ەربولات دوسايەۆ – تۇرعىنداردىڭ كاسىپكەرلەردى جازالاۋدى تالاپ ەتۋى تۋرالى
الماتى اكىمى ەربولات دوسايەۆ بوستاندىق اۋدانىنىڭ تۇرعىندارىمەن كەزدەسۋدە تۇرعىنداردىڭ كەيبىر كاسىپكەرگە قاتىستى شاعىمىنا جاۋاپ بەردى.
«مەن تورايعىروۆ كوشەسىنەن 500 مەتر قاشىقتىقتا تۇرامىن، بولمەمنىڭ تەرەزەسىن اشا المايمىن، سەبەبى كاۋاپحانانىڭ ءيىسى شىعادى. وتىنەمىن، قانداي دا ءبىر شارا قولدانىڭىزشى»، - دەدى اۋدان تۇرعىنىنىڭ ءبىرى اكىمنەن.
قالا باسشىسى وسىنداي شاعىمنىڭ باسقا اۋدانداردان دا تۇسكەنىن، ءقازىر قالا بويىنشا تەكسەرىس جۇرگىزىلىپ جاتقانىن ايتتى.
«ءاربىر تەكسەرىستەن بۇرىن قۇقىقتىق ستاتيستيكا كوميتەتىندە تىركەلەدى، ول جەردە كاسىپكەرلەرگە ارتىق قىسىم جاساپ جاتقان جوقپىز با، سول مۇقيات قارالادى. وتكەن جولى وسى ماسەلەنى ۇلتتىق ەكونوميكا مينيسترلىگى مەن ساۋدا جانە ينتەگراسيا مينيسترلىگىنە ۇسىنعانىمدى ايتقان بولاتىنمىن. ۇسىنىس قابىلدانعاننان كەيىن ماسەلەنى جۇيەلى تۇردە شەشەمىز دەپ ۇمىتتەنەمىن. قاجەتتى جۇمىستاردى جۇرگىزەمىز»، – دەدى ەربولات دوسايەۆ.
سونداي-اق، قالا باسشىسى كاسىپكەرلىك باسقارماسىنا، اۋدان اكىمدىگىنە، سانيتارلىق-ەپيدەميولوگيالىق باقىلاۋ دەپارتامەنتىنە وسى ماسەلەنى باقىلاۋعا الۋدى تاپسىردى.
«زاڭ تالاپتارىنا سايكەس كەلەتىن جاقسى سۇزگىلەردى ورناتۋ ءۇشىن كاسىپكەرمەن سويلەسىڭىزدەر، ەگەر ورناتپاسا، ءتيىستى شارالار قابىلداڭىزدار»، – دەپ اكىم تاپسىرما بەردى.
قالا باسشىسى بيزنەستىڭ كاسىپكەرلىك كودەكسپەن قورعالعانىن جانە ماسەلەنى شەشۋ ءۇشىن نورماتيۆتىك-قۇقىقتىق اكتىلەرگە وزگەرىستەر ەنگىزۋ قاجەت ەكەنىن ايتتى. ءتيىستى ۇسىنىستار ورتالىق مەملەكەتتىك ورگاندارعا بەرىلدى.
«قالا پروكۋراتۋراسىن وبەكتيۆتى تەكسەرىس جۇرگىزۋگە شاقىرامىن، بەلگىلەنگەن نورمالار مەن ەرەجەلەردىڭ ساقتالماعانىن جانە نەگىزگى تالاپتاردىڭ ورىندالماي جاتقانىن كورىپ، سونىڭ نەگىزىندە شەشىم قابىلداۋعا بولادى، بارلىعى زاڭدى تۇردە بولۋى كەرەك»، – دەدى ەربولات دوسايەۆ.