ديماش قۇدايبەرگەن اتا-انالارعا ماڭىزدى ۇندەۋ جولدادى.
30 شىلدەدە اتاپ وتىلەتىن دۇنيەجۇزىلىك ادام ساۋداسىنا قارسى كۇرەس كۇنى قارساڭىندا ءانشى سيفرلىق داۋىردە قىلمىسكەرلەر الەۋمەتتىك جەلىلەر ارقىلى بالالارمەن بايلانىس ورناتا الاتىنىن اتاپ ءوتتى، دەپ حابارلايدى aqshamnews.kz
حالىقارالىق كوشى-قون ۇيىمىنىڭ (حكۇ) ەلشىسى، بەلگىلى قازاقستاندىق ءانشى ديماش قۇدايبەرگەن بالالاردىڭ قاۋىپسىزدىگىنە قاتىستى مالىمدەمە جاسادى.
"مەن اتا-انالارعا، تاربيەشىلەرگە، قامقورشىلارعا، بالالارعا جاۋاپتى بارلىق ەرەسەكتەرگە جۇگىنگىم كەلەدى. بالا ساۋداسى تۋرالى ەستىگەندە، ءبىز قولايسىز وتباسىلاردان شىققان بالالاردى نەمەسە كوشەدە تۇراتىن كوشە بالالارىن ەلەستەتەمىز. الايدا، بۇگىنگى تاڭدا بالالار ساۋداسى باسقا دا جولدارمەن دامىپ كەلەدى. سونىڭ ءبىرى - ينتەرنەت. قازىرگى ۋاقىتتا ادامدار ينتەرنەتتە كوبىرەك ۋاقىت وتكىزەدى. وسى سەبەپتەن دە قىلمىسكەرلەر بالالاردى الەۋمەتتىك جەلىلەر نەمەسە ويىن پلاتفورمالارى ارقىلى تارتۋعا تىرىسادى"،-دەدى ديماش قۇدايبەرگەن.
سونداي-اق، ول بۇل ارەكەتتەردى توقتاتۋدىڭ بىردەن-بىر جولىن ايتتى.
"بالالارىڭىزعا سيفرلىق الەمدە بەيتانىس ادامدارمەن قارىم-قاتىناس جاساۋ ءقاۋپى تۋرالى ەسكەرتىڭىز. بالالارىڭىزبەن سۋرەتكە تۇسىرۋدەن، بەينە تۇسىرۋدەن جانە بەيتانىس ادامدارمەن بولىسۋدەن اۋلاق بولۋ قانشالىقتى ماڭىزدى ەكەنىن تالقىلاڭىز. ادام ساۋداگەرلەرى ولاردى جابىرلەنۋشىلەردى قورقىتىپ، باقىلاۋدا ۇستاۋ ءۇشىن قولدانا الادى. ەڭ باستىسى، بالالارىڭىزبەن سەنىم ورناتىڭىز. ءوزىڭىزدى جانە جاقىندارىڭىزدى قورعاڭىز"، - دەپ قورىتىندىلادى ىزگى نيەت ەلشىسى.