاساپ
جالپى، ينفلياسيا باياۋلاۋىنىڭ بايقالعان بەلگىلەرىن، سونداي-اق كوروناۆيرۋستىڭ جاڭا شتامى – "وميكرونعا" قاتىستى بەلگىسىزدىكتىڭ ارتۋىن جانە ونىڭ ينفلياسيالىق پروسەستەرگە، سىرتقى جانە ىشكى سۇرانىسقا اسەرىن ەسكەرە وتىرىپ شەشىم قابىلداندى.
سۇرانىستىڭ ۇسىنىس مۇمكىندىكتەرىنەن اسىپ ءوسۋى ناتيجەسىندە باعانىڭ ءوسۋىن تەجەۋ بويىنشا قابىلدانىپ جاتقان شارالارعا قاراماستان، كوپتەگەن ەلدەردە ينفلياسيانى جەدەلدەتۋ ءۇردىسى ساقتالىپ وتىر. قىتايدان باسقا، نەگىزگى ساۋدا ارىپتەستەرىنە جاتاتىن ەلدەردە ينفلياسيا تاريحي ەڭ جوعارى مولشەردە قالىپتاسادى. قازاقستاندا باعانىڭ ءوسۋى دە جوعارى دەڭگەيدە بولىپ تۇر. ازىق-تۇلىك ينفلياسياسى مەن اقىلى قىزمەتتەر ينفلياسياسىنىڭ ءبىرشاما باياۋلاۋى ازىق-تۇلىككە جاتپايتىن تاۋارلار باعاسىنىڭ وسۋىمەن وتەلدى. حالىقتىڭ جوعارى ينفلياسيالىق كۇتۋلەرى قولدا بار ينفلياسيالىق ايانى كۇشەيتەدى. شيكىزات نارىقتارىنداعى سالىستىرمالى تۇردە جوعارى باعالار مەن كارانتين شەكتەۋلەرىن جەڭىلدەتۋ اياسىندا ىشكى ەكونوميكا بەلسەندى تۇردە قالپىنا كەلۋدە.
الەمدىك ەكونوميكاداعى پروينفلياسيالىق پروسەستەر ءوسىپ كەلەدى. بۇل كارانتين شارالارىنىڭ السىرەۋىمەن، جيناقتالعان جيناقتاردىڭ كوپتىگىمەن، سونداي-اق كەيىنگە قالدىرىلعان سۇرانىستىڭ ىسكە اسىرىلۋىمەن ىنتالاندىرىلاتىن جاھاندىق تۇتىنۋشىلىق سۇرانىستىڭ تەز قالپىنا كەلۋىنە بايلانىستى بولىپ وتىر. ۇسىنىستىڭ ءوسۋى ءالى دە جەتكىزۋگە بايلانىستى ماسەلەلەردىڭ بولۋىنا جانە ماتەريالدار تاپشىلىعىنا بايلانىستى تەز ءوسىپ وتىراتىن سۇرانىسقا جول بەرۋدە.
سىرتقى فاكتورلاردىڭ ىشىندە تەڭىز پورتتارىنداعى جاعدايدىڭ جاقسارعانىنا قاراماستان، ءالى دە كوۆيدكە دەيىنگى دەڭگەيدەن الشاق بولىپ وتىرعان ەنەرگيا باعاسىنىڭ ءوسۋىن جانە جاھاندىق جەتكىزۋ قاتارىنىڭ بۇزىلۋىن اتاپ وتكەن ءجون. 2021 جىلعى قاراشادا Baltic Dry Index قازانداعى ەڭ جوعارى دەڭگەيدەن تومەندەدى. الايدا، بۇل 2020 جىلعى مامىرداعى دەڭگەيدەن 6 ەسە جوعارى. جاھاندىق ينفلياسيانىڭ جىلدامداۋىنا قىمباتتاپ وتىرعان ازىق-تۇلىك باعاسى دا قوسىمشا ۇلەس قوسادى، بۇل ۇسىنىستىڭ تومەندەۋىنە، ەكسپورتتاۋشى ەلدەردەگى اۋا رايىنىڭ ناشارلاۋىنا، سونداي-اق فراحت باعاسىنىڭ وسۋىنە بايلانىستى. فاو ازىق-تۇلىك باعالارىنىڭ يندەكسى قاراشادا ءبىر ايلىق ماندە 1،2%-عا ءوسىپ، 2011 جىلعى ماۋسىمنان باستاپ ەڭ جوعارى دەڭگەيگە جەتتى.
وسى فاكتورلاردىڭ بارلىعى الەمدەگى، ونىڭ ىشىندە قازاقستاننىڭ ساۋدا ارىپتەستەرىندەگى ينفلياسيانىڭ ودان ءارى جىلدامداۋىنا الىپ كەلەدى. ەو مەن رەسەيدەگى ينفلياسيا 2021 جىلعى قازاندا تيىسىنشە 4،4% جانە 8،1% قۇراپ، تاريحي ەڭ جوعارى دەڭگەيدە بولىپ وتىر.
سىرتقى سەكتور تاراپىنان ينفلياسياعا قارسى قىسىم ىشكى باعالاردىڭ وسۋىندە كورىنىس تابادى. 2021 جىلعى قاراشانىڭ قورىتىندىسى بويىنشا قازاقستانداعى جىلدىق ينفلياسيا ازداپ باياۋلاپ، بيىلعى جىلعى قازانداعى 8،9%-بەن سالىستىرعاندا 8،7% بولدى. بۇل سەرپىن ازىق-تۇلىك تاۋارلارى باعاسىنىڭ 11،3%-دان 10،9%-عا دەيىن جانە اقىلى قىزمەتتەر باعاسىنىڭ 6،9%-دان 6،4%-عا دەيىن ءوسۋىنىڭ باياۋلاۋىنا بايلانىستى بولدى. ازىق-تۇلىك قۇرامداس بولىگى ءوسۋىنىڭ قازىرگى باياۋلاۋىنا ءبىر ايداعى سەرپىننىڭ تۇراقتانۋى جانە وتكەن جىلدىڭ جوعارى بازاسى جاعدايىندا مايلار مەن توڭ مايلار، قانت جانە جۇمىرتقا دەزينفلياسياسى ايتارلىقتاي ۇلەس قوستى. بۇل رەتتە 2021 جىلعى قاراشادا نان-توقاش ونىمدەرى مەن جارما، ەت ونىمدەرى باعاسىنىڭ ءوسۋى جالعاستى، بۇل وندىرۋشىلەر شىعىندارىنىڭ ۇلعايۋىنا، ءداندى داقىلداردى جالپى جيناۋدىڭ تومەندەۋىنە بايلانىستى.
2021 جىلعى قاراشادا جانار-جاعار ماي، قاتتى وتىن باعاسى ءوسۋىنىڭ جالعاسۋى ناتيجەسىندە جىلدىق ازىق-تۇلىككە جاتپايتىن ينفلياسيا 7،8%-دان 8،3%-عا دەيىن جەدەلدەدى. جانار-جاعار مايدىڭ تۇتىنۋ باعاسىنىڭ جىلدىق ءوسۋى 22،3% (ايلىق ءوسۋ – 4،3%) بولدى: بەنزين قۇنى 18،4%-عا (2،4%)، ديزەل وتىنى – 46،6%-عا (14،6%) ءوستى. وتىننىڭ قىمباتتاۋى وندىرۋشىلەر باعاسىنىڭ ءوسۋى جاعدايىندا ورىن الىپ وتىر.
اقىلى قىزمەتتەر باعاسىنىڭ جىلدىق ءوسۋ قارقىنى 2021 جىلعى قاراشادا 6،4% عا دەيىن باياۋلادى. بۇل كوممۋنالدىق رەتتەلەتىن قىزمەتتەر، قوعامدىق تاماقتانۋ قىزمەتتەرى، شاشتارازدار مەن جەكە قىزمەت كورسەتۋ ورىندارى باعاسى ءوسۋىنىڭ باياۋلاۋىنا بايلانىستى. سونىمەن قاتار تۇرعىن ءۇيدى جالعا الۋ تاريفتەرىنىڭ ءوسۋى جەدەلدەدى.
ۇلتتىق بانكتىڭ باعالاۋى بويىنشا، سوڭعى ايلاردا ماۋسىمدىق تازارتىلعان اننۋاليزاسيالانعان تۇتىنۋ باعالارىنىڭ ءوسىمى 2021 جىلعى قاراشادا 5،6% بولىپ (قازاندا – 7،1%)، ماۋسىمداعى ەڭ جوعارى دەڭگەيدەن باياۋلاۋدى كورسەتۋدە. اننۋاليزاسيالانعان بازالىق ينفلياسيانى ايلىق باعالاۋ ينفلياسيالىق پروسەستەردىڭ 4-6%-دىق نىسانالى ءدالىز شەگىندە قاتارىنان ەكىنشى اي قالىپتاسۋىن بىلدىرەدى. ورنىقتى قۇرامداس بولىكتەر سەرپىنى 2021 جىلعى جەلتوقساندا جانە 2022 جىلى نىسانالى ءدالىز شەگىندە قالاي تۇراقتاناتىنى ماڭىزدى. وسى ورايدا تۇراقسىز جانە جوعارى ينفلياسيالىق كۇتۋلەر كەزىندە وسى سەرپىننىڭ تۇراقتىلىعىنا قاتىستى جوعارى بەلگىسىزدىك بار.
حالىقتىڭ ينفلياسيالىق كۇتۋلەرى باعالارعا قوسىمشا قىسىم كورسەتە وتىرىپ، ارتتى. ينفلياسيانى ءبىر جىل بۇرىن ساندىق باعالاۋ 2021 جىلعى قاراشادا 10،8%-عا جەتتى. رەسپوندەنتتەردىڭ 35%-ى كەلەسى 12 ايدا باعانىڭ ءوسۋى جەدەلدەۋىن كۇتۋدە، بۇل باقىلاۋ كەزىندەگى ەڭ جوعارى ءمان بولدى. سوڭعى ايلاردا ينفلياسيانى باقىلاۋ دا جوعارى دەڭگەيدە ساقتالۋدا.
ەكونوميكالىق بەلسەندىلىك سەرپىنى جەدەل قارقىنمەن قالپىنا كەلە وتىرىپ، الدىڭعى بولجامدى راۋندتىڭ وپتيميستىك سەنارييىنە سايكەس قالىپتاسۋدا. بۇل شيكىزات نارىقتارىنداعى جوعارى الەمدىك باعالار مەن كارانتين شەكتەۋلەرىن جەڭىلدەتۋ اياسىندا ورىن الۋدا. قازاقستاندا وسى كەزەڭدە مۇناي باعاسى ءبىر باررەل ءۇشىن 69،3 اقش دوللارى بولعان كەزدە 2021 جىلعى قاڭتار-قازاندا ءىجو-نىڭ ءوسىمى 3،5% بولدى. تاۋ-كەن جانە وڭدەۋ ونەركاسىبى، ساۋدا، قۇرىلىس، اقپارات جانە بايلانىس، كولىك جانە مەملەكەتتىك سەكتور وڭ ۇلەس قوستى. 2021 جىلعى 10 ايدىڭ قورىتىندىسى بويىنشا ءوندىرىستىڭ قىسقارعانىن كورسەتكەن اۋىل شارۋاشىلىعى ەكونوميكانىڭ وسۋىنە تەجەۋشى اسەر ەتۋدە. ءداندى داقىلداردىڭ جالپى ءتۇسىمىنىڭ تومەندەۋى بۇل سەرپىننىڭ نەگىزگى سەبەبى بولدى.
ءۇي شارۋاشىلىقتارىنىڭ ناقتى سۇرانىسىن قالپىنا كەلتىرۋ پروسەسى ەكونوميكالىق بەلسەندىلىككە قولداۋ كورسەتەدى. 2021 جىلعى ەكىنشى توقساندا ازىق-تۇلىككە جاتپايتىن تاۋارلار مەن قىزمەتتەرگە كەيىنگە قالدىرىلعان سۇرانىستى ىسكە اسىرۋ جاعدايىندا ءۇي شارۋاشىلىقتارىن تۇتىنۋ 8،1%-عا ءوستى. سۇرانىس قاتاڭ كارانتيندىك شارالارمەن شەكتەلىپ، قۇلدىراۋ شامامەن 16% بولعان 2020 جىلعى ەكىنشى توقسانداعى ستاتيستيكالىق بازانىڭ اسەرى حالىق سۇرانىسىنىڭ وسىنداي ءوسۋىنىڭ قوسىمشا فاكتورى بولىپ تابىلادى. بولشەك تاۋار اينالىمىنىڭ اعىمداعى كەڭەيۋى (2021 جىلعى 10 ايدا 6،1%) جانە حالىقتىڭ ناقتى كىرىستەرىنىڭ ارتۋى (2021 جىلعى ءۇشىنشى توقساندا 5،8%) سۇرانىستىڭ جالعاسىپ وتىرعان وڭ سەرپىنىنىڭ ينديكاتورى بولىپ وتىر. بۇل رەتتە 2021 جىلعى شىلدەنىڭ اياعىندا جانە قىركۇيەكتىڭ باسىندا بايقالعان COVID-19 تارالۋىنىڭ ارا-تۇرا ءورشۋى سۇرانىستىڭ تولىققاندى قالپىنا كەلۋىن شەكتەۋدى جالعاستىرۋدا.
الەمدىك مۇناي نارىعىندا باعانىڭ ۇزاق ۋاقىت وسۋىنەن كەيىن بەلگىلى ءبىر تۇزەتۋ بايقالادى. كوروناۆيرۋستىڭ جاڭا شتاممىنىڭ تارالۋىنا بايلانىستى قاراشانىڭ اياعى مەن جەلتوقساننىڭ باسىندا باعالار ءبىر باررەل ءۇشىن 65-66 اقش دوللارىنا دەيىن تومەندەدى. نارىقتاعى قۇبىلمالىلىقتىڭ وسۋىنە اسەر ەتەتىن قانداي دا ءبىر وقيعالاردىڭ پايدا بولۋىنا قاراماستان، تاۋەكەلدەر بالانسى ناشارلاۋ جاعىنا اۋىسقان جوق. وپەك+ بيىلعى جىلعى 2 جەلتوقساندا وتكەن وتىرىسىندا ءوندىرۋدى تاۋلىگىنە 400 مىڭ باررەلگە جوسپارلى تۇردە ۇلعايتۋدى كوزدەيتىن مامىلەنىڭ اعىمداعى ولشەمدەرىن ساقتاۋ تۋرالى شەشىم قابىلدادى.
EIA باعالاۋى بويىنشا، مۇنايعا الەمدىك سۇرانىس 2022 جىلدىڭ ورتاسىنا دەيىن كۇشتى بولىپ قالادى. مۇناي ۇسىنىسى بارىنشا قالىپتى قارقىنمەن وسەتىن بولادى. نارىقتا مۇناي تاپشىلىعى باسىم بولماق. 2022 جىلدىڭ ەكىنشى جارتىسىنان باستاپ وپەك+ تاراپىنان قىسقارتۋلار كولەمىنىڭ تومەندەۋىنە جانە وپەك-تەن تىس ەلدەردىڭ مۇناي ءوندىرۋىنىڭ ارتۋىنا بايلانىستى مۇناي ۇسىنىسىنىڭ ءوسۋى سۇرانىستىڭ وسۋىنەن اسا باستايدى. دەگەنمەن، حالىقارالىق ۇيىمداردىڭ باعالاۋى بويىنشا، جالپى العاندا، مۇناي نارىعى وڭ سەرپىنمەن سيپاتتالادى. بۇل نەگىزىنەن الەمدىك ەكونوميكانىڭ كوۆيدتان كەيىنگى قايتا قالپىنا كەلۋىنە قاراي ءوسۋ قارقىنىنىڭ قالىپقا كەلۋىنە بايلانىستى بولادى. ساۋد ارابياسى ازيا مەن اقش-قا 2022 جىلعى قاڭتارداعى مۇناي جەتكىزۋدىڭ ساتۋ باعاسىن كوتەردى، بۇل كوروناۆيرۋستىڭ جاڭا شتامىنىڭ تارالۋىنا قاراماستان، الەمدەگى ەڭ ءىرى مۇناي ءوندىرۋشىسىنىڭ مۇناي نارىعىنداعى سۇرانىستىڭ جوعارى بولۋىنا سەنىمدىگىن بىلدىرەدى.
اعىمداعى جاعدايدى جانە حالىقارالىق ۇيىمداردىڭ بولجامدارىن ەسكەرە وتىرىپ، ەكونوميكانى دامىتۋدىڭ بازالىق سەنارييى ءبىر باررەل ءۇشىن 60 اقش دوللارىنان 70 اقش دوللارىنا دەيىن، وپتيميستىك سەناريي – ءبىر باررەل ءۇشىن 80 اقش دوللارىنا دەيىن، پەسسيميستىك سەناريي – ءبىر باررەل ءۇشىن 60 اقش دوللارىنا دەيىن كوتەرىلدى.
جاڭارتىلعان بازالىق سەنارييگە سايكەس، قازاقستاننىڭ ءىجو-نىڭ كۇتىلەتىن ءوسۋى 2021 جىلدىڭ سوڭىنا قاراي 3،7-4،0% دەڭگەيىندە ساقتالادى. نەگىزگى سالىم ىشكى سۇرانىس پەن ەكسپورت تاراپىنان كۇتىلەدى. ءۇي شارۋاشىلىقتارىن تۇتىنۋ حالىقتىڭ ءوسىپ كەلە جاتقان كىرىسى جانە تۇتىنۋشىلىق كرەديتتەردى بەرۋدىڭ ءوسۋ قارقىنى جاعدايىندا ودان ءارى قالپىنا كەلتىرۋدى جالعاستىرادى. جالپى جيناقتاۋدىڭ ءوسۋى ەكونوميكانىڭ نەگىزگى سەكتورلارىنداعى كاسىپورىندار ينۆەستيسيالارىنىڭ وسۋىمەن بايلانىستى بولادى. تۇرعىن ءۇي قۇرىلىسىنا ينۆەستيسيالار قوسىمشا قولداۋ كورسەتەدى. بۇل رەتتە ىشكى سۇرانىستىڭ ءوسۋى اياسىندا يمپورت ءىجو-نىڭ بارىنشا جىلدام ءوسۋىن تەجەيتىن بولادى. وپەك+ مۇنايدى تاۋلىك بويى ءوندىرۋ جونىندەگى شەكتەۋلەرىنىڭ بىرتىندەپ السىرەۋى، سونداي-اق ساۋدا ارىپتەستەرى بولىپ سانالاتىن ەلدەردەگى ەكونوميكالىق بەلسەندىلىكتىڭ ءوسۋى جاعدايلارىندا ەكسپورتتى قالپىنا كەلتىرۋ سەرپىنى بايقالاتىن بولادى. مەملەكەتتىڭ ەڭبەكاقى تولەۋگە جانە تاۋارلار مەن كورسەتىلەتىن قىزمەتتەردى ساتىپ الۋعا ارنالعان شىعىستارىنىڭ باياۋلاۋىنا بايلانىستى مەملەكەتتىك باسقارۋ ورگاندارىنىڭ تۇتىنۋى تاراپىنان تەرىس سالىم بايقالاتىن بولادى.
2022 جىلى ءىجو-نىڭ ءوسۋ قارقىنى شامالى تومەندەۋ جاعىنا قايتا قارالدى جانە 3،9-4،2% دەڭگەيىندە كۇتىلۋدە. قايتا قاراۋ قازاقستاننىڭ ساۋدا ارىپتەس ەلدەرىندە ەكونوميكالىق بەلسەندىلىكتىڭ قالىپتى وسۋىنە جانە جاھاندىق جانە جەرگىلىكتى جەتكىزۋ تىزبەكتەرىندەگى ىركىلىستەردىڭ قازاقستان ەكونوميكاسىنا بارىنشا تەرىس اسەرىنە بايلانىستى. ەكونوميكالىق وسۋگە ەپيدەميولوگيالىق احۋالدى بىرتىندەپ جاقسارتۋ جانە 2021 جىلمەن سالىستىرعاندا ەنەرگيا رەسۋرستارىن ءوندىرۋ كولەمىن ۇلعايتۋ ىقپال ەتەتىن بولادى.
الدىڭعى بولجامدى راۋندپەن سالىستىرعاندا شىعارىلىم الشاقتىعىنىڭ باعىتى تومەندەۋ جاعىنا قاراي قايتا قارالدى. بۇل جيىنتىق سۇرانىس كومپونەنتتەرىنىڭ ءوسۋى بويىنشا نەعۇرلىم تومەن باعالارعا جانە جالپى ەكونوميكالىق بەلسەندىلىككە بايلانىستى. ورتا مەرزىمدى كەزەڭدە شىعارىلىمنىڭ الشاقتىعى نولگە جاقىن بەلگىلەردە بولادى.
باعا ءوسىمىنىڭ اعىمداعى سەرپىنىن ەسكەرە وتىرىپ، ۇلتتىق بانك ينفلياسيانىڭ 2021 جىلدىڭ قورىتىندىلارى بويىنشا 8،5-8،7% شەگىندە قالىپتاساتىنىن كۇتۋدە. ۇكىمەت پەن جەرگىلىكتى اتقارۋشى ورگاندار ينفلياسياعا قارسى دەن قويۋ شارالارى كەشەنىن ودان ءارى ءتيىمدى ىسكە اسىرعان كەزدە ينفلياسيا بولجامدى دياپازوننىڭ تومەنگى شەگىنە جاقىن قالىپتاسادى.
قىسقا مەرزىمدى كەزەڭ اياسىندا ازىق-تۇلىككە جاتپايتىن تاۋارلار مەن قىزمەتتەر ينفلياسياسىنىڭ بولجالدى جەدەلدەۋى ازىق-تۇلىك ونىمدەرى باعاسىنىڭ ءوسۋ قارقىنىنىڭ ودان ءارى باياۋلاۋىمەن رەتتەلدى. اقىلى قىزمەتتەر قۇنىنىڭ قالىپتى ءوسۋى بولجانادى، ول تۇرعىن ۇي-كوممۋنالدىق رەتتەلەتىن قىزمەتتەر نارىعىندا اعىمداعى باعا بەلگىلەۋدىڭ ساقتالۋىنا نەگىزدەلەتىن بولادى. سىرتقى ينفلياسيالىق ورتانىڭ ساقتالۋى، ازىق-تۇلىككە جاتپايتىن نارىقتارداعى ينفلياسيالىق پروسەستەردىڭ قارقىن الۋى، تۇتىنۋ بەلسەندىلىگىنىڭ قالپىنا كەلۋى، جوعارى ينفلياسيالىق كۇتۋلەر جانە تاۋارلار مەن قىزمەتتەردىڭ وزىندىك قۇنىنىڭ ءوسۋى ارقىلى ججم باعاسى ءوسۋىنىڭ جاناما اسەرى باعالارعا قاتتى قىسىم كورسەتەدى. كومىر باعاسىنىڭ دا كۇتىلەتىن ءوسۋى اياسىندا ەلەكتر ەنەرگياسى تاريفتەرىنىڭ بۇدان بىلايعى ءوسۋ تاۋەكەلى بار. 2022 جىلعى ءبىرىنشى توقساندا ينفلياسيانىڭ ەڭ جوعارى شەگى كۇتىلەدى، سودان كەيىن ونىڭ بىرتىندەپ باسەڭدەيتىنى بايقالادى.
ورتا مەرزىمدى كەزەڭ اياسىندا الدىڭعى باعالاۋلارمەن سالىستىرعاندا بارىنشا جوعارى سىرتقى ينفلياسيالىق ايا كۇتىلەدى. بۇل قازاقستاننىڭ ساۋدا ارىپتەستەرىنە جاتاتىن ەلدەردە ينفلياسيانى كوتەرۋ جاعىنا قاراي قايتا قاراۋعا جانە سىرتقى ازىق-تۇلىك باعالارىنىڭ نەعۇرلىم جوعارى سەرپىنىنە بايلانىستى ورىن الىپ وتىر. شىعارىلىم الشاقتىعىنىڭ بارىنشا قالىپتى باعىتى ينفلياسيانىڭ ورتا مەرزىمدى سەرپىنىنە سىرتقى فاكتورلاردىڭ اسەرىن وتەيدى.
2022 جىلى ينفلياسياعا قارسى دەن قويۋ شارالارىنىڭ كەشەنىن ىسكە اسىرۋ جالعاستىرىلاتىنىن ەسكەرە وتىرىپ، ينفلياسيانىڭ 6،0-6،5%-عا دەيىن بىرتىندەپ باياۋلاۋى كۇتىلۋدە. ينفلياسيانىڭ تومەندەۋىن 2021 جىلى قالىپتاسقان جوعارى بازا ۇستاپ تۇرادى. سونىمەن بىرگە، تاۋارلار مەن قىزمەتتەردىڭ جەكەلەگەن نارىقتارىنداعى تەڭگەرىمسىزدىككە، جاھاندىق جانە جەرگىلىكتى جەتكىزىلىم تىزبەگىنىڭ توپتاپ قالۋىنا جانە جوعارى ينفلياسيالىق كۇتۋلەردىڭ ساقتالۋىنا بايلانىستى پروينفلياسيالىق تاۋەكەلدەردى ىسكە اسىرۋ 2022 جىلعى ينفلياسيانىڭ بولجامدى مانىنەن جوعارى قالىپتاسۋىنا الىپ كەلۋى مۇمكىن.
ۇلتتىق بانك كەلەسى شەشىمىن ينفلياسيالىق كۇتۋلەردىڭ سەرپىنىن، ينفلياسيانىڭ ورنىقتى قۇرامداس بولىكتەرىن، سونداي-اق ەپيدەميولوگيالىق احۋالدىڭ سىرتقى جانە ىشكى سۇرانىسقا اسەرىن ەسكەرە وتىرىپ قابىلدايدى. كۇتۋلەردىڭ، ينفلياسيانىڭ جانە ونىڭ ورنىقتى قۇرامداس بولىكتەرىنىڭ تۇراقسىز باياۋلاۋى كەزىندە ۇلتتىق بانك مونەتارلىق تالاپتاردى بارىنشا كۇشەيتۋدى جالعاستىرادى.
قازاقستان رەسپۋبليكاسى ۇلتتىق بانكىنىڭ اقشا-كرەديت ساياساتى جونىندەگى كوميتەتىنىڭ بازالىق مولشەرلەمە بويىنشا كەزەكتى جوسپارلى شەشىمى 2022 جىلعى 24 قاڭتاردا نۇر-سۇلتان ۋاقىتى بويىنشا 15:00-دە جاريالاناتىن بولادى.