ق ر قارجى نارىعىن رەتتەۋ جانە دامىتۋ اگەنتتىگىنىڭ مالىمەتىنشە، بانكتىك شوتتى بۇعاتتاۋدىڭ سەبەپتەرى ءار ءتۇرلى، دەپ حابارلايدى aqshamnews.kz
"بۇعاتتاۋدىڭ سەبەپتەرى ءار ءتۇرلى بولۋى مۇمكىن: تەحنيكالىق اقاۋلاردان باستاپ، زاڭنامانى بۇزۋ تۋرالى كۇدىككە دەيىن"، دەلىنگەن ق ر قارجى نارىعىن رەتتەۋ جانە دامىتۋ اگەنتتىگىنىڭ مالىمەتىندە.
شوتتى بۇعاتتاۋدىڭ ىقتيمال سەبەپتەرى:
الاياقتىق نەمەسە ادەتتەن تىس وپەراسيالارعا كۇدىك (مىسالى، قوماقتى نەمەسە ءجيى اۋدارىمدار، اسىرەسە شەتەلدەن)؛
مەملەكەتتىك ورگانداردىڭ سۇراۋى (سالىق قىزمەتى، سوت ورىنداۋشىلارى، قارجىلىق مونيتورينگ ورگاندارى) بويىنشا بۇعاتتاۋ؛
بانك جۇيەسىندەگى تەحنيكالىق ىركىلىس نەمەسە قاتە؛
قاتە پين-كود ەنگىزۋ؛
كارتانىڭ قولدانىس مەرزىمىنىڭ اياقتالۋى؛
سالىقتار، اليمەنتتەر، كرەديتتەر جانە باسقا مىندەتتەمەلەر بويىنشا بەرەشەكتىڭ بولۋى؛
شوتتى الاياقتىق ماقساتتا پايدالانۋعا شاعىم.
ەگەر شوت بۇعاتتالسا، نە ىستەۋ كەرەك؟
ەگەر ءسىز شوتقا كىرۋدىڭ شەكتەلگەنىن بىلسەڭىز، الدىمەن بانكتىڭ ءموبيلدى قوسىمشاسىنداعى حابارلامالاردى تەكسەرىڭىز – سەبەبى سول جەردە جازىلۋى مۇمكىن.
تولىق اقپارات الۋ ءۇشىن كولل-ورتالىق ارقىلى بانككە نەمەسە جاقىن جەردەگى بولىمشەگە حابارلاسىڭىز. قول جەتكىزۋدى قالپىنا كەلتىرۋ ءۇشىن قانداي ارەكەتتەر قاجەت ەكەنىن ناقتىلاڭىز.
eGov.kz نەمەسە سالىق تولەۋشىنىڭ كابينەتى ارقىلى ىقتيمال بەرەشەكتىڭ بولۋىن تەكسەرىڭىز. قاجەت بولسا، قاراجاتتىڭ پايدا بولۋ كوزىن راستايتىن قۇجاتتار دايىنداڭىز جانە ۇسىنىڭىز.
ەگەر بانك تۇسىنىكتەمە بەرمەسە نەمەسە شارا قولدانباسا، ءسىز قارجى نارىعىن رەتتەۋ جانە دامىتۋ اگەنتتىگىنە شاعىم تۇسىرە الاسىز.
بۇعاتتالۋ ءقاۋپىن قالاي ازايتۋعا بولادى:
كاسىپكەرلىك قىزمەت ءۇشىن جەكە شوتتى پايدالانباڭىز؛
بانكتى ءىرى اۋدارىمدار جانە وزگە دە ادەتتەگى وپەراسيالارعا ۇقسامايتىن وپەراسيالار جونىندە الدىن الا حاباردار ەتىڭىز؛
دەربەس دەرەكتەردىڭ وزەكتىلىگىن جانە قۇجاتتاردىڭ قولدانىس مەرزىمدەرىن قاداعالاپ وتىرىڭىز؛
بەرەشەكتەردىڭ بولۋىن ۇنەمى تەكسەرىپ وتىرىڭىز جانە ۋاقتىلى وتەڭىز.