باتىس قازاقستان وبلىسىندا كازتالوۆ اۋدانىنداعى ەلدى مەكەندەرگە سۋ باسۋ ءقاۋپى تۋىندادى.
بقو تج دەپارتامەنتىنىڭ باسپا ءسوز قىزمەتىنەن ءمالىم ەتكەندەي، قاراوزەن مەن سارىوزەندە سۋ دەڭگەيىنىڭ كوتەرىلۋىنە بايلانىستى بارلىعى 22 اۋىلعا ءقاۋىپ ءتونىپ تۇر، دەپ حابارلايدى Almaty-akshamy.kz.
«قازىرگى ۋاقىتتا قاراوزەنگە رەسەيدىڭ ساراتوۆ وبلىسىنداعى ورەل-گاي سۋ قويماسىنان سەكۋندىنا 408 تەكشە مەتر، دميترييەۆتەن 325 تەكشە مەتر، پريۋزەننەن 372 تەكشە مەتر سۋ جىبەرىلۋدە. اتالعان سۋ قويمالارىنان اققان سۋ كازتالوۆ اۋدانى اۋماعىمەن وتەدى. سول سەكىلدى ۆارفولومەيەۆ سۋ قويماسى 105،6 پايىزعا تولعان. بۇدان سارىوزەنگە سەكۋندىنا 100 تەكشە مەتر سۋ بوساتىلۋدا. وزەن بويىندا 2500 قاپ توسەلىپ، جاعالاۋدى بەكىتۋ، سۋدى جايىلمالارعا اعىزۋ جۇمىستارى جۇرگىزىلۋدە. № 1 كازتالوۆ سۋ قويماسىنا شليۋز اشىلدى. سۋ دەڭگەيى كۇرت كوتەرىلگەن جاعدايدا № 2 كازتالوۆ جانە ماماي سۋ قويمالارىنىڭ شليۋزدەرى اشىلادى. كۇنى بۇگىن ءار ەلدى مەكەندە تاۋلىك بويى كەزەكشىلىك ۇيىمداستىرىلدى. اۋدان بويىنشا 3080 ادامعا ارنالعان 37 ەۆاكۋاسيالىق قوسىن ازىرلەندى» دەپ حابارلادى ۆەدومستۆودان.
«قازگيدرومەت» رمك بقو فيليالىنىڭ مالىمەتى بويىنشا قاراوزەننىڭ جالپاقتال اۋىلى تۇسىنداعى دەڭگەيى 741 سانتيمەترگە (ءقاۋىپتى شەگى — 790-820 سم) جەتتى.
سونداي-اق سارىوزەننىڭ دەڭگەيى قوشانكول اۋىلى تۇسىندا — 750 (1200-1300)، بوستاندىقتا 400 (600 سم) سانتيمەتردى كورسەتتى.
وڭىردە شاعان، دەركول جانە جايىق وزەندەرى دە كوتەرىلۋ ۇستىندە.
كازتالوۆ اۋدانى اكىمدىگىنىڭ باسپا ءسوز قىزمەتىنەن تۇسكەن مالىمەتكە قاراعاندا، بۇگىن اۋدان اكىمى اسلانبەك سارقۇلوۆ سۋ تاسقىنىنىڭ الدىن الۋ شارالارىنا بايلانىستى جەدەل شتاب وتىرىسىن وتكىزدى.
جيىندا سۋ باسۋ ءقاۋپى بار اۋىلدار مەن ەلدى مەكەندەرگە اۋىر تەحنيكا مەن جۇمىس كۇشى جۇمىلدىرىلعانى ايتىلىپ، باسقا دا ماسەلەلەر پىسىقتالىپ، ءتيىستى تاپسىرمالار بەرىلدى.
«ءيا، ەكى وزەننەن دە سۋ كەلىپ جاتىر. بارلىق قاۋىپسىزدىك شارالارى الىنۋدا» دەدى Kazinform تىلشىسىنە ا.سارقۇلوۆ.
ەسكە سالا كەتەيىك، بۇدان بۇرىن ورال قالاسىندا ساياجاي تۇرعىندارىن كوشىرۋ باستالعانىن جازعان بولاتىنبىز.