باتىر جۇكەمبايەۆ قارسىلاسىن نوكاۋتپەن جەڭدى

جەكپە-جەك 6 راۋندتقا ەسەپتەلگەن

قازاقستاندىق بوكسشى باتىر جۇكەمبايەۆ (18-1، 14 كو) كاسىپقوي بوكستاعى العاشقى جەڭىلىسىنەن كەيىن اراعا جارتى جىل سالىپ، رينگكە ورالدى، دەپ حابارلايدى Almaty-akshamy.kz قازاقپارات  سايتىنا سىلتەمە جاساپ.

Sports.kzء-تىڭ مالىمەتىنشە، ول كانادانىڭ مونرەال قالاسىندا وتكەن كەشتە مەكسيكالىق حۋان حوسە مارتينەس الۆارەسپەن (28-10، 20 كو) قولعاپ ءتۇيىستىردى.

ءبىرىنشى جارتىلاي ورتا سالماقتاعى ايقاس 6 راۋندقا ەسەپتەلگەن بولاتىن جانە ول جۇكەمبايەۆتىڭ جەڭىسىمەن اياقتالدى. قازاقستاندىق بوكسشى جەكپە-جەكتىڭ 1ء-ىنشى مينۋتىندا-اق وپپونەنتىن الدىمەن، نوكداۋنعا، ىلە-شالا نوكاۋتقا جىبەردى.

وسىلايشا، ب.جۇكەمبايەۆ كاسىپقوي بوكستاعى 19-ىنشى جەڭىسىنە قول جەتكىزىپ، بيىلعى مامىردا پۋەرتوريكولىق سابريەل ماتياستان (17-1، 17 كو) بولعان جەڭىلىسىن «جاپتى». ول كەزدە جۇكەمبايەۆ 8ء-ىنشى راۋندتان كەيىن ايقاستى جالعاستىرۋدان باس تارتقان ەدى.

حۋان حوسە مارتينەسكە كەلسەك، بۇل ونىڭ پروفيبوكس مانسابىنداعى 11ء-ىنشى جەڭىلىسى.

ەسكە سالايىق، كەشە ب.جۇكەمبايەۆ جەكپە-جەك الدىندا سالماق ولشەۋ راسىمىنەن وتكەنىن جازعان ەدىك. كەشتىڭ باستى ايقاسى رەسەيلىك ارتۋر بەتەربييەۆ (16-0، 16كو) پەن امەريكالىق ماركۋس براۋن (24-1، 16كو) اراسىندا ءوتتى.