جەكە تۇلعالاردىڭ بانكروتتىعىن رەتتەيتىن زاڭ جوباسىن تانىستىرعان مەملەكەتتىك كىرىستەر كوميتەتى ءتوراعاسىنىڭ ورىنباسارى قايرات مياتوۆ بانكروتتىق راسىمدەگەن ازاماتتار نەشە جىل نەسيە الا المايتىنىن ايتتى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«تولەم قابىلەتىن قالپىنا كەلتىرۋ دەپ اتالاتىن جەكە تۇلعا بانكروتتىعىنىڭ ءۇشىنشى جولى بورىشكەرگە سوت ارقىلى قارىزدى تولەۋ بويىنشا شەگەرىمدەر بەرۋدى كوزدەيدى. ول ءۇشىن تولەم قابىلەتىن قالپىنا كەلتىرۋ جوسپارىن ازىرلەۋ كەرەك. بۇل جوسپار قارجىلىق باسقارۋشىنىڭ اتسالىسۋى ارقىلى ازىرلەنەدى. جوسپارعا كرەديدور مەن بورىشكەردىڭ ەكەۋى دە كەلىسىم بەرۋى قاجەت. بورىشكەردىڭ مۇلكىن ساتۋ سياقتى شارالاردىڭ ءبارى تەك وسى جوسپارعا ەنگەن جاعدايدا عانا ىسكە اسادى. جوسپارعا كىرمەگەن شارالاردىڭ ءبارى قارىزدى قايتارۋ ءۇشىن قولدانىلمايدى»، - دەدى كوميتەت وكىلى.
ونىڭ سوزىنشە، قازاقستاندا 1 ميلليوننان استام ادامنىڭ موينىندا پروبلەمالىق بورىش بار. ءبىراق ونىڭ ءبارى جەكە تۇلعانىڭ بانكروتتىعىن راسىمدەيدى دەگەن ءسوز ەمەس. ويتكەنى بانكروتتىق راسىمدەۋدىڭ دە سالدارى بار.
«بانكروتتىق راسىمدەگەن بورىشكەر 5 جىل كولەمىندە بانكتەر مەن ميكروكرەديتتىك ۇيىمداردان قارىز الا المايدى. شەتەلگە شىعۋعا 3 جىل بويى تىيىم سالىنادى. بۇل تىيىمعا شەتەلدە ەمدەلۋ، ءبىلىم الۋ، تۋىسقانىن جەرلەۋ راسىمىنە قاتىسۋ جانە جۇمىسقا ورنالاسۋ سەبەپتەرى كىرمەيدى. بۇل سەبەپتەر بولعان جاعدايدا ءتيىستى قۇجاتتاردى كورسەتۋ كەرەك بولادى. ەكىنشى رەت بانكروتتىق راسىمدەۋ ءۇشىن الدىڭعى بانكروتتىقتان كەيىن 7 جىل ۋاقىت ءوتۋى كەرەك. زاڭ جوباسىندا وسىنداي نەگىزگى بازالىق قاعيداتتار ەنگىزىلگەن»، - دەدى قايرات مياتوۆ.