الماتىدا جاڭارتىلعان باس جوسپاردى ەنگىزۋ بويىنشا جۇيەلى جۇمىس جاسالىپ جاتىر، - دەپ حابارلايدى Aqshamnews.kz.
بۇل جۇمىس ساۋلەت-قالا قۇرىلىسىنا باقىلاۋدى كۇشەيتۋمەن قاتار جۇرەدى. وڭىرلىك كوممۋنيكاسيالار قىزمەتى الاڭىندا قالا اكىمىنىڭ ورىنباسارى بەيبىت شاحانوۆ حابارلاعانداي، قالا ورتاسىن دامىتۋ سالاسىنداعى ستراتەگيالىق شەشىمدەر قالا قۇرىلىسى كەڭەسى مەن ساۋلەت-قۇرىلىستىق باقىلاۋ ورگاندارى ارقىلى ىسكە اسىرىلادى.
«قالا قۇرىلىسى كەڭەسى – قالا ءۇشىن ماڭىزدى جوبالاردى قاراستىراتىن القالى كونسۋلتاتيۆتىك ورگان. ونىڭ قۇرامىنا تاۋەلسىز ساۋلەتشىلەر، وسى سالانىڭ ماماندارى كىرەدى، ولار جوبالاردىڭ جۇزەگە اسۋىنا قوعامدىق باقىلاۋ جاسايدى. بۇل رەتتە مەملەكەتتىك ورگانداردىڭ قالا قۇرىلىسى كەڭەسىندە داۋىس بەرۋ قۇقىعى جوق»، – دەدى بەيبىت شاحانوۆ.
2022–2025 جىلى كەڭەستىڭ 26 وتىرىسى ءوتىپ، 395 جوبا قارالعانىمەن، ونىڭ جارتىسى جۋىعى عانا – 47،8%-ى ماقۇلدانعان. جوبانى قاراعان كەزدە قاسبەت شەشىمىنە، وسى زامانعى تەحنولوگيانى قولدانۋعا، حالىقتىڭ تىعىزدىعىن ەسكەرىپ، ساۋلەتتىڭ قورشاعان قۇرىلىسقا ساي بولۋىنا ەرەكشە نازار اۋدارادى.
مەملەكەتتىك ساۋلەت-قۇرىلىس باقىلاۋى دا اسا ماڭىزدى باعىتتىڭ ءبىرى سانالادى. تەك وسى جىلدىڭ وزىندە 1 300-دەن استام جوسپاردان تىس تەكسەرۋ جۇرگىزىلىپ، 350 ملن تەڭگەگە اكىمشىلىك ايىپپۇل سالىنىپ، 600-دەن استام زاڭ بۇزۋشىلىقتى جويۋ تۋرالى نۇسقاما بەرىلدى. اسىرەسە قۇرىلىس-مونتاج جۇمىسىنىڭ ساپاسىنا، مەردىگەردەن باستاپ جوبالاۋ مەن تەحنيكالىق قاداعالاۋ ۇيىمدارىنا دەيىنگى قۇرىلىس بارىسىنا اتسالۋشىلاردىڭ بارلىعىنىڭ جاۋاپتى بولۋىنا اسا كوپ كوڭىل بولىنگەن.
«ءبىز قۇرىلىس-مونتاج جۇمىسىنىڭ ورىندالۋىنا باقىلاۋدى كۇشەيتۋ بويىنشا جۇيەلى جۇمىس جۇرگىزىپ جاتىرمىز. بۇل رەتتە ليسەنزيادان ايىرۋ - نارىقتى سەنىمسىز كومپانيالاردان تازارتۋدىڭ ەڭ ءتيىمدى جولى بولىپ وتىر. بيىل 5 قۇرىلىس كومپانياسى قۇرىلىس جۇرگىزۋ ليسەنزياسىنان ايىرىلىپ، تەحنيكالىق قاداعالاۋ قىزمەتىمەن اينالىساتىن 2 ۇيىمنىڭ اككرەديتاسياسى توقتاتىلدى»، – دەپ اتاپ ءوتتى اكىمنىڭ ورىنباسارى.
جىل باسىنان بەرى سوتقا شامامەن 80 تالاپ-ارىز بەرىلىپ، ونىڭ جارتىسى قاناعاتتاندىرىلدى. تالاپ-ارىزدىڭ 42ء-سى نىسانداردى تولىق نەمەسە ءىشىنارا بۇزۋعا قاتىستى بولعان. جالپى قالا بويىنشا جىل باسىنان بەرى 38 زاڭسىز قۇرىلىس بۇزىلىپ، تاعى 70 نىساندى الداعى ۋاقىتتا بۇزۋ جوسپاردا تۇر.
بەيبىت شاحانوۆتىڭ ايتۋىنشا، باستى ماقسات – جوبالاۋدان باستاپ نىساندى پايدالانۋعا بەرۋگە دەيىنگى ءار پروسەسس زاڭ تالابىمەن ىسكە اساتىنداي ەتەتىن ءتيىمدى باقىلاۋ جۇيەسىن قالىپتاستىرۋ.