بالالاردىڭ جازعى دەمالىسىن قالاي پايدالى جانە ءقاۋىپسىز وتكىزۋگە بولادى؟

جاز — بالالار ءۇشىن اسىعا كۇتكەن دەمالىس ماۋسىمى. الايدا بۇل كەزەڭدى قىزىقتى ءارى مازمۇندى ەتىپ ۇيىمداستىرۋ اتا-انا ءۇشىن ءبىر مەزگىلدە جاۋاپكەرشىلىك پەن قيىندىققا اينالادى. قالانىڭ قىم-قۋىت تىرشىلىگىندە اتا-انالار جۇمىستان بوساماي، بالالار بولسا ۋاقىتتى كوبىنە تەلەفون مەن گادجەتكە تەلمىرىپ وتكىزەتىنى تاعى بار.

ەندەشە، جازعى دەمالىستى ءتيىمدى وتكىزۋدىڭ ناقتى جولدارىنا توقتالايىق.

نەلىكتەن جازعى دەمالىستى الدىن الا جوسپارلاۋ ماڭىزدى؟

         •        بالانىڭ ۋاقىتى بوسقا كەتپەۋى ءۇشىن؛

         •        قاۋىپسىزدىك تالاپتارىن ەسكەرىپ، سەنىمدى ورتا قالىپتاستىرۋ ءۇشىن؛

         •        جاڭا ءبىلىم مەن داعدىنى ويىن تۇرىندە مەڭگەرۋىنە مۇمكىندىك بەرۋ ءۇشىن؛

         •        ءار بالانىڭ قابىلەتى مەن قىزىعۋشىلىعىنا ساي ورتا تاڭداۋ ءۇشىن.

ەڭ الدىمەن الماتى ماڭىنداعى جازعى لاگەرلەرگە شولۋ جاساپ كورۋدى ءجون سانادىق. ولاردىڭ دەنى - جەكەمەنشىك لاگەرلەر. 

الماتى قالاسى مەن ماڭىندا ورنالاسقان بالالارعا ارنالعان لاگەرلەردى تومەندەگىدەي توپتاستىرۋعا بولادى:

1. تابيعاتتاعى لاگەرلەر

ىلە الاتاۋىندا ورنالاسقان سونداي لاگەرلەردىڭ بىرىنە حابارلاسىپ كوردىك. باعدارلامادا تاۋعا جورىق، كاتامارانمەن ءجۇزۋ، شاتىر تىگۋ، وت جاعۋ، كۆەستتەر، اتقا ءمىنۋ، ساداق اتۋ، گولف، اعىلشىن تىلىندەگى ويىندار بار. 

بولمەلەردە 4–6 ورىنعا شاقتالعان،  5 مەزگىل تاماق بەرىلەدى. 

باعاسى: 10 كۇنگە ~210 000 ₸

2. سپورتتىق لاگەرلەر

ولار نەگىزىنەن فۋتبول، ءجۇزۋ، كاراتە، گيمناستيكاعا باعىتتالعان. بالالار نەگىزىنەن مۇنداي لاگەرلەردە كۇندەلىكتى جاتتىعۋ مەن كىشىگىرىم جارىستاردا ءوزارا ب ا ق سىناسىپ كورەدى. 

بۇلار نەگىزىنەن ەنەرگياسى كوپ، سپورتتى جاقسى كورەتىن بالالار ءۇشىن تاپتىرمايتىن ورتا. ارتىقشىلىعى، مۇندا بالالار تارتىپكە ۇيرەنەدى، دەنە شىنىقتىرىپ،  دەمالىستى دەنساۋلىق ءۇشىن پايدالى ەتىپ وتكىزەدى. 

الماتى ماڭىندا  باعاناشىل شيپاجايىندا ورنالاسقان فۋتبول لاگەرلەرىنىڭ ءبىرىنىڭ باعىت-باعدارىن، باعاسىن ءبىلىپ كوردىك. بۇل جەر دوپ تەۋىپ، فۋتبول ويناعاندى جاقسى كورەتىن بالالار ءۇشىن قىزىقتى ەكەن. جىل سايىن دەمالىس ورنى 10 شىلدە مەن 24 شىلدە ارالىعىندا بالالاردى قابىلدايدى. جاس فۋتبولشىلار ءۇشىن ءتورت مەزگىل تاماق بەرىلەدى. مۇندا بالالار تاڭدى جاتتىعۋ جاساۋدان باستايدى. ودان بولەك فۋتبول الاڭىندا كۇنىنە ەكى رەت جاتتىعىپ، باسسەيندە دە جاتتىعادى. 

لاگەر اۋماعى كۇزەتىلەدى، قاجەتتى مەديسينالىق پەرسونالى دا بار. اتا-انالارى ۋايىمداماس ءۇشىن بالالارىنىڭ نە ىستەپ، قاي جەردە جۇرگەندەرىنىڭ ءبارى ونلاين-چاتتا ەسەبى بەرىلىپ وتىرادى. بالالاردىڭ جاتتىعۋىن وتكىزىپ، شىنىعۋ ساباقتارىن الماتىنىڭ تاجىريبەلى جانە بەلدى جاتتىقتىرۋشىلارى قاداعالايدى. 

باعاسى: 10 كۇن بويى كۇندىز عانا كەلەتىن بولسا -170.000 تەڭگە

10 كۇن بويى لاگەردە قالاتىن بولسا - 230 000 تگ.

3. شىعارماشىلىق لاگەرلەر

سۋرەت سالۋعا، مۋزىكاعا، بي مەن تەاتردان حابارى بالالارعا ارنالعان لاگەرلەر دە بار. ولاردىڭ ماقساتى -  بالانىڭ كوركەمدىك قابىلەتىن دامىتۋ. 

مۇنداي ورتادا بالالار ساحنالىق قويىلىم قويۋدى، كورمە وتكىزۋدى ۇيرەنەدى. 

 4. تىلدىك لاگەرلەر

بالانىڭ اعىلشىن نە باسقا شەت ءتىلدى ۇيرەنۋىنە قىزىعۋشىلىعىن ارتتىراتىن مۇنداي لاگەرلەردە بالالار وزدەرىنە قىزىقتى ورتا قالىپتاستىرا الادى. مۇنداي ورتادا بالالاردىڭ ءتىلدى ويىن ارقىلى ۇيرەنۋىنە مۇمكىندىك مول. 

ماقساتى: بالانىڭ ءتىلدى ۇيرەنۋگە قىزىعۋشىلىعىن وياتۋ

ارتىقشىلىعى: شەت ءتىلىن تابيعي قابىلداۋ، سويلەۋ ماشىعىن دامىتۋ

5. ەتنولاگەر: ۇلتتىق تاربيە مەن ءداستۇردى ءسىڭىرۋ

وسىنداي باعىتتى ۇستانىپ وتىرعان لاگەرلەردىڭ بىرىنەن دە باعدارلاماسى مەن باعاسىن سۇراستىردىق. باتا، بەسىك جىرى، ماقال-ماتەل جاتتاتىپ، شەشەندىك ونەرگە دە سۋسىنداتاتىن لاگەرلەر بار.  ءبىز حابارلاسقان سونداي لاگەرلەردىڭ ءبىرى بالالارعا قولونەردى دە ۇيرەتەدى ەكەن. بالالار  اتقا وتىرىپ كورەدى،  ۇلتتىق ويىندارمەن دە تانىساتىن كورىنەدى. 

تاماقتانۋ: 6 مەزگىل

باعاسى: 135 000 ₸

ارتىقشىلىعى: تامىرىن تانيتىن، ۇلتتىق بولمىسقا باي بالا تاربيەلەۋ.

لاگەرلەردىڭ بىرنەشەۋىنە حابارلاسا كەلە، جەكەمەنشىك جازعى لاگەرلەردىڭ ەڭ ارزان دەگەنى 85 مىڭ مەن 100 مىڭنىڭ اراسىندا، ال ودان قىمباتىراقتارىنىڭ باعاسى 300 مىڭعا جۋىقتايدى. قالتاعا سالماق تۇسەتىنى بولماسا، جازعى لاگەرلەردىڭ تۇرلەرىنە قاراي باعالارى دا، باعدارلامالارى دا سان الۋان. بارلىعى بالا قاۋىپسىزدىگىن باستى نازارعا قويىپ وتىر. كوپشىلىگىنىڭ اۋماعى كۇزەتىلەدى. دەمالىسقا باراتىن بالالاردىڭ اتا-انالارىمەن 24/7 كەرى بايلانىس ورناتىلعان. 

مەدرەسەلەر دە بالالاردى جازدى جاي وتكىزبەۋگە شاقىرادى

بالاسىنىڭ ءدىني ساۋاتىن ارتتىرىپ، يمانعا قاراي بەيىمدەگىسى كەلەتىن اتا-انالار بالالارىن مەشىتتەرگە، مەدرەسەلەرگە بەرىپ جاتادى. وندا بالالار قۇران الىپپەسىمەن تانىسىپ، يسلام ادەبىن ۇيرەنەدى. نەگىزىنەن ولاردىڭ دەنى كۋرس رەتىندە وتەدى. ماسەلەن، قمدب-عا قارايتىن مەشىتتەردىڭ بىرىنە حابارلاسىپ كوردىك. سويتسەك، ماۋسىمنىڭ ەكىنشى اپتاسىنان باستاپ، "يماني جاز" دەگەن تاقىرىپپەن 10-15 جاس ارالىعىنداعى ۇل جانە قىزدار ءۇشىن "ءدىني ساۋات اشۋ" كۋرستارى وتەدى ەكەن. قاتىسۋ تەگىن. باستى تالاپ: اتا-انالاردىڭ جازباشا ءوتىنىشى، بالانىڭ قۇجاتقا قاجەتتى سۋرەتى جانە تۋۋ تۋرالى كۋالىكتىڭ كوشىرمەسى. بۇل  جەردە بالالار كۇنىنە ەكى ساعات ءبىلىم الىپ، ۇيلەرىنە قايتادى. ءدىني ساۋاتتى اشاتىن، ادەپ ساباقتارىن وقىتاتىن جەكەمەنشىك ءدىني مەكەمەلەر دە بار. ولاردىڭ ءبارى تەگىن وقىتپايدى. 

مەكتەپ جانىنداعى جازعى لاگەرلەر

الماتى قالاسىندا ماۋسىم ايىنان باستاپ مەكتەپ جانىنداعى لاگەرلەر ءوز جۇمىسىن باستايدى. قازىرگى تاڭدا مەگاپوليستەگى 200-دەن استام مەكتەپ جازعى دەمالىستى مازمۇندى ۇيىمداستىرۋعا بەلسەندى دايىندىق جۇرگىزىپ جاتىر.

قالاي قاتىسۋعا بولادى؟

اتا-انالار بالاسىن لاگەرگە مەكتەپ اكىمشىلىگىنە جۇگىنۋ ارقىلى تىركەي الادى.

قاتىسۋ – تولىقتاي تەگىن.

باعدارلاما مازمۇنى:

         •        زياتكەرلىك جانە شىعارماشىلىق ويىندار

         •        سپورتتىق جارىستار مەن ەستافەتالار

         •        ۆيكتورينالار مەن پىكىرسايىس كلۋبتارى

         •        جازعى ءتىل مەكتەپتەرى

         •        «جاس ۇلان» جانە «جاس قىران» باعدارلامالارى

         •        ەتنولاگەر، ەكولاگەر، سپورتتىق لاگەرلەر تۇرىندە ارنايى باعىتتار

ارنايى باعىتتاعى مەكتەپ لاگەرلەرى:

         •        6 مەكتەپتە — ەتنولاگەر (كيىز ۇيدە ۇلتتىق ءداستۇر، قولونەر، ادەپ)

         •        24 مەكتەپتە — فۋتبول، ۆولەيبول، باسكەتبول جانە ۇلتتىق سپورت جارىستارى

         •        50 مەكتەپتە — ەكولوگيالىق مادەنيەت پەن تابيعاتقا جاۋاپكەرشىلىككە باۋليتىن ەكولاگەرلەر

بالالار قاۋىپسىزدىگى – باستى نازاردا

الماتى قالاسى ءبىلىم باسقارماسىنىڭ باسشىسى سايران سايفەدەنوۆ اتاپ وتكەندەي:

         •        بارلىق مەكتەپ لاگەرلەرى مەديسينالىق كابينەتتەرمەن جابدىقتالادى

         •        مەكتەپ ديرەكتورلارىمەن بىرگە سانيتارلىق-ەپيدەميولوگيالىق باقىلاۋ جانە توتەنشە جاعدايلار دەپارتامەنتى وكىلدەرىنىڭ قاتىسۋىمەن دايىندىق جينالىستارى وتكىزىلدى

         •        بالالارعا:

         •        سۋ ايدىندارىنداعى قاۋىپسىزدىك،

         •        جولدا، قوعامدىق ورىنداردا ءوزىن ۇستاۋ ەرەجەلەرى بويىنشا

ارنايى الدىن الۋ ساباقتارى ۇيىمداستىرىلادى

قوسىمشا ءبىلىم بەرۋ جانە IT-لاگەرلەر

الماتىدا جاز مەزگىلىندە مەكتەپتەن تىس قوسىمشا ءبىلىم بەرەتىن مەكەمەلەر بازاسىندا بەيىندى جانە كوشپەلى لاگەرلەر دە ىسكە قوسىلادى.

قايدا ۇيىمداستىرىلادى؟

         •        «شابىت» ورتالىعى

         •        «سامعاۋ» ورتالىعى

         •        №1 وقۋشىلار ءۇيى

         •        ەكى يننوۆاسيالىق شىعارماشىلىق ورتالىق

         •        وقۋشىلار سارايى جانە باسقا دا مەكەمەلەر

باعىتتارى:

         •        IT جانە عىلىمعا قىزىعۋشىلىقتى ارتتىراتىن لاگەرلەر:

جوبالىق قىزمەت، تاجىريبەلەر مەن ەكسپەريمەنتتەر

         •        شىعارماشىلىق باعىتتاعى كۋرستار:

شاحمات، ۆوكال، بي، كۇرەس، ساحنالىق ونەر جانە ت.ب.

ءار اتا-انا بالاسىنىڭ جازعى دەمالىسىنىڭ كوڭىلدى، پايدالى ءارى ەستەن كەتپەستەي ءوتۋىن قالايدى. ال ونى الدىن الا ۇيىمداستىرۋ جانە ءقاۋىپسىز وتكىزۋ اتا-انالاردىڭ جاۋاپكەرشىلىگى مەن تاڭداۋى.