"زاڭ جانە ءتارتىپ" قاعيداتىنىڭ قوعامدا تەرەڭدەي ورنىعۋى، اسىرەسە كەلەشەك ۇرپاقتىڭ ءومىرسالتىنا اينالۋى "ادىلەتتى قازاقستاننىڭ" شىنايى كەلبەتىن تۇزەدى. سوندىقتان دا بيىل 1 ماۋسىم – حالىقارالىق بالالاردى قورعاۋ كۇنى قارساڭىندا بالالار قۇقىعى ماسەلەسىنە باسا نازار اۋدارىلىپ وتىر، - دەپ حابارلايدى aqshamnews.kz.
بۇگىن الماتىداعى №130 گيمنازيادا بالالاردىڭ قۇقىقتىق مادەنيەتىن ارتتىرۋعا باعىتتالعان ءىس-شارا دا وسى ماقساتتى كوزدەگەن بولاتىن. اتالعان ءبىلىم بەرۋ مەكەمەسىندە يۋۆەنالدى پوليسيا وكىلدەرىنىڭ قاتىسۋىمەن "قۇقىقتىق ءتارتىپ" اتتى اعارتۋشىلىق ءىس-شارا ۇيىمداستىرىلدى. بالالاردىڭ قۇقىقتىق ساۋاتتىلىعىن ارتتىرۋدى ماقسات ەتكەن بۇل كەزدەسۋ مەكتەپ وقۋشىلارى، مۇعالىمدەر ءۇشىن پايدالى ءارى ماعىنالى جيىن بولدى.
ءىس-شارا بارىسىندا يۋۆەنالدى پوليسيا ينسپەكتورلارى وقۋشىلارمەن اشىق سۇحبات قۇرىپ، بالالاردىڭ سۇراقتارىنا ناقتى جاۋاپتار بەردى. سونىمەن قاتار بالالارعا قوعامدىق ءتارتىپ ەرەجەلەرى، قۇقىقتىق نورمالار جانە جاۋاپتى مىنەز-قۇلىق نەگىزدەرى ءتۇسىندىرىلدى. كامەلەتكە تولماعاندار اراسىنداعى قۇقىق بۇزۋشىلىقتىڭ الدىن الۋ جولدارى قاراستىرىلىپ، ناقتى جاعدايلاردى مىسالعا الا وتىرىپ قۇقىقتىق كەڭەس بەرىلدى.
"1 ماۋسىم – حالىقارالىق بالالاردى قورعاۋ كۇنى ەكەنى بارشامىزعا بەلگىلى. بۇل – جازدىڭ العاشقى كۇندەرىندەگى ەرەكشە مەيرامداردىڭ ءبىرى. وسىعان وراي، 21 مامىردان باستاپ قالامىزدا كەڭ اۋقىمدى ءىس-شارالار وتكىزىلىپ جاتىر. بۇگىن – سول شارالاردىڭ ءۇشىنشى كۇنى. بۇل كۇن "قۇقىقتىق ءتارتىپ" كۇنى دەپ اتالادى. وتكىزىلىپ جاتقان بارلىق ءىس-شارالاردىڭ باستى ماقساتى – ءاربىر بالا وزىنە ءقاۋىپسىز، تىڭدالعان جانە ماڭىزدى سەزىنەتىن ورتا قالىپتاستىرۋ. ال بۇگىنگى كۇننىڭ "قۇقىقتىق ءتارتىپ" تاقىرىبىن تاڭداۋى دا تەگىن ەمەس. بۇل قوعامعا بالالاردىڭ قۇقىقتارىن قورعاۋدا پوليسيا قىزمەتىنىڭ ماڭىزدى ءرولىن ەسكە سالۋ. بۇگىن ءبىز الماتى قالالىق پوليسيا دەپارتامەنتىمەن بىرلەسە وتىرىپ، مەكتەپ وقۋشىلارىنا ارنالعان اعارتۋشىلىق شارا وتكىزىپ جاتىرمىز. بۇل – قۇقىقتىق مادەنيەتتى قالىپتاستىرۋ جولىنداعى ماڭىزدى قادام"، - دەدى №130 گيمنازيا ديرەكتورى ءاليا قاسقىربايەۆا.
"جاڭا وقۋ جىلى باستالعالى بەرى ءبىز ءتۇرلى پروفيلاكتيكالىق ءىس-شارالار وتكىزىپ كەلەمىز. مىسالى، "ءقاۋىپسىز جول"، "تۇنگى قالاداعى بالالار"، "كانيكۋل" جانە "ءجاسوسپىرىم" اتتى تاقىرىپتىق شارالار تۇراقتى تۇردە ۇيىمداستىرىلادى. سونىمەن قاتار، يۋۆەنالدى پوليسيا قىزمەتكەرلەرى كۇندەلىكتى مەكتەپتەردە وقۋشىلارمەن الدىن الۋ باعىتىنداعى اڭگىمەلەر وتكىزەدى. قازىرگى تاڭدا ەلىمىزدە رەسپۋبليكالىق دەڭگەيدەگى جەدەل-پروفيلاكتيكالىق ءىس-شارالار ءوتىپ جاتىر. ونىڭ باستى ماقساتى – بالالاردىڭ قۇقىقتارىن قورعاۋ، ولاردىڭ اراسىندا قۇقىقبۇزۋشىلىقتىڭ الدىن الۋ جانە قۇقىقتىق ساۋاتتىلىقتى ارتتىرۋ. زاڭدى ءبىلۋ – ءوزىڭدى قورعاۋ. ال قۇقىقتىق ءتارتىپ – ادىلەتتى قوعامنىڭ نەگىزى"، - دەدى ۋچاسكەلىك ينسپەكتور، يۋۆەنالدى پوليسيا قىزمەتكەرى ايگەرىم ماقسات قىزى.