قازنەتتە وقۋشىلاردىڭ اتا-انالارىن بالالاردى كۆي قارسى ۆاكسيناسيالاۋ تۋرالى كەلىسىمگە قول قويۋعا ماجبۇرلەيتىندىگى تۋرالى حابارلامالار تاراتىلۋدا. ولارعا دياسكين-تەست جاساۋعا جانە تۇماۋعا قارسى ەگۋگە اقپاراتتاندىرىلعان كەلىسىم بلانكىسى بەرىلەدى ەكەن. وعان قول قويعان اتا-انا بالاسىن كۆي قارسى ەگۋگە رۇقسات بەرەدى. بۇل فەيك، دەپ حابارلايدى stopfake.kz سايتى.
شىن مانىندە، مۇنداي بلانكىلەر قازاقستاندىق وقۋشىلاردىڭ اتا-انالارىنا بەرىلمەيدى. ق ر دسم سانيتارلىق-ەپيدەميولوگيالىق باقىلاۋ كوميتەتى بۇل جاعدايعا قاتىستى پىكىرىن ءبىلدىردى.
«دياسكين تەست – بۇل ادامنىڭ تۋبەركۋلەزبەن اۋىراتىندىعىن انىقتايتىن ناقتى تەست. ول بارلىق بالالارعا بىردەي جاسالمايدى. ونى مانتۋ سىناماسى وڭ ناتيجە بەرگەن مەكتەپ وقۋشىلارىنا عانا جاسايدى. دياسكين-تەست مەكتەپتەردە ەمەس، تۋبەركۋلەز ديسپانسەرلەرىندە جانە تەك اتا-انالاردىڭ كەلىسىمىمەن عانا جاسالادى. تۇماۋعا قارسى ۆاكسيناسيا دا مەكتەپ قابىرعاسىندا جۇرگىزىلمەيدى. ونىڭ ۇستىنە، بۇگىنگى كۇنى قازاقستاندا دا، الەمدە دە ءبىر ۋاقىتتا تۇماۋدان دا، كۆي-دەن دە قورعايتىن پوليۆاكسينالار جوق»، – دەپ مالىمدەدى ۆەدومستۆونىڭ رەسمي وكىلى ەرجان بايتانايەۆ.
دەمەك، اتا-انالاردى بالالاردى ەگۋگە كەلىسىمگە قول قويۋعا ماجبۇرلەيتىنى تۋرالى اقپارات فەيك. ەلىمىزدە دياسكين-تەست تە، تۇماۋعا قارسى ۆاكسيناسيا دا مەكتەپتەردە جۇرگىزىلمەيدى.
بالالاردى كۆي-گە قارسى ەگۋ تۋرالى اقپارات بۇعان دەيىن دە تاراعان. ءبىز COVID-19-عا قارسى ەكپەنى مانتۋ دەپ سالادى، مەكتەپ اسحانالارىندا ايران مەن يوگۋرتقا قوسادى، ءتىپتى بالالاردىڭ مۇرنىنا سپرەي تۇرىندە سەبەدى دەگەن قاۋەسەتتەردى جوققا شىعارعان بولاتىنبىز.
