ق ر پرەزيدەنتى جانىنداعى ورتالىق كوممۋنيكاسيالار قىزمەتىندە وتكەن باسپا ءسوز كونفەرەنسياسىندا ب. ساعىنتايەۆ الماتى ەكولوگياسىن جاقسارتۋ ءۇشىن قابىلدانىپ جاتقان شارالار تۋرالى ايتىپ بەردى.
ەڭ باستى مىندەتتىڭ ءبىرى - جەو-2ء-نى گازعا كوشىرۋ جونىندەگى كوپ جىلدىق پروبلەمانى شەشۋ بولدى. قۇرىلىس جۇمىستارى 2022 جىلدىڭ ءناۋرىز-ساۋىر ايلارىندا باستالادى، دەپ حابارلايدى Almaty-akshamy.kz
ستانسيانىڭ ءبىرىنشى بلوگىن گاز وتىنىنا قوسۋ 2023 جىلدىڭ سوڭىنا جوسپارلانىپ وتىر. جاڭا ستانسيانىڭ جوباسى ورناتىلعان 600 مۆت-قا دەيىن ەلەكتر جانە 957 گكال/ساع جىلۋ قۋاتىن قاراستىرادى.
ەلەكتر ستانسياسى ەكولوگيالىق تازا وتىن – تابيعي گازبەن جىلىتىلادى. ول جىلۋ مەن ەلەكتر ەنەرگياسىن بىرلەسىپ ءوندىرۋ – كوگەنەراسيا قاعيداتىن پايدالانا وتىرىپ، زاماناۋي بۋ-گاز تەحنولوگيالارى بويىنشا سالىنادى.
ستانسيانىڭ 200 مۆت ءۇش بلوگى پايدالانۋعا بەرىلگەندە، جاڭا جابدىق كەزەڭ-كەزەڭىمەن قولدانىستاعىلاردى الماستىراتىن بولادى. ەلەكتر ەنەرگياسى مەن جىلۋ ءوندىرۋ پروسەسى توقتامايدى.مودەرنيزاسيادان سوڭ قالا اتموسفەراسىنا جەو-2 شىعارىندىلارى 15 ەسەدەن استام قىسقارادى.
قوعامدىق كولىك سالاسىندا ەلەكتر قۋاتىمەن جانە گاز وتىنىمەن جۇرەتىن اۆتوبۋستاردى ساتىپ الۋ جۇرگىزىلۋدە. ەلەكتروتاكسي قىزمەتى دامۋدا.
سونىمەن قاتار، قالا تۇرعىندارىن مەگاپوليستىڭ ءتۇرلى بولىكتەرىندە اۋا ساپاسى تۋرالى اقپاراتتاندىرۋ جوباسى ىسكە قوسىلدى. اقپارات قالانىڭ 49 LED-ەكرانىنداعى 41 داچيكتەن كەلىپ تۇسەدى، سونداي-اق «الماتى» تەلەارناسىندا كورسەتىلەدى. سونىمەن قاتار، بيىل اۋا مونيتورينگى بويىنشا 60 داچيك ورناتۋ جانە «سەرگەك» جۇيەلەرى مەن شىعارىندىلاردى تىركەۋ جانە قالا بويىنشا قوزعالىستى باقىلاۋ بويىنشا ءپد-نىڭ بازاسىن ينتەگراسيالاۋ جوسپارلانۋدا.
جاسىل قوردى دامىتۋ بويىنشا جۇمىستار جۇرگىزىلۋدە. جالپى، قالادا 2،6 ملن اعاش بار، ونىڭ 23%-ى ەسكى. «جاسىل الماتى» باعدارلاماسى اياسىندا 530 مىڭنان استام اعاش وتىرعىزىلدى. بيىل 190 مىڭ اعاش وتىرعىزىلادى، بۇگىندە ونىڭ 115 مىڭعا جۋىعى وتىرعىزىلدى.
قالاعا كىرە بەرىستە 15 ەكوپوست ورناتىلعان، تاعى 4-ەۋى اعىمداعى جىلدىڭ سوڭىنا دەيىن ورناتىلادى.
بارلىق بەكەتتەر ولشەۋگە ارنالعان جابدىقتارمەن، بەينەباقىلاۋ كامەرالارىمەن جابدىقتالعان.
اعىمداعى جىلدىڭ 20 ناۋرىزىنان باستاپ 140 405 ولشەم ورىندالدى، ونىڭ ىشىندە 21 913-تە زياندى زاتتاردىڭ ارتۋى تىركەلگەن.
كەلەسى جىلدان باستاپ 3 جىلجىمالى ەكولوگيالىق بەكەت پەن 1 زەرتحانا ىسكە قوسىلادى.
قازىرگى ۋاقىتتا ەكولوگيالىق نورمالارعا سايكەس كەلمەيتىن كولىك قۇرالدارىن انىقتاۋ بويىنشا رەيد جۇرگىزىلۋدە. 2 550 كولىك تەكسەرىلدى، پايدالانىلعان گازدارداعى زياندى زاتتاردىڭ اسىپ كەتۋى 519 اۆتوكولىكتە انىقتالدى. تەكسەرىلگەن اۆتوكولىكتىڭ جالپى سانىنىڭ 23%-ى ەكولوگيالىق نورمالارعا سايكەس كەلمەيدى.
ەقدب «جاسىل قالالار» باعدارلاماسى اياسىندا ەكولوگيا جانە قالا دامۋى ماسەلەلەرىن شەشۋ ءۇشىن «جاسىل قالا» جوسپارىن ازىرلەۋدە.
سونداي-اق، قورشاعان ورتانى جاقسارتۋدىڭ تۇراقتى تەتىكتەرىن قۇرۋ ءۇشىن «Big Apple» جوباسى، اگلومەراسيانىڭ تقق باسقارۋ باعدارلاماسى، الماتىنىڭ جاسىل بەلدەۋىن دامىتۋدىڭ 10 جىلدىق جوسپارى، اگلومەراسيا اتموسفەراسىنىڭ ديناميكالىق مودەلىن قۇرۋ جانە ونىڭ جۇمىس ىستەۋىن قولداۋ ءۇشىن ءمجا، جاڭارتىلاتىن ەنەرگيا كوزدەرىن دامىتۋ باعدارلاماسى، ەلەكتر كولىگى ءۇشىن زاريادتاۋ ينفراقۇرىلىمىن قۇرۋ جانە قولداۋ ءۇشىن ءمجا جانە ت. ب. ازىرلەنۋدە.