يمامداردىڭ جان-جاقتى، ءبىلىمدى بولۋى – زامان تالابى.
قمدب باسپا ءسوز قىزمەتىنىڭ حابارلاۋىنشا، ناۋرىزباي قاجى تاعان ۇلى الماتى قالاسىنا جاساعان رەسمي ساپارى بارىسىندا نۇر-مۇباراك ۋنيۆەرسيتەتىندە يمامدارعا «داعۋات ادىستەرى» تاقىرىبىندا ءدارىس بەردى، دەپ حابارلايدى Almaty-akshamy.kz
يمامدارعا ناسيحات ايتۋدىڭ تاسىلدەرىن جان-جاقتى تۇسىندىرگەن باس ءمۇفتي: «وزدەرىڭىز جاقسى بىلەسىزدەر، جىل باسىندا مەن بارشا ءدىن قىزمەتكەرىنە باعدارلىق باياندامامدى جولدادىم. وسى باعدارلىق باياندامامدا يمامنىڭ قوعامداعى ءرولى مەن ورنىن ايرىقشا اتاپ ءوتتىم. ويتكەنى يمام – قوعامدى تاربيەلەۋشى، اعارتۋشى تۇلعا. وتانشىل، ەڭبەكسۇيگىش، اماناتقا ادال، اتا-اناسىن قادىرلەيتىن يماندى ۇرپاق تاربيەلەۋدە يمامنىڭ اتقاراتىن ءرولى ەرەكشە. حالقىمىزدىڭ رۋحاني دامۋىنا، قوعامدا وتباسى قۇندىلىعىنىڭ ارتۋىنا اعارتۋشى ۇستازدار مەن ءدىن قىزمەتكەرلەرى ۇلكەن ۇلەس قوسىپ كەلەدى. يمامداردىڭ جان-جاقتى، ءبىلىمدى بولۋى – زامان تالابى. ءدىن قىزمەتكەرلەرى مىقتى ۋاعىزشى بولۋىمەن قاتار، ۇنەمى ىزدەنىس ۇستىندە ءجۇرىپ، سالاۋاتتى ءومىر سالتىن ساقتاپ، سۇننەت جولىنان تايماۋى ءتيىس»، - دەپ اتاپ ءوتتى.