الماتى اكىمى باقىتجان ساعىنتايەۆ جۇمىس ساپارى كەزىندە اباتتاندىرۋ جۇمىستارى ءجۇرىپ جاتقان كىشى الماتى وزەنى بويىنداعى جاياۋ جۇرگىنشى ايماعىندا بولدى.
باقىتجان ساعىنتايەۆ ءوزىنىڭ Instagram-داعى اككاۋنتىندا جاياۋ جۇرگىنشى جولىنداعى نەگىزگى وزگەرىستەر تۋرالى ايتتى، دەپ حابارلايدى Almaty-akshamy.kz
«تەررەنكۋر جايقالىپ كەلەدى. ۇزىندىعى 9 شاقىرىمداي بولاتىن جاياۋ جۇرگىنشىلەر جولىنىڭ اباتتاندىرۋ جۇمىسى اياقتالۋعا جاقىن. نە ىستەلدى؟ ەڭ الدىمەن، 5 مىڭعا جۋىق بۇتالى وسىمدىك وتىرعىزىلىپ، جاسىل قور رەتكە كەلتىرىلدى. ونىڭ بەتكەيدى نىعايتىپ، جاعالاۋدىڭ قۇلاۋىنا جول بەرمەسى انىق. البەتتە، جاسىل ايماق اعزانىڭ قالپىنا كەلۋىنە ىقپال ەتەتىن ارنايى ميكروكليماتتى ساقتايدى. تەررەنكۋردىڭ ەمدىك ماقساتتا سالىنعانى بەكەردەن ەمەس»، — دەپ جازدى الماتى اكىمى.
ونىڭ ايتۋىنشا، ەكىنشىدەن، ارنالار رەتكە كەلتىرىلىپ، ول جەر تۇنبا مەن قۇمنان تازارتىلدى. گابيون كونسترۋكسيالارى نىعايتىلىپ، قالپىنا كەلتىرىلدى. ماقاتايەۆ كوشەسىندەگى كوپىر قايتا جوندەۋدەن ءوتىپ، گيدروتەحنيكالىق قۇرىلىس جاڭارتىلدى. بۇل كىشى الماتى وزەنىنىڭ وتكىزۋ مۇمكىندىگىن مينۋتىنا 0،5 تەكشە مەتردەن 2،5 تەكشە مەترگە دەيىن ۇلعايتتى. ەكى مەترلىك جەرلەر بارىنشا ءۇش مەترگە دەيىن كەڭەيتىلىپ، اسفالت اۋىستىرىلدى.
«قالا تۇرعىندارىنا ىڭعايلى بولۋ ءۇشىن ورىندىقتار جاڭارتىلىپ، تەڭىز دەڭگەيىنىڭ بيىكتىگىن كورسەتەتىن ناۆيگاسيالىق ستەندتەر مەن اقپاراتتىق ستەللالار قويىلدى. بۇدان وزگە ءال-فارابي داڭعىلىنىڭ استىنداعى توننەل اباتتاندىرىلىپ، وقۋشىلار سارايى عيماراتىنىڭ ارتىنا قاراۋ الاڭى سالىندى. كەڭىستىكتىڭ ۇيلەسىمدىلىگى مەن تۇتاستىعىن ساقتاۋ ءۇشىن بارلىق جەردە اعاش پايدالانىلدى»، — دەپ اتاپ ءوتتى باقىتجان ساعىنتايەۆ.
اباتتاندىرۋ جۇمىستارى اياقتالۋدا. سانيتارلىق توراپتى قوسۋ، بالالار الاڭدارىن جاساۋ، جەكەلەگەن ۋچاسكەلەردى اباتتاندىرۋ عانا قالدى.
جۇمىس ساپارى كەزىندە قالا اكىمى قازاقستان قوناق ءۇيىنىڭ ارتىنداعى درۋجبا تىنىمباعىن اباتتاندىرۋ جانە اباي اتىنداعى قازۇاوبت جانىنداعى تىنىمباقتىڭ تاريحي كەلبەتىن قالپىنا كەلتىرۋ جۇمىستارىنىڭ ناتيجەلەرىن كوردى.
بۇدان وزگە، باقىتجان ساعىنتايەۆ فونتاندى رەكونسترۋكسيالاۋ جانە ءا.قاستەيەۆ اتىنداعى مەملەكەتتىك مۋزەي اۋماعىن اباتتاندىرۋ جونىندەگى جۇمىستاردىڭ باستالۋىمەن تانىستى.