بالاندين باپكەر بولادى

وليمپيادا چەمپيونى باپكەرلىك جۇمىسقا اۋىستى.

ريو-دە-جانەيرو وليمپيادا چەمپيونى دميتريي بالاندين ءوز مانسابىن اياقتاپ، باپكەرلىك جۇمىسقا اۋىستى. بۇل تۋرالى ق ر مسم سپورت جانە دەنە شىنىقتىرۋ ىستەرى كوميتەتىنىڭ باسپا ءسوز قىزمەتىنىڭ حابارلاسىنان بەلگىلى بولدى، دەپ حابارلايدى Almaty-akshamy.kz.

قىركۇيەكتىڭ 21 كۇنى ق ر سپورت جانە دەنە شىنىقتىرۋ ىستەرى كوميتەتىنىڭ ءتوراعاسى سامات ەرعالييەۆ قازاقستاندىق سپورتشى، جۇزۋدەن وليمپيادا چەمپيونى دميتريي بالاندين جانە ق ر ۇلتتىق قۇراماسىنىڭ باس باپكەرى يليا گۋساكوۆپەن كەزدەستى.

«وليمپيادانى باعىندىرعان سپورتشىلار وسى باعىتتان الىستاماي، قازاقستانداعى سپورتتىڭ دامۋىنا ودان ءارى ۇلەس قوسۋى كەرەك. سپورتقا ەندى اياعىن باسىپ كەلە جاتقان جاستاردىڭ جاتتىقتىرۋشىسى اتانۋ نيەتىڭىز قازاقستاندىق سپورتتىڭ سىزگە قانشالىقتى ماڭىزدى ەكەنىن كورسەتەدى دەپ سانايمىن. ءبىز ءوز تاراپىمىزدان سىزگە قولداۋ كورسەتۋگە دايىنبىز»،- دەدى كوميتەت باسشىسى. 

دميتريي بالاندين - 200 مەتر قاشىقتىققا جۇزۋدەن ريو-دە-جانەيرو وليمپيادا چەمپيونى، ازيا ويىندارىنىڭ 3 دۇركىن چەمپيونى، ۋنيۆەرسيادا-2015 جەڭىمپازى. 50، 100 جانە 200 مەتر قاشىقتىقتا قازاقستاننىڭ رەكوردشىسى. جۇزۋدەن وليمپيادالىق التىن مەدالدى جەڭىپ العان تۇڭعىش قازاقستاندىق.