11-14 جەلتوقسان ارالىعىندا الماتىدا XII حالىقارالىق «باستاۋ» ستۋدەنتتىك جانە دەبيۋتتىك فيلمدەر كينوفەستيۆالى وتەدى، دەپ حابارلايدى aqshamnews.kz.
ۇلتتىق كينونى قولداۋ ورتالىعىنىڭ مالىمدەۋىنشە، فەستيۆالدى ءداستۇرلى تۇردە الماتى قالاسى اكىمدىگىنىڭ قولداۋىمەن Tanaris Production جانە A Team كينوكومپانيالارى ۇيىمداستىرادى.
فەستيۆالدىڭ سالتاناتتى اشىلۋ ءراسىمى 11 جەلتوقساندا «ارمان» كينوورتالىعىندا وتەدى. شارا رەجيسسەر الينا مۇستافينانىڭ دەبيۋتتىك تولىقمەتراجدى تۋىندىسى - «ونىڭ اكەسىنە، مەنىڭ ارعى اتاما، ونىڭ ارعى اتاسىنا پىراندىك» دەرەكتى فيلمىمەن اشىلادى. كارتينانىڭ الەمدىك پرەمەراسى وسى قازان ايىندا وڭتۇستىك كورەياداعى پۋسان حالىقارالىق كينوفەستيۆالىندە وتكەن.
بيىلعى جىلى فەستيۆالدە BASTAU SHORTS حالىقارالىق بايقاۋ باعدارلاماسى بولادى. وندا الەمنىڭ تۇكپىر-تۇكپىرىنەن ۇسىنىلعان قىسقامەتراجدى ويىن، دەرەكتى جانە انيماسيالىق دەبيۋتتىك فيلمدەر كورسەتىلەدى. بۇل كونكۋرسقا قاتىسۋ ءۇشىن 500-گە جۋىق ءوتىنىم كەلىپ ءتۇستى. بايقاۋدىڭ بارلىق كورسەتىلىمدەرى «تۇران» ۋنيۆەرسيتەتىندە وتەدى. كىرۋ تەگىن.
12ء-شى «باستاۋ» كينوفەستيۆالىنىڭ ۇزدىك فيلمدەرىن رەسەي كينەماتوگرافيستەر وداعىنىڭ جانە وزبەكستان كينو قايراتكەرلەرى وداعىنىڭ مۇشەسى، رەجيسسەر راشيد ماليكوۆتىڭ توراعالىعىمەن حالىقارالىق قازىلار القاسى ايقىندايتىن بولادى. قازىلار القاسىنىڭ قۇرامىنا رەسەيلىك كينووپەراتور بوريس ليتوۆچەنكو، قىرعىزستاندىق رەجيسسەر، سەناريست جانە پروديۋسەر دالميرا تىلەپبەرگەن، قازاقستاندىق كينوسىنشى وراز كەرەيبايەۆ جانە وتاندىق رەجيسسەر ولجاس بايالبايەۆ كىردى.
سونداي-اق، فەستيۆال اياسىندا دەبيۋتتى قىسقامەتراجدى ويىن جانە دەرەكتى فيلمدەردىڭ جوبالارى بار جاس رەجيسسەرلەرگە ارنالعان Almaty Film Lab شەبەرحاناسى ەكىنشى رەت ۇيىمداستىرىلماق. فەستيۆالدىڭ جابىلۋ سالتاناتى 14 جەلتوقساندا AlmaU-داعى Atrium Grand Hall-دا وتەدى. وندا وتكەن جىلعى Almaty Film Lab پيچينگىنىڭ جەڭىمپازدارىنىڭ ءۇش قىسقامەتراجدى جۇمىسى كورسەتىلەدى. سونىمەن قاتار، فەستيۆال باعدارلاماسىندا جەتەكشى كينو ماماندارىنىڭ شەبەرلىك سىنىپتارى مەن حالىقارالىق كينەماتوگرافيستەردىڭ قاتىسۋىمەن دوڭگەلەك ۇستەل بار.
فەستيۆالدىڭ سەرىكتەستەرى – «وراز ابىشيەۆ قورى» قوعامدىق قورى، «شاكەن ايمانوۆ اتىنداعى «قازاقفيلم» ۇلتتىق كينوستۋدياسى» اق، حالىقارالىق «ەۋرازيا» كينوفەستيۆالى، ت. جۇرگەنوۆ اتىنداعى قازاق ۇلتتىق ونەر اكادەمياسى، «تۇران» ۋنيۆەرسيتەتىنىڭ Turan Film Academy جوعارى مەكتەبى، AlmaU مەديا جانە كينو مەكتەبى جانە Qara Studios.
فەستيۆال جاڭالىقتارىن bastauiff.com سايتىنان جانە ءبىزدىڭ bastauiff – Instagram جانە Facebook پاراقشالارىنان ءبىلىپ وتىرۋعا بولادى.