مال باعاسىن قولدان كوتەرمەۋگە شاقىردى.
قۇربان ايت مەرەكەسى قارساڭىندا باس ءمۇفتي ناۋرىزباي قاجى تاعان ۇلى كاسىپكەرلەرگە ۇندەۋ جاسادى، دەپ حابارلايدى Almaty-akshamy.kz قمدب باسپا ءسوز قىزمەتىنە سىلتەمە جاساپ.
«ءبىز قاشاندا وزگەلەرگە قايىرىمدىلىق جاساپ، اينالامىزعا شۋاعىمىزدى توگىپ، ۇلكەندەردىڭ العىسى مەن باتاسىن الىپ، وسىپ-ونگەن ەلمىز. حالقىمىزدا «قايىرىمدىلىق جاساساڭ – قايىرىن ءوزىڭ كورەسىڭ» دەگەن ناقىل ءسوز بار. پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «كىمدە كىم باۋىرىنىڭ قاجەتىن وتەسە، اللا ونىڭ قاجەتىندە بولادى. كىمدە كىم مۇسىلماننىڭ ءبىر قايعىسىن سەيىلتسە، اللا ونىڭ قايعى-قاسىرەتتەرىنىڭ ءبىرىن سەيىلتەدى»، – دەگەن.
وسى رەتتە ەلىمىزدەگى بارشا كاسىپكەر ازاماتتاردى قۇربان ايتتىڭ قۇرمەتىنە مال قۇنىن قولدان كوتەرمەي، حالىقتىڭ الەۋمەتتىك جاعدايىن ەسكەرىپ، وڭتايلى باعا ۇسىنۋعا، جۇرتىمىز كۇندە تۇتىناتىن ازىق-تۇلىككە مۇمكىندىگىنشە جەڭىلدىك جاساۋعا شاقىرامىن. قۇربان ايتتى اتاپ ءوتۋدىڭ نەگىزگى ماقساتى – مۇسىلماندار اراسىندا ءوزارا مەيىرىمدىلىك، جومارتتىق، قايىرىمدىلىق، قاناعات سىندى ادامگەرشىلىك قۇندىلىقتاردى قالىپتاستىرۋ. اللانىڭ راقىم نۇرى توگىلەتىن بەرەكەلى ساتتەردە حالقىمىزعا جاقسىلىق جاساپ، كوپشىلىكتىڭ ريزاشىلىعىنا بولەنەيىك» دەپ اتاپ ءوتتى ناۋرىزباي قاجى تاعان ۇلى.