بالالاردى قورعاۋ – ءبىزدىڭ باستى باسىمدىقتارىمىزدىڭ ءبىرى. مەملەكەت باسشىسى بالالاردىڭ قاۋىپسىزدىگىن قامتاماسىز ەتۋ، ولاردىڭ قۇقىقتارىن قورعاۋ جانە ۇيلەسىمدى دامۋىنا قولايلى جاعداي جاساۋ – مەملەكەتتىك ساياساتتىڭ اسا ماڭىزدى باعىتى ەكەنىن اتاپ ءوتتى.
وسىعان بايلانىستى مەنىڭ تاپسىرمام بويىنشا 2023–2025 جىلدارعا ارنالعان بالالاردى زورلىق-زومبىلىقتان قورعاۋ، ءسۋيسيدتىڭ الدىن الۋ جانە ولاردىڭ قۇقىقتارى مەن ءال-اۋقاتىن قامتاماسىز ەتۋ جونىندەگى كەشەندى جوسپارعا كامەلەتكە تولماعانداردى ينتەرنەتتەگى دەسترۋكتيۆتى كونتەنتتىڭ زياندى اسەرىنەن قورعاۋعا باعىتتالعان ۇسىنىستار ازىرلەندى. قازىرگى ۋاقىتتا بۇل ۇسىنىستار ۇكىمەتتىڭ قاراۋىندا.
ءبىز ءوز تاراپىمىزدان بۇل شارالاردى جۇزەگە اسىرۋعا كىرىستىك.
ماسەلەن، الماتى قالاسىندا پروكۋراتۋرا TELE2/ALTEL بايلانىس وپەراتورىمەن بىرىگىپ، «SIM KIDS» اتتى پيلوتتىق جوبانى ىسكە قوستى. بۇل – ءسۋيسيدتى ناسيحاتتاۋ، پورنوگرافيا، ەسىرتكى، ونلاين-كازينو جانە وزگە دە ينتەرنەت-قاتەرلەردەن قورعايتىن ارنايى بالالارعا ارنالعان سيم-كارتا.
وسى سيم-كارتانىڭ كومەگىمەن اتا-انالار بالاسىنىڭ قانداي قوسىمشالاردى پايدالانىپ جۇرگەنىن باقىلاپ، زياندى سايتتارعا قولجەتىمدىلىكتى شەكتەپ، قۇرىلعى ءۇنسىز رەجيمدە بولسا دا، بالاسىنا قوڭىراۋ شالا الادى.
جوبا اتا-انالار اراسىندا ۇلكەن قىزىعۋشىلىق تۋدىردى. سىناق كەزەڭى اياقتالعاننان كەيىن بۇل سيم-كارتا بارشاعا قولجەتىمدى بولادى.
بالالارعا ءقاۋىپسىز ورتا قالىپتاستىرۋ جۇمىسى الدىن الا جۇرگىزىلۋى ءتيىس.
بالا سيفرلىق كەڭىستىكتە سۋيسيدكە يتەرمەلەيتىن ءقاۋىپتى ويىنداردان، قۇمار ويىندارعا تاۋەلدىلىكتەن، سونداي-اق پسيحيكاسىنا زيان كەلتىرەتىن جانە وتباسىلىق تاربيە مەن قۇندىلىقتارعا دەگەن كوزقاراسىن بۇرمالاۋى مۇمكىن كەز كەلگەن جاعىمسىز كونتەنتتەن قورعالۋى ءتيىس.
ەڭ باستىسى – بالانىڭ قاۋىپسىزدىگى وتباسىنداعى كوڭىل بولۋدەن باستالادى. ەرەسەكتەر بالالاردىڭ كوڭىل كۇيىندەگى، ورتاسىنداعى جانە قىزىعۋشىلىقتارىنداعى وزگەرىستەرگە سەزىمتال بولعانى ءجون.