الماتى قالاسىنىڭ اكىمى باقىتجان ساعىنتايەۆ «الماتى» تەلەارناسىنداعى «Akimat LIVE» باعدارلاماسىنىڭ كەزەكتى تىكەلەي ەفيرىندە مەگاپوليستەگى ەپيدەميولوگيالىق احۋالدىڭ كۇردەلەنۋى جانە كۆي دەرتىنىڭ اسقىنۋى تۋرالى حابارلادى. ۆيرۋستىڭ تارالۋىنا قارسى تۇرۋ ءۇشىن قالالىقتاردى بەلسەندى تۇردە ەكپە الۋعا شاقىردى.
سونىمەن قاتار شاھار تۇرعىندارىنىڭ ساۋالدارىنا جاۋاپ بەردى.
چەمپيوندار ءالى دە شىعادى
تۇرسىنعالي ەدىلوۆ،
قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى:
– قايىرلى كەش، باقىتجان ءابدىر ۇلى! بارشاعا بەلگىلى، قازىرگى تاڭدا توكيو تورىندە ءدۇبىرلى وليمپيادا ءوتىپ جاتىر. جالپى، مەگاپوليستە بولاشاق چەمپيونداردى باۋلۋ، سپورتتى دامىتۋ تۇرعىسىندا قانداي جۇمىستار اتقارىلۋدا؟
باقىتجان ساعىنتايەۆ:
– جانكۇيەر رەتىندە مەن دە وليمپيادا ويىندارىن قاداعالاپ وتىرامىن. بارلىق سپورتشىعا تىلەكشىمىن. الماتىدا بولاشاق چەمپيونداردى دايىنداۋ ءۇشىن سپورتتىق نىسانداردىڭ قولجەتىمدىلىگى مەن اشىقتىعىنا باسا نازار اۋدارىلادى ءارى كەشەندى ءىس-شارالار قابىلدانۋدا. وسى ماقساتتا 6 سپورتتىق-ساۋىقتىرۋ كەشەنىنىڭ، سونداي-اق ۇلكەن تەننيس پەن ۇستەل تەننيسى ورتالىقتارىنىڭ قۇرىلىسى جۇرگىزىلۋدە. حالىقارالىق «سۇڭقار» شاڭعى ترامپليندەر كەشەنىندە سپورت كەشەنىنىڭ قۇرىلىسى اياقتالۋدا.
تەگىن قادامدىق قولجەتىمدى اشىق الاڭداردا، جەكپە-جەك ورتالىقتارىندا 40-تان استام جاتتىقتىرۋشى ساباق بەرۋدە. وسىلايشا ءبىر جارىم مىڭنان استام بالا مەن جاسوسپىرىمدەر سپورتپەن شۇعىلدانۋدا. سونىمەن قاتار، جان باسىنا شاققاندا قارجىلاندىرۋ ارقاسىندا 3 مىڭنان استام بالا سپورت سەكسيالارىنا اقىسىز بارىپ ءجۇر. وسىنداي جۇيەلى جۇمىستاردىڭ ناتيجەسىندە ءبىزدىڭ قالادان دا بولاشاقتا وليمپيادالاردى باعىندىراتىن چەمپيوندار شىعادى دەپ سەنەمىن.
باعلان،
شاھار تۇرعىنى:
– مەن مۇمكىندىگى شەكتەۋلى بالاعا قاراۋشى ادام رەتىندە قوعامدىق كولىكتە جەڭىلدىكپەن ءجۇرۋ قۇقىعىن بەرەتىن «وڭاي» كارتاسىن الا الماي جۇرگەنىمە بىرنەشە اي بولدى. قالانىڭ موبيلدىلىك باسقارماسى مەن «ترانسپورتحولدينگ» وكىلدەرىنەن ءالى كۇنگە جاۋاپ الا الماي جۇرگەن جايىم بار.
«وربيتا» شاعىناۋدانىنداعى №4 قالالىق ەمحانادا دارىگەرلەر جەتىسپەيدى. وسى ماسەلەلەرگە نازار اۋدارساڭىز ەكەن.
باقىتجان ساعىنتايەۆ:
– ارىپتەستەرىمىزگە ءاتى-جونىڭىزدى، مەكەنجايىڭىزدى تولىق قالدىرىڭىز، ماسەلەڭىزدى شەشەمىز. ءسىز ايتىپ وتىرعان №4 ەمحانا قالاداعى ەڭ ۇلكەن مەديسينالىق مەكەمەلەردىڭ ءبىرى، ەكى-اق دارىگەر بار دەگەن مۇمكىن ەمەس جاعداي عوي. ەرتەڭ ءمان-جايدى تەكسەرىپ، وزدەرىڭىزگە جاۋابى ايتىلاتىن بولادى.
ارنايى شتاب قۇرىلادى
ەربولات،
الاتاۋ اۋدانىنىڭ تۇرعىنى:
– باقىتجان ءابدىر ۇلى، الدىمەن ءسىزدىڭ باسشىلىعىڭىزبەن قولعا الىنعان «جاڭا الماتى» باعدارلاماسى اياسىنداعى اتقارىلىپ جاتقان شارۋالار كوپ. بۇگىندە قالانىڭ تومەنگى بولىگى جاقسى دامىپ، وزگەرىپ كەلەدى. جۇرگىزىلىپ جاتقان جۇمىستار ءۇشىن العىس بىلدىرەمىن. دەسەك تە، مەنى مازالايتىن ءبىرقاتار ساۋالدار بار: ءبىرىنشىسى – اۋدانىمىزدا كوگالداندىرۋ جۇمىستارىنا بايلانىستى اعاشتاردى سۋارۋ جۇمىستارى مۇلدە جۇرگىزىلمەيدى. كسك-عا قانشا ايتساق تا، ەشقانداي ناتيجە جوق. ەكىنشى ماسەلە – ءبىز 14 قاباتتى ۇيدە تۇرامىز. ءبىراق ءۇيدىڭ كىرەبەرىسىنە دۇكەندەر ورنالاسقان. سول سەبەپتى ءبىز ءتورت جىلدان بەرى ەۆاكۋاسيالىق ەسىكتەردەن كىرىپ-شىعامىز. بۇل قانشالىقتى زاڭدى؟ سودان كەيىن، ءوزىڭىز بىلەسىز، «الماتى ارەنانىڭ» ارتىندا ۇلكەن ستاديون سالىنعان. سونىڭ ارتقى جاعىندا ۇلكەن گير لاقتىراتىن ارەنا بار. سول جەر بۇگىنگە دەيىن ەش قولدانىسسىز تۇر. وسى جەرلەرگە بالالارعا ارنالعان سپورت الاڭدارىن اشسا قالاي بولار ەكەن؟
باقىتجان ساعىنتايەۆ:
– ءبىرىنشى ساۋال – كىرەبەرىستەر بويىنشا ماسەلە نەدە ەكەنىن تەكسەرۋ كەرەك. بۇل ساۋالدىڭ ءتۇيىنىن شەشۋ ءۇشىن سالا باسشىسىنا تاپسىرما بەردىم. ال ەكىنشى ماسەلە بويىنشا، ءيا، ءبىر بارعانىمىزدا نە ىستەسەك بولادى دەپ ويلانعانىمىز بار. ەگەر ول جەرگە بالالارعا ارناپ سپورت الاڭىن سالاتىن بولساق، ونى كاسىبي تۇردە سپورتپەن اينالىساتىن جاقسى ورتالىق جاساۋ كەرەك. ءقازىر سپورت باسقارماسى اكىمدىكپەن بىرگە نە ورنالاستىرۋ كەرەكتىگىن ويلاستىرىپ جاتىر.
جالپى، كوگالداندىرۋ جۇمىستارى بويىنشا قالالىق اكىمدىك تاراپىنان ارنايى شتاب قۇرۋ جۇمىسى جۇرگىزىلىپ جاتىر. ەگەر بىلە بىلسەڭىزدەر، قالا بويىنشا جاسىل الاڭ 12 مىڭ گەكتاردان اسادى. ونىڭ 800 گەكتارى مەردىگەر كومپانيالاردىڭ قاراۋىندا. دەيتۇرعانمەن ونىڭ بارلىعىن ءبىر عانا اكىمشىلىكتىڭ كۇشىمەن سۋعارۋ مۇمكىن ەمەس.
سوندىقتان قالانى جاپ-جاسىل ەتىپ ۇستاپ تۇرۋ تەحنيكالىق تۇرعىدان دا قيىن. ال حالىق كوپ جۇرەتىن ورىندارداعى سۋارۋ جۇمىستارى ۇنەمى ءارى مىندەتتى تۇردە جۇرگىزىلۋگە ءتيىس.
فارحات،
تۇركسىب اۋدانىنىڭ تۇرعىنى:
– قايىرلى كەش، باقىتجان ءابدىر ۇلى! ءسىز باسشىلىققا كەلگەن جىلى تۇركسىب اۋدانىنىڭ تۇرعىندارىمەن كەزدەسۋ وتكىزگەندە كوشەمىزدە جاڭبىرلى كۇندەرى سۋ جينالىپ، ارى-بەرى ءجۇرۋ مۇمكىن بولماي قالاتىندىعىن ايتقان بولاتىنبىز. اۋدان باسشىلىعى بۇل ماسەلەنى ءالى شەشپەي وتىر. ەكىنشى ساۋالىم – كاسسين كوشەسىندە №49 مەكتەپ ورنالاسقان. مەكتەپتە وقۋشى كوپ. سول ماڭعا «سەرگەك» بەينەباقىلاۋ كامەراسىن ورناتىپ، وقۋشىلاردىڭ وتۋىنە ىڭعايلى بولۋى ءۇشىن تروتۋارلار ورناتىلسا دەگەن ءوتىنىشىمىز بار.
باقىتجان ساعىنتايەۆ:
– ارنايى جول ءجۇرۋ بەلگىلەرىن قويۋ سونشالىقتى قيىن شارۋا ەمەس. تۇركسىب اۋدانىنىڭ اكىمىنە تاپسىرما بەرىلدى. ەرتەڭ ءوتىنىش يەسىمەن بىرگە قاجەتتى مەكەنجايعا تروتۋار قويۋ ماسەلەسىن شەشىپ بەرەدى.
«بيۋدجەتكە قاتىسۋ» – حالىق مۇددەسى
ديماش داۋىلبايەۆ،
قالا تۇرعىنى:
– مەن «زەردەلى» ىقشاماۋدانىنان حابارلاسىپ وتىرمىن. «بيۋدجەتكە قاتىسۋ» باعدارلاماسى بويىنشا جوبامىزدى ۇسىنىپ ەدىك. ءبىراق ەشقانداي جۇمىس جۇرگىزىلمەي وتىر. بۇل بويىنشا جۇمىس ىستەيتىن كومپانيامەن بايلانىسقا شىعىپ ەدىك. ولار بۇعان مۇلدەم باسقا بيۋدجەت قاراستىرىلعانىن ايتىپ وتىر. وكىنىشكە قاراي، بۇل بويىنشا بىزگە اكىمدىكتەن نەمەسە كومپانيا وكىلدەرىنەن ەشكىم كەلىپ تۇسىندىرگەن جوق.
باقىتجان ساعىنتايەۆ:
– ءقازىر اۋدان اكىمىن قوسايىق. بۇل رەتتە كەيبىرەۋلەردىڭ تەك كونكۋرستىق جۇمىستارى عانا ءوتتى. مۇمكىن وسىعان بايلانىستى شىعار...
ازامات قالدىبەكوۆ،
الاتاۋ اۋدانىنىڭ اكىمى:
– ءيا، وتكەن اپتادا Amanat Cleaning كومپانياسى بەكىتىلگەن بولاتىن. بۇل رەتتە «زەردەلى» شاعىناۋدانىندا «بيۋدجەتكە قاتىسۋ» بويىنشا ءۇش جوبا قاراستىرىلعان. تروتۋارلار توسەۋ جوباسىن ەكسپەرتتەر بەكىتتى. ءقازىر دايىندىق جۇمىستارى جۇرگىزىلىپ جاتىر. قاجەتتى تەحنيكا مەن جۇمىس كۇشى جۇمىلدىرۋدا. بۇيىرسا، وسى اپتادا جۇمىستار باستالادى.
باقىتجان ساعىنتايەۆ:
– «بيۋدجەتكە قاتىسۋ» باعدارلاماسى تۋرالى ايتاتىن بولساق، «ءبىز باسقا بيۋدجەت ۇسىنىپ ەدىك، ولار باسقا بيۋدجەت قاراستىرىپ وتىر» دەگەننىڭ ءبارى، بۇل – كونكۋرستىق شارالار. بۇل جەردە كىم از بەرەدى، سول ۇتادى. ماسەلەن، ول جۇمىس ون ميلليونعا باعالانسا، دەگەنمەن، مەردىگەر ونى 5 ميلليونعا جاسايمىن دەسە، ءبىز وعان ەشتەڭە ىستەي المايمىز. تەك سول بەكىتىلگەن قاراجاتتى بەرەمىن. مەن مۇنى جۇرتشىلىق ءتۇسىنسىن دەپ ايتىپ وتىرمىن.
ءتۇيىن.
«Akimat LIVE» باعدارلاماسىندا كوتەرىلگەن ماسەلەلەردىڭ بارلىعى جاۋاپسىز قالمايدى. تۇرعىندار شاعىمى زاڭ نەگىزىندە شەشىلەتىن بولادى. قالا اكىمى باقىتجان ساعىنتايەۆ قازىرگى ەپيداحۋالعا بايلانىستى تۇرعىنداردى ساقتىق شارالارىن بارىنشا ساقتاۋعا شاقىردى.
ازىرلەگەن نۇرجامال الىشيەۆا،
قۇرالاي يمانبەك قىزى،
سەرىك جۇماباي.