قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعان ۇلى اراپات ايماعىندا قاجىلىق ميسسياسىنىڭ ۇيىمداستىرۋىمەن وتكەن «ءبىر مەزەتتە – ءبىر نيەت» ءىس-شاراسىنا قاتىسىپ، قاجىلارمەن بىرگە دۇعا جاسادى، دەپ حابارلايدى Almaty-akshamy.kz muftyat.kz-كە سىلتەمە جاساپ.
«ۋا، اللا تاعالا! سەن قيامەت كۇنىنىڭ يەسىسىڭ! ءبىزدىڭ تاۋەلسىزدىگىمىزدى قيامەتكە دەيىن ماڭگىلىك ەتە گور. ەلىمىزدىڭ شەتىن جاۋدان، ءىشىن داۋدان ساقتاي گور. مىڭ قۇبىلعان زاماندا حالقىمىزدى قۇبىلاسىنان جاڭىلدىرا كورمە. ەلىمىزگە اماندىق، جەرىمىزگە تىنىشتىق ءناسىپ ەت. قازاق ەلىنىڭ ەرتەڭى ءۇشىن شىبىن جانىن قۇربان ەتىپ، ۇرپاق بولاشاعى جولىندا شەيىت بولعان اتا-بابالارىمىزدى ءوز كەڭشىلىگىڭمەن مەيىرىمىڭە العايسىڭ. ەل قامىندا، ءدىن قامىندا جۇرگەن اسىل ازاماتتارىمىزعا ءوزىڭ جار بولعايسىڭ. ەلىمىز بەن جەرىمىزدى ءتۇرلى تابيعي اپاتتاردان امان ساقتاعايسىڭ. ءبىزدىڭ حالقىمىزدى توسىننان كەلەتىن سىناقتاردان امان ەتكەيسىڭ. جاستارىمىزعا يمان، قاريالارىمىزعا قۋات بەرگەيسىڭ. ءبىزدى جانە ۇرپاعىمىزدى اداستىرا كورمە. ءبىزدى ەكى دۇنيە باقىتىنا بولەي گور» دەپ دۇعا جاسادى باس ءمۇفتي ناۋرىزباي قاجى تاعان ۇلى.
