قوعامدىق تاماقتانۋ ورىندارىندا اۋىزاشار ءمازىرىن حالىققا ىڭعايلى باعامەن ۇسىنۋ كەرەك.
بۇل تۋرالى ەلوردادا وتكەن باسپا ءسوز ءماسليحاتىندا باس ءمۇفتي ناۋرىزباي قاجى تاعان ۇلى ءمالىم ەتتى، دەپ حابارلايدى aqshamnews.kz.
- قازاقستان مۇسىلماندارى ءدىني باسقارماسىنىڭ شاريعات جانە ءپاتۋا ءبولىمى تۇركيا، ازەربايجان، وزبەكستان، قىرعىزستان ەلدەرىنىڭ عۇلامالار كەڭەسىمەن، ءپاتۋا سالاسىنا جاۋاپتى عالىمدارمەن اقىلداسا كەلە، بيىلعى رامازان ايىنىڭ باستالاتىن كۇنىن بەكىتتى. ورتاق ءپاتۋاعا سايكەس، اللا قالاسا بيىلعى قاسيەتتى رامازان ايى 1 ناۋرىزدا باستالادى. ناۋرىز ايىنىڭ 26-ىنان 27-ىنە قاراعان ءتۇن – قاسيەتتى ءقادىر ءتۇنى. 30 ناۋرىز – ورازا ايت مەرەكەسى. بيىل رامازان ورازاسى 29 كۇنگە كەلىپ وتىر. اللا تاعالا قاسيەتتى قۇراندا: «ۋا، يمان كەلتىرگەندەر! وزدەرىڭە دەيىنگى قاۋىمدارعا پارىز ەتىلگەندەي تاقۋالىققا جەتۋلەرىڭ ءۇشىن سەندەرگە دە ورازا ۇستاۋ پارىز ەتىلدى» («باقارا» سۇرەسى، 183-ايات) دەپ ءامىر ەتكەن. شاريعاتىمىز بويىنشا باليعاتقا تولعان، اقىل-ەسى دۇرىس ءاربىر مۇسىلمانعا رامازان ايىندا ورازا ۇستاۋ – پارىز، - دەدى ناۋرىزباي قاجى تاعان ۇلى.
سونىمەن قاتار ول جولاۋشىلار، ناۋقاس جاندار مەن سىرقاتى اسقىنىپ كەتۋىنەن قاۋىپتەنگەن ادامدار، سونداي-اق جۇكتى نەمەسە ەمىزۋلى بالاسى بار ايەلدەر ورازا ۇستاۋدى كەيىنگى ۋاقىتقا قالدىرۋىنا بولاتىنىن ەسكە سالدى. بۇعان شاريعاتىمىز رۇقسات بەرەدى. يسلام ءدىنى اۋىز بەكىتۋگە، زەكەت پەن ساداقا بەرۋگە شاماسى كەلمەيتىن ادامداردى اۋىرتپالىقتان بوساتقان.
- دەنساۋلىعىنا بايلانىستى نەمەسە كارىلىك جەتىپ ورازا ۇستاۋعا شاماسى جەتپەگەن ادامدار اۋىز بەكىتكەن كىسىلەرگە اۋىزاشار بەرسە، ول دا – ۇلكەن ساۋاپ... وسى رەتتە بارشاڭىزدى قازاقستان مۇسىلماندارى ءدىني باسقارماسىنىڭ قاسيەتتى ايدا ۇيىمداستىراتىن قايىرىمدىلىق ءىس-شارالارىنا ۇلەس قوسۋعا شاقىرامىن. كاسىپكەرلەردى الەۋمەتتىك ماڭىزى بار ازىق-تۇلىكتەردىڭ باعاسىنا جەڭىلدىك جاساۋعا ۇندەيمىن. رامازان ايىنا تۋرا كەلگەن قۇدايى استاردى اۋىزاشار ۋاقىتىندا وتكىزىپ، كوبىرەك ساۋاپ الۋعا تىرىسايىق. قوعامدىق تاماقتانۋ ورىندارىندا اۋىزاشار ءمازىرىن حالىققا ىڭعايلى باعامەن ۇسىنۋ دا – ساۋاپتى ءىستىڭ ءبىرى. بۇل ايدا تەك تابىسقا كەنەلۋگە ەمەس، ەڭ باستىسى حاقتىڭ رازىلىعى مەن حالىقتىڭ العىسىن الۋعا اسىققان ابزال. دۇكەندەردە كۇللى جاماندىقتىڭ باستاۋى بولعان اراق-شاراپ ساتىلماسا دەگەن تىلەگىمىزدى جەتكىزەمىز، - دەدى باس ءمۇفتي.
قازاقستان مۇسىلماندارى ءدىني باسقارماسى ورتاق ءپاتۋاعا سايكەس، قاسيەتتى رامازان ايى 1 ناۋرىزدا باستالاتىنىن حابارلاپ وتىر. ناۋرىز ايىنىڭ 26-نان 27-نە قاراعان ءتۇن — ءقادىر ءتۇنى، ال 30 ناۋرىز — ورازا ايت مەرەكەسى.