ەنەرگەتيكا مينيسترلىگى: جىلۋ بەرۋ ماۋسىمىنا 5،2 ملن توننا كومىر جانە 88 مىڭ توننا مازۋت دايىندالدى
پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا ەنەرگەتيكالىق جانە كوممۋنالدىق ينفراقۇرىلىمنىڭ الداعى جىلۋ بەرۋ ماۋسىمىنا دايىندىعى تۋرالى ەنەرگەتيكا ءمينيسترى الماسادام ساتقالييەۆ بايانداما جاسادى.
جىلۋ بەرۋ ماۋسىمى اباي، اقمولا، اتىراۋ، شىعىس قازاقستان، قاراعاندى، قوستاناي، پاۆلودار، سولتۇستىك قازاقستان وبلىستارىندا جانە استانا قالاسىندا باستالىپ كەتتى. اۋا رايىنىڭ جاعدايىنا بايلانىستى باتىس جانە وڭتۇستىك وڭىرلەردە قازان ايىنىڭ ورتاسىنان باستاپ جىلۋ بەرىلەدى دەپ جوسپارلانۋدا.
ەنەرگەتيكا ءمينيسترىنىڭ ايتۋىنشا، ەلەكتر ستانسالارىندا جوندەۋ كەستەسىنە سايكەس 5 ەنەرگيا بلوگىندا، 32 قازاندىقتا، 28 تۋربينادا جوندەۋ جۇمىستارى اياقتالدى. قازىرگى تاڭدا 4 ەنەرگيا بلوگىندا، 23 قازاندىقتا جانە 16 تۋربينادا جوندەۋ جۇمىستارى ءار ءتۇرلى كەزەڭدەردە جۇرگىزىلۋدە.
ەلەكتر جەلىلەرى بويىنشا 19،9 مىڭ كم ەلەكتر بەرۋ جەلىلەرى، 376 قوسالقى ستانسا جانە 4 046 تاراتۋ پۋنكتى مەن ترانسفورماتورلىق قوسالقى ستانسالار جوندەۋدەن ءوتتى.
مينيسترلىك الداعى جىلۋ بەرۋ ماۋسىمىندا تۇتىنۋشىلاردى ەنەرگيامەن جابدىقتاۋدىڭ سەنىمدىلىگىن ارتتىرۋ ءۇشىن:
- ەلەكتر ەنەرگياسىنىڭ شەكتى تاريفتەرى قايتا قارالدى؛
- قايتارىمدى ينۆەستيسيالاردىڭ جىلدىق ءليميتى ۇلعايتىلدى.
2024 جىلى قابىلدانعان شارالار جوندەۋ جۇمىستارىن قارجىلاندىرۋدى وتكەن جىلمەن سالىستىرعاندا 44%-عا ارتتىرىپ، 327 ملرد تەڭگەگە جەتكىزۋگە مۇمكىندىك بەردى. سونىمەن قاتار، جىلۋ بەرۋ ماۋسىمىنا ارنالعان قويمالاردا نورماتيۆتەرگە سايكەس 5،2 ملن توننا كومىر جانە 88 مىڭ توننا مازۋت جيناقتالعان.
مينيسترلىك وڭىرلەردەگى اعىمداعى ءبىرقاتار ماسەلەلەردى باقىلاۋدا ۇستايدى.