بالالارعا اۋديولوگيالىق سكرينينگ نە ءۇشىن جۇرگىزىلەدى؟

الماتىلىق دارىگەر بالالارعا نەشە جاستا جانە نە ءۇشىن اۋديولوگيالىق سكرينينگ جۇرگىزىلەتىنىن ايتىپ بەردى.

الماتى №36 قالالىق ەمحانانىڭ پەدياتريا ءبولىمىنىڭ مەڭگەرۋشىسى دينارا قايىپوۆانىڭ ايتۋىنشا، اۋديولوگيالىق سكرينينگ جاڭا تۋعان نارەستە مەن كىشكەنتاي بالالاردىڭ ەستۋ قابىلەتىنىڭ بۇزىلۋىن دەر كەزىندە انىقتاۋ، مۇگەدەكتىككە اكەپ سوقتىراتىن اۋرۋلاردىڭ الدىن الۋ جانە وڭالتۋ  ماقساتىندا جۇرگىزىلەدى، دەپ حابارلايدى Almaty-akshamy.kz.

اۋديولوگيالىق سكرينينگ ەكى كەزەڭدە جۇرگىزىلەدى.

ءبىرىنشى كەزەڭ - جاڭا تۋعان نارەستەگە ءومىرىنىڭ العاشقى 24-72 ساعاتىندا پەرزەنتحانادا وتكىزىلەتىن نەوناتالدى اۋديولوگيالىق سكرينينگ.

ەكىنشى كەزەڭ – جاس ساناتتارى بويىنشا: 3 اي، 1 جاس، 2 جاس، 3 جاس، 6 جاستى قوسا العاندا ەمحانانىڭ بالالاردى دامىتۋ كابينەتىندە جۇرگىزىلەدى.

«ەگەر بالا قانداي دا ءبىر سەبەپپەن پەرزەنتحانادا اۋديولوگيالىق سكرينينگتەن وتپەسە، وندا ستاسيوناردان شىعارىلعاننان كەيىن تىركەلگەن جەردەگى مەديسينالىق ۇيىمنىڭ بالالاردى دامىتۋ كابينەتىنە ءبىرىنشى كەزەڭدەگى اۋديولوگيالىق سكرينينگ جۇرگىزۋ ءۇشىن سيگنال جىبەرىلەدى»، - دەپ بولىسەدى دينارا قايىپوۆا.

ەكىنشى كەزەڭدى وتكىزۋ ءۇشىن ەمحانا قىزمەتكەرى الدىمەن جەكە جانە جازباشا شاقىرۋ، جادىنامالار، ءۇنپاراقتار، تەلەفون بايلانىسى، حابارلامالار نەمەسە قولجەتىمدى ءموبيلدى مەديسينالىق قوسىمشالار ارقىلى اۋديولوگيالىق سكرينينگ جۇرگىزۋ قاجەتتىلىگى تۋرالى بەكىتىلگەن تۇرعىندارعا حابارلايدى.

پەدياتر جۇرگىزەتىن ەكىنشى كەزەڭدەگى اۋديولوگيالىق سكرينينگ جۇرگىزۋدىڭ مىندەتتى شارتى زەرتتەۋ كەزىندە بالادا جەدەل رەسپيراتورلىق جانە جۇقپالى اۋرۋدىڭ بولماۋى.

«ەگەر بالادا ەستۋ قابىلەتىنىڭ جوعالۋى انىقتالسا، بالا ديناميكالىق باقىلاۋعا الىنادى جانە بارلىق قاجەتتى ەمدەۋ شاراسى جۇرگىزىلەدى، اتاپ ايتقاندا، بالاعا جانە اتا-اناسىنا سۋردوپەداگوگپەن ەستۋ قابىلەتىنىڭ بۇزىلۋى انىقتالعان ساتتەن باستاپ، قالدىق ەستۋ قابىلەتىن، كوممۋنيكاتيۆتى داعدىلاردى - سويلەۋ، اقىل-وي فۋنكسيالارى، موتوريكانى دامىتۋ بويىنشا ساباقتار وتكىزىلەدى»، - دەپ تۇيىندەدى مامان.