الماتى قالاسى ءماسليحاتىنىڭ دەپۋتاتى بولات يبراگيم ۇلىنىڭ باستاماسىمەن «اقساي» بالالار اۋرۋحاناسىنىڭ كىشكەنتاي پاسيەنتتەرى جاڭا جىلدىق سىيلىقتار مەن شاتتىققا بولەندى.
جاڭا جىل قارساڭىندا س.د.اسفەندياروۆ اتىنداعى قازۇمۋ-دىڭ رەسپۋبليكالىق كلينيكالىق «اقساي» بالالار اۋرۋحاناسىندا كىشكەنتاي ناۋقاستارعا ارنالعان ەرەكشە، جىلى دا شىنايى جاڭا جىلدىق شارا ءوتتى. الماتى قالاسى ءماسليحاتىنىڭ دەپۋتاتى بولات يبراگيم ۇلىنىڭ باستاماسىمەن ەمدەلىپ جاتقان بالالارعا سىيلىقتار ازىرلەنىپ، مەرەكەلىك باعدارلاما مەن انيماتورلاردىڭ قويىلىمدارى ۇيىمداستىرىلدى. شارانىڭ ماقساتى – بالالارعا قۋانىش سىيلاپ، مەرەكەلىك كوڭىل-كۇي قالىپتاستىرۋ.
وتىزدان استام بالا جاڭا جىلدىق سىيلىقتار مەن جىلى تىلەكتەر الدى. «AMANAT» پارتياسىنىڭ ەرىكتىلەرى مەن انيماتورلار ويىندار، ءازىل-قالجىڭ جانە كوڭىلدى قويىلىمدار ۇسىنىپ، بالالاردىڭ جۇزىندە شىنايى كۇلكى مەن قۋانىش سىيلاي الدى. دارىگەرلەردىڭ ايتۋىنشا، مۇنداي شارالار بالالارعا ەم-شارالاردان ءبىر ءسات نازارىن ءبولىپ، ەموسيونالدىق قولداۋ بەرەدى.
ەسكە سالا كەتەيىك، «اقساي» اۋرۋحاناسى – ورتالىق جۇيكە جۇيەسى اۋرۋلارى، تىرەك-قيمىل اپپاراتىنىڭ بۇزىلىستارى، ەندوكرينولوگيالىق جانە تۇقىم قۋالايتىن دەرتتەرى بار بالالارعا كومەك كورسەتەتىن كوپسالالى مەديسينالىق مەكەمە. مۇندا كۇن سايىن ۇلكەن جاۋاپكەرشىلىك پەن جاناشىرلىقتى تالاپ ەتەتىن ماڭىزدى جۇمىس – ەمدەۋ، وڭالتۋ جانە بالالار مەن ولاردىڭ وتباسىلارىنا قولداۋ كورسەتۋ جۇزەگە اسىرىلادى.
«كىشكەنتاي عانا كوڭىل مەن مەيىرىمنىڭ ءوزى بالاعا ءۇمىت پەن قۋانىش سىيلاي الادى. مەن ءۇشىن بۇل بالالاردىڭ وزدەرىن جالعىز ەمەس، جانىندا سەنەتىن ءارى قولدايتىن ادامدار بار ەكەنىن سەزىنۋى ماڭىزدى. دارىگەرلەر مەن اۋرۋحانا ۇجىمىنا جانقيار ەڭبەكتەرى مەن ادامي جىلۋلىعى ءۇشىن شىن جۇرەكتەن العىس ايتامىن»،- دەدى بولات يبراگيم ۇلى.
وسىنداي يگى باستامالار بالالارعا مەرەكە اتموسفەراسىن سەزىنۋگە مۇمكىندىك بەرىپ، ەمدەلۋ كەزەڭىندە دە جانىندا جىلۋلىق پەن قامقورلىق بار ەكەنىن ەسكە سالادى.