«داۋىس» قوعامدىق بايقاۋشىلار كواليسياسى» رەسپۋبليكالىق قوعامدىق بىرلەستىگىنىڭ الماتى قالاسىنىڭ فيليالىندا باسپا ءسوز كونفەرەنسياسى ۇيىمداستىرىلدى.
ب ا ق وكىلدەرىنە ارنالعان جيىندا «داۋىس» قوعامدىق بايقاۋشىلار كواليسياسى» رەسپۋبليكالىق قوعامدىق بىرلەستىگى 19 ناۋرىز كۇنى وتەتىن سايلاۋعا باقىلاۋشىلاردى دايىندايتىن مەكتەپ ءوز جۇمىسىن باستاعانىن حابارلادى.
«ازاماتتىق، پاتريوتيزم، قۇقىقتىق مادەنيەت، قۇزىرەتتىلىك – بۇل قازاقستان رەسپۋبليكاسى پارلامەنتى ءماجىلىسىنىڭ جانە بارلىق دەڭگەيدەگى ءماسليحاتتاردىڭ دەپۋتاتتارىن سايلاۋدا بۇكىل سايلاۋ راسىمدەرىنىڭ اشىقتىعى مەن زاڭدىلىعى قامتاماسىز ەتۋگە ارنالعان ءاربىر بايقاۋشىعا ءتان بولۋى ءتيىس قاجەتتى قاسيەتتەر. الماتى قالاسىندا 603 سايلاۋ ۋچاسكەسى بار (ونىڭ ىشىندە 532ء-سى اشىق) جانە 19 ناۋرىزدا، داۋىس بەرۋ كۇنى، وعان مىڭداعان الماتىلىقتار ساياسي پارتيالار مەن ءوزىن-وزى ۇسىنعان دەپۋتاتتىققا ەڭ لايىقتى كانديداتتارعا داۋىس بەرۋ ءۇشىن كەلەدى. داۋىس بەرۋ ءراسىمىنىڭ اشىقتىعىن، شىنايىلىعىن، وبەكتيۆتىلىگىن جانە داۋىستاردى ساناۋدى قامتاماسىز ەتۋ ماقساتىندا ءاربىر سايلاۋ ۋچاسكەسىندە تاۋەلسىز باقىلاۋشىلار بولادى، ولار جاۋاپتى، ساۋاتتى جانە بەيتاراپ تۇردە سايلاۋ پروسەسىنىڭ بارلىق راسىمدەرىن قاداعالايدى»، – دەدى «قوعامدىق جوبا» مەكەمەسىنىڭ ديرەكتورى الەكساندر براتەنكوۆ.
سونداي-اق، ول الداعى سايلاۋدا بولاتىن ەرەكشەلىكتەردى ايتىپ ءوتتى.
«ءقازىر ءبىراز جىلدان كەيىن ارالاس سايلاۋ جۇيەسى قايتادان جاندانىپ جاتىر. ۇمىتكەرلەر پارتيالىق تىزىممەن جانە ءبىرمانداتتى وكۋرگ اتىنان وز-وزدەرىن ۇسىنۋ ارقىلى سايلاۋعا تۇسەدى. الماتىدا مۇنداي 3 سايلاۋ وكرۋگى بار. ءبىر قىزىعى، ءوز-وزىن ۇسىنىپ جاتقان ۇمىتكەرلەر وتە كوپ. ءار وكۋرگتە 40-تان استام كانديدات تىركەلدى. سايلاۋداعى تاعى ءبىر ەرەكشەلىك – باقىلاۋشىلار ەندى اككرەديتاسيادان ءوتۋ كەرەك. بۇرىن كەز كەلگەن ساياسي پارتيانىڭ نە قوعامدىق بىرلەستىك وكىلى باقىلاۋشى بولا الاتىن ەدى. ودان كەيىن قوعامدىق بىرلەستىكتەر تىركەلەتىن بولدى. بۇل سايلاۋدا ءار ۇيىمنىڭ وكىلدەرى اككرەديتاسيادان ءوتۋى قاجەت» – دەدى ول.
«الماتى ازاماتتىق اليانسى» زاڭدى تۇلعالار بىرلەستىگىنىڭ ءتوراعاسى قايىرجان ابدىحالىقوۆ باقىلاۋشىلار مەكتەبىنىڭ جۇمىس بارىسى تۋرالى باياندادى.
«سايلاۋ كەزىندە ەڭ ماڭىزدى جۇمىستاردىڭ ءبىرىن باقىلاۋشىلار اتقارادى. سوڭعى وتكەن پرەزيدەنت سايلاۋدا الماتىدا 2 مىڭنان استام دەربەس باقىلاۋشى تىركەلدى، ءبىز ولاردى وقىتتىق. وسى باقىلاۋشىلار مەكتەبىندە دە تاجىريبەلى وقىتۋشىلارىمىز بولادى. ءوز ىستەرىن جاقسى بىلەدى. باقىلاۋشىلار كۋرسى 4 تارماققا بولىنەدى. ونىڭ ىشىندەگى ەڭ ماڭىزدىسى قۇقىقتىق مادەنيەت ءبىلۋ، ياعني ءار باقىلاۋشى زاڭنامانى ءبىلۋى قاجەت»، – دەدى ق.ابدىحالىقوۆ.
جيىنعا قاتىسقان «قوعامدىق پىكىر» جانە «ەل ەرتەڭى» قوعامدىق بىرلەستىكتەرى دە الداعى سايلاۋدا باقىلاۋشىلاردى دايىنداۋ ءۇشىن «داۋىس» قوعامدىق بايقاۋشىلار كواليسياسى» رەسپۋبليكالىق قوعامدىق بىرلەستىگىمەن تىعىز جۇمىس جاسايتىندارىن ايتتى.
