شىمكەنت قالاسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتى جابىق سوت وتىرىسىندا ۇلىقبەك سمانوۆقا قاتىستى قىلمىستىق ءىستى قارادى، دەپ حابارلايدى almaty-akshamy.kz
قالالىق سوتتىڭ حابارلاۋىنشا، مامانداندىرىلعان اۋدانارالىق سوتتا قازاقستان رەسپۋبليكاسىنىڭ قىلمىستىق كودەكسىنىڭ 140-بابىنىڭ 2-بولىگى (بالالاردىڭ ءومىرى مەن دەنساۋلىعىنىڭ قاۋىپسىزدىگىن قامتاماسىز ەتۋ جونىندەگى مىندەتتەردى تيىسىنشە ورىنداماۋ) جانە قك-نىڭ 110-بابىنىڭ 2-بولىگىنىڭ 1 جانە 2-تارماقتارى (ازاپتاۋ) بويىنشا سوتقا دەيىنگى تەرگەپ-تەكسەرۋ ورگانىنىڭ مەديسينالىق سيپاتتاعى ماجبۇرلەۋ شارالارىن قولدانۋ تۋرالى ءوتىنىشحاتى قارالدى.
سوت-پسيحياتريالىق ساراپتاماسىنىڭ قورىتىندىسىنا سايكەس، ۇلىقبەك سمانوۆ سوزىلمالى پسيحيكالىق اۋرۋمەن اۋىرادى جانە ءوز ارەكەتتەرىن جاساۋ كەزىندە ەس-تۇسسىز جاعدايدا بولعان. بۇل جاعداي زاڭ بويىنشا قىلمىستىق جاۋاپكەرشىلىكتى جوققا شىعارادى. سوت قازاقستان رەسپۋبليكاسىنىڭ قىلمىستىق كودەكسىنىڭ 16-بابىنا سايكەس، ۇلىقبەك سمانوۆتى قىلمىستىق جاۋاپكەرشىلىكتەن بوساتىپ، ونى مامانداندىرىلعان پسيحياتريالىق ستاسيوناردا ەمدەۋگە ماجبۇرلەۋ شارالارىن تاعايىندادى.
سونىمەن قاتار، قازاقستان رەسپۋبليكاسى وقۋ-اعارتۋ مينيسترلىگىنە، استانا، الماتى جانە شىمكەنت قالالارىنىڭ ءبىلىم باسقارمالارىنىڭ قورعانشىلىق جانە قامقورشىلىق ورگاندارىنا، سونداي-اق شىمكەنت قالالىق پوليسيا دەپارتامەنتىنە بالالاردى پسيحيكالىق اۋرۋمەن اۋىراتىن ادامنىڭ قامقورلىعىنا بەرۋ فاكتىسى بويىنشا جەكە قاۋلىلار شىعارىلدى.
قاۋلى زاڭدى كۇشىنە ەنگەن جوق.
ەستەرىڭىزگە سالا كەتسە بۇعان دەيىن شىمكەنتتە بالالارعا جاۋىزدىق تانىتقان ەمشىنىڭ قىلمىستىق وتكەن شاعى جايىندا جازعان ەدىك.