ءالى كۇنگە كوز الدىمىزدا تۋعان-تۋىس، تانىستىڭ اراسىندا سوڭى قايعىعا اپارىپ جاتقان ىندەتتىڭ تارالۋىنا قاراماستان، حالىق كوروناۆيرۋسقا جەڭىل-جەلپى ناۋقاس سياقتى قاراپ كەلەدى.
تۇرعىندارمەن ءداستۇرلى ونلاين جۇزدەسۋىندە الماتىنىڭ اكىمى وسىلاي دەدى، دەپ حابارلايدى Almaty-akshamy.kz ءتىلشىسى.
«حالقىمىزدىڭ اماندىعى ءۇشىن پوليسيا قىزمەتكەرلەرىنە مەيرامحانا، تۇنگى كلۋبتاردى كۇزەتتىرۋگە ءماجبۇر بولىپ وتىرمىز. ولاردىڭ نەگىزگى قىزمەتى –تۇرعىنداردىڭ قاۋىپسىزدىگىن ساقتاۋ ەكەنىن بىلەسىزدەر. ىندەتتىڭ وسىنشا اسقىنىپ تۇرعانىن بىلە تۇرا، قىدىرماي قويا تۇرۋعا، شىداۋعا بولماي ما؟ بۇدان ارتىق قالاي ايتامىن ەندى؟ حالىق وسى بەتىمەن جۇرە بەرسە، ءتىپتى بۇدان دا قاتاڭ شارالار قولدانۋىمىز كەرەك شىعار»، - دەدى مەگاپوليس باسشىسى.
سونىمەن قاتار باقىتجان ءابدىر ۇلى اركىم ءوز دەنساۋلىعى ءۇشىن جاۋاپتى بولسىن دەگەندى قاداپ ايتتى.
«الەۋمەتتىك جەلىدە وتىرىپ الىپ، ەكپەگە قارسى ناسيحات ايتاتىن انتيۆاكسەر ءسىزدىڭ دەنساۋلىعىڭىز ءۇشىن جاۋاپتى ەمەس. ول ءۇشىن تىكەلەي ءوزىڭىز جاۋاپتىسىز. بۇل وڭاي ىندەت بولسا، الدەقاشان جەڭىپ شىققان بولار ەدىك، ارپالىسىپ كەلە جاتقانىمىزعا ءبىر جارىم جىل بولدى عوي. ۆيرۋس مۋتاسيالانىپ، ءار ءتۇرلى شتامدارى پايدا بولىپ جاتقانىن بىلەسىزدەر. «دەلتا» شتامىنىڭ ءتىپتى اۋىر سوعاتىنى، جىلدام تارالاتىنى بەلگىلى بولدى. بۇل شتامنىڭ وتە تەز جۇعاتىنى سونداي، اۋرۋحانالارعا وتباسىمەن ءتۇسىپ جاتقان ناۋقاستار بار. ىندەتتى تولاستاتۋدىڭ جالعىز-اق جولى بار، ول –ەكپە سالدىرۋ. بۇگىنگى جاعدايىمىزدى جاقسارتامىز دەسەك، ەكپەنىڭ قاجەتتىلىگىن تۇسىنەتىن ۋاقىت كەلدى. سانەپيدەميولوگتاردىڭ ايتقانىنا باعىنايىق»، -دەدى قالا اكىمى.