بۇل تالاپتار ورىندالماعان جاعدايدا ايىپپۇل سالىنادى.
قازاقستان رەسپۋبليكاسىنىڭ ورتالىق سايلاۋ كوميسسياسى بۇقارالىق اقپارات قۇرالدارىنا پرەزيدەنتتىككە كانديداتقا ەفير ۋاقىتىن جانە باسپا ءسوز بەتىنەن ورىن بەرۋ تۋرالى اقپاراتتىق حابارلاما جاريالادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ق ر سايلاۋ تۋرالى» كونستيتۋسيالىق زاڭنىڭ 28-بابى 3-تارماعىنا سايكەس، پرەزيدەنتتىككە كانديداتتاردىڭ ۇگىت ماتەريالدارىن جاريالاۋ ءۇشىن بۇقارالىق اقپارات قۇرالدارى 16 قازاننان كەشىكتىرمەي ەفيردەن جانە باسپا ءسوز بەتىنەن ورىن بەرۋ تولەمىنىڭ مولشەرى، شارتتارى مەن ءتارتىبى تۋرالى مالىمەتتەردى جاريالاۋى، سونداي-اق ورتالىق سايلاۋ كوميسسياسىنا ۇسىنۋى ءتيىس.
ورتالىق سايلاۋ كوميسسياسى اكىمشىلىك قۇقىقبۇزۋشىلىق تۋرالى كودەكستىڭ 112-بابى 5-بولىگىنە سايكەس قارالعان جاۋاپكەرشىلىكتى تە ەسكە سالادى. اتاپ ايتقاندا، ەفيردەن جانە باسپا ءسوز بەتىنەن ورىن بەرگەنى ءۇشىن تولەمنىڭ مولشەرى، شارتتارى جانە ءتارتىبى تۋرالى مالىمەتتەردى سايلاۋ الدىنداعى ۇگىت جۇرگىزۋ باستالاردان بەس كۇن بۇرىن حابارلاماعان جانە جاريالاماعان، سونداي-اق ورتالىق سايلاۋ كوميسسياسىنا ۇسىنباعان بۇقارالىق اقپارات قۇرالىنىڭ پرەزيدەنتتىككە كانديداتتاردىڭ ۇگىت ماتەريالدارىن جاريالاۋى نەمەسە ەفيرگە شىعارۋى لاۋازىمدى ادامدارعا 30، زاڭدى تۇلعالارعا 50 ايلىق ەسەپتiك كورسەتكiش مولشەرiندە ايىپپۇل سالۋعا اكەپ سوعادى.