بۇل جولى اۋا رايىنىڭ قولايسىزدىعىنا بايلانىستى قالامىزدا «الەۋمەتتىك قىزمەت كورسەتۋ» ۇيىندە «حالىقتىڭ الەۋمەتتىك وسال توپتارى» تىزىمىندە تۇرعان ازاماتتارعا كەزەك تارتىبىمەن پاتەر كىلتى تابىستالدى.
الماتى قالاسىنىڭ اكىمى ەربولات دوسايەۆتىڭ تاپسىرماسىمەن جىل سوڭىنا دەيىن قالانىڭ كوممۋنالدىق تۇرعىن ءۇي قورىنان «حالىقتىڭ الەۋمەتتىك وسال توپتارى» (ءحاوت) تىزىمىندە تۇرعان ازاماتتارعا كەزەك تارتىبىمەن 2000 جالدامالى پاتەر بەرۋ جوسپارلانعان بولاتىن. اعىمداعى جىلدىڭ مامىر-ماۋسىم ايلارىندا ناۋرىزباي مەن مەدەۋ اۋداندارىندا ءى كەزەڭدە ءحاوت بويىنشا كەزەكتە تۇرعان جەتىم بالالار مەن 1080 تۇرعىنعا پاتەر كىلتى تاپسىرىلىپ، تىركەۋدەن وتكىزىلدى.
«التى بالانىڭ اناسىمىن. كوپبالالى وتباسى رەتىندە 2017 جىلدان كەزەكتە تۇرعانمىن. پاتەرلى بولعانىمىزعا قاتتى قۋانىپ تۇرمىز. ءبىزدى ەلەپ-ەسكەرىپ، باسپانالى ەتكەن قالالىق اكىمدىككە، قۇرىلىسشىلارعا العىسىمىزدى ايتامىز»، – دەپ قۋانىشتان بال-بۇل جانىپ تۇردى قالا تۇرعىنى ايجان قالييەۆا.
ءىى كەزەڭدە اعىمداعى جىلدىڭ قاراشا ايىنىڭ باسىندا ناۋرىزباي اۋدانىنداعى «شۇعىلا» ىقشاماۋدانىندا اتالعان توپتاعى، سونداي-اق جەتىم بالالار اراسىندا كەزەكتە تۇرعان تاعى 920 ادامعا پاتەر كىلتتەرىن تاپسىرۋ جانە پاتەرگە كوشىرۋ جوسپارلانۋدا. 1 قاراشادا كەزەكتە تۇرعان 201 ادامعا، 5 قاراشادا كەزەكتە تۇرعان 200 ادامعا پاتەر كىلتى تابىستالىپ، قونىستاندى. 7 قاراشادا ناۋرىزباي اۋدانى «شۇعىلا» ىقشاماۋدانىنداعى «الەم سيتي-3» تۇرعىن ءۇي كەشەنىندە ورنالاسقان 5 ۇيدە ءحاوت بويىنشا كەزەكتە تۇرعان 175 ادامعا پاتەر كىلتى تاپسىرىلدى. سونىڭ ىشىندە: 1 بولمەلى – 50 پاتەر، 2 بولمەلى – 46 پاتەر، 3 بولمەلى – 79 پاتەر.
«بۇگىن ناۋرىزباي اۋدانىندا ورنالاسقان «شۇعىلا» ىقشاماۋدانىنداعى «الەم سيتي-3» تۇرعىن ءۇي كەشەنىندە ورنالاسقان 5 ۇيدەن ءحاوت بويىنشا كەزەكتە تۇرعان ازاماتتارعا پاتەر كىلتى تاپسىرىلۋدا. ولاردىڭ سانى – 175. پاتەرلەر تازا، دايىن كۇيىندە بەرىلۋدە. جىلۋ، جارىق قوسىلعان. گاز كەلەر جىلدىڭ سوڭىنا تامان (پاتەر يەلەرى تۇگەل قونىستانعان شاقتا) قوسىلادى. 1، 2، 3 بولمەلى پاتەرلەر بار. اۋماعى شامامەن العاندا، ءبىر بولمەلى پاتەر – 40 شارشى مەتر، ءۇش بولمەلى پاتەر – 90 شارشى مەتردەن اسادى. كەلىسىم-شارتپەن كوزدەلگەن جالداۋ اقىسى بار. ءبىر بولمەلى پاتەردىڭ جالداۋ اقىسى – 10 مىڭ تەڭگە، ءۇش بولمەلى پاتەردىكى 20-25 مىڭ تەڭگە كولەمىندە بولادى. وعان قوسا، كوممۋنالدىق قىزمەت كورسەتۋ تولەمدەرى بار»، – دەپ مالىمدەدى الماتى قالالىق كوممۋنالدىق ينفراقۇرىلىمدى دامىتۋ باسقارماسى باسشىسىنىڭ ورىنباسارى عالىمجان ابدىشۇكىر ۇلى.
پاتەر كىلتى تاپسىرىلعان 175 ادامنىڭ ىشىندە «حالىقتىڭ الەۋمەتتىك وسال توپتارى» ساناتى بويىنشا بولىنگەن كەزەكتە تۇرعان 29 جەتىم بالا (2012–2014 جىلدار ارالىعىندا كەزەكتە تۇرعان)، 1 جانە 2 توپتاعى 30 مۇگەدەك (2012 جىلدان 2017 جىلعا دەيىن كەزەكتە)، 29 كوپبالالى وتباسى (2018-2019 جىلدار ارالىعىندا كەزەكتە)، مۇمكىندىگى شەكتەۋلى بالالاردى تاربيەلەپ وتىرعان 16 وتباسى (2011–2017 جىلدار ارالىعىندا كەزەكتە)، 7 زەينەتكەر (2013-2014 جىلدار ارالىعىندا كەزەكتە)، 60 تولىق ەمەس وتباسى (2012–2017 جىلدار ارالىعىندا كەزەكتە)، جەڭىلدىگى بويىنشا ەكىنشى دۇنيەجۇزىلىك سوعىسقا قاتىسقاندارمەن تەڭەستىرىلگەن 4 ارداگەر بار.