بالۋان شولاق اتىنداعى سپورت جانە مادەنيەت سارايىندا توعىزقۇمالاق پەن تاەكۆوندودان جارىس ءوتىپ جاتىر.
Amanat پارتياسى الماتى قالالىق فيليالىنىڭ ۇيىمداستىرۋىمەن توعىزقۇمالاق ۇلتتىق ويىنىنان بالۋان شولاق اتىنداعى سپورت جانە مادەنيەت سارايىنىڭ كىشى زالىندا Amanat Cup جەكەلەي اشىق بىرىنشىلىگى ءوتىپ جاتىر، دەپ حابارلايدى Almaty-akshamy.kz.
ويىن قازاقتىڭ ۇلتتىق ويىندارىن قالا جاستارى اراسىندا دارىپتەپ، رۋحاني بەلسەندىلىكتەرىن ارتتىرۋ ماقساتىندا وتكىزىلۋدە. شاراعا الماتى توعىزقۇمالاق فەدەراسياسى جانە «الماتىكىتاپ» باسپاسى قولداۋ ءبىلدىردى.
«Amanat پارتياسى ۇيىمداستىرعان بۇگىنگى تۋرنيرگە الماتىنىڭ ءار اۋدانىنان ۇزدىك بالالار ىرىكتەلىپ الىندى. جالپى، 40-قا جۋىق ويىنشى قاتىسىپ جاتىر. تۋرنير ۇلدار مەن قىزدار اراسىندا بولەك بەس اينالىم بويىنشا وتەدى. جارىس شۆەيسار جۇيەسىنە نەگىزدەلگەن، ياعني ۇپايى جوعارى مىقتىلار ءوزارا كەزدەسەدى، ءسويتىپ، بەسىنشى اينالىمدا جەڭىمپازدار انىقتالادى. توعىزقۇمالاق شاحمات سەكىلدى راپيد، بليس جانە كلاسسيكالىق بولىپ بولىنەدى. بۇگىنگى جارىس راپيد بويىنشا ءوتىپ جاتىر، ياعني ءار ويىنشىعا 20 مينۋت ۋاقىت بەرىلەدى»، – دەدى جارىستىڭ باس تورەشىسى ءالىمجان قىدىربايەۆ.
سونىمەن قاتار، ول ءوز سوزىندە بالالاردىڭ توعىزقۇمالاققا قىزىعۋشىلىعى ارتىپ كەلە جاتقانىن دا اتاپ ءوتتى:
«ءقازىر بالالاردىڭ توعىزقۇمالاققا قىزىعۋشىلىعى جوعارى. بۇل سپورتتىڭ بالا ساناسىنا پايداسىن اتا-انالار دا ءتۇسىنىپ جاتىر. شاحماتقا بالالارىن قالاي بەرسە، توعىزقۇمالاق ۇيىرمەلەرىنە دە سولاي قاتىستىرادى. قازىرگى تەلەفونعا تەلمىرگەن زاماندا توعىزقۇمالاقتىڭ مي جۇمىسىنا پايداسىن اتا-انالار ءتۇسىنىپ كەلە جاتىر»، – دەدى ول.
سايىس جەڭىمپازدارىنا اقشالاي سىيلىق تابىس ەتىلەدى.
ايتا كەتكەن ءجون، بالۋان شولاق اتىنداعى سپورت جانە مادەنيەت سارايىنىڭ نەگىزگى ۇلكەن زالىندا الماتى تاەكۆوندو فەدەراسياسىنىڭ ۇيىمداستىرۋمەن حالىقارالىق بالالار مەن جاسوسپىرىمدەر اراسىنداعى Open Almaty ءتۋرنيرى ءوتىپ جاتىر.
«ءقازىر پاندەميادان كەيىنگى تاەكۆوندودان ەڭ اۋقىمدى Open Almaty ءتۋرنيرى وتۋدە. جارىسقا 6 جاستان باستاپ، 17 جاسقا دەيىنگى 700-دەن استام بالالار مەن جاسوسپىرىمدەر قاتىسىپ جاتىر. جالپى، تۋرنيردە قازاقستاننىڭ بارلىق وڭىرلەرىنىڭ جانە قىرعىزستان مەن وزبەكستاننىڭ وكىلدەرى بار. سونداي-اق، تۋرنير اياسىندا كاسىبي تاەكۆوندودان ءۇش جەكپە-جەك وتكىزىلەدى. اتالمىش جارىس سالاۋاتتى ءومىر سالتىن دارىپتەۋ، بۇقارالىق سپورتتى دامىتۋ جانە وسكەلەڭ ۇرپاق اراسىندا پاتريوتتىق سەزىمدى وياتۋ ماقساتىندا ۇيىمداستىرىلدى»، – دەدى الماتى تاەكۆوندو فەدەراسياسىنىڭ ۆيسە-پرەزيدەنتى باحتيار بايازيتوۆ.