جاڭا ويىنشىنى تارتقانى ءۇشىن – ۆيرتۋالدى دەپوزيتكە 20% پايدا تابۋعا ۋادە بەرەدى
پيراميدا جاساۋشىلار ءوز سحەمالارىنا مۇمكىندىگىنشە كوپ ادامدى تارتۋ ءۇشىن ويىن-ساۋىق فورماتىن قولدانا باستادى، دەپ حابارلايدى Almaty-akshamy.kz.
ولار ەكونوميكالىق نەمەسە ينۆەستيسيالىق ونلاين-ويىنداردى ويلاپ تاپتى، وندا ويىنشىلار جوعارى كىرىس تاۋىپ، سودان كەيىن ءوز قاراجاتتارىن الا الادى-مىس. بۇل جاعدايدا پايدالانۋشىلاردىڭ جاسى ماڭىزدى ەمەس. قۇمارلىق قايدا اكەلۋى مۇمكىن جانە ۆيرتۋالدى شىندىقتا الداۋدى قالاي اشكەرەلەۋگە بولاتىنى تۋرالى Fingramota.kz ايتىپ بەرەدى.
بۇل ۆيرتۋالدى تاۋارلاردى: قۇستار، جانۋارلار، جىلجىمايتىن مۇلىك نەمەسە باسقا اكتيۆتى ناقتى اقشاعا نەمەسە كريپتوۆاليۋتاعا ساتىپ الۋعا، ينۆەستيسيالاۋعا جانە پايدا تابۋعا بولاتىن ونلاين-ويىندار. مۇنداي ويىنداردى جاساۋشىلار بونۋستار نەمەسە باسقا سىياقى بەرە وتىرىپ، پايدالانۋشىلاردى جاڭا قاتىسۋشىلاردى اكەلۋگە شاقىرادى.
مۇنداي ويىننىڭ تانىمال مىسالدارىنىڭ ءبىرى – «كوڭىلدى بالىقشىلار». ونلاين-ويىن سايتىندا بۇل جوبا «كەم دەگەندە ءسىزدىڭ قارجىلىق جاعدايىڭىزدى جاقسارتۋ ءۇشىن جاسالعان» دەپ جازىلعان. ول ءۇشىن ويىنعا قاتىسۋشىلار بالىقشىلاردى ساتىپ الۋى كەرەك – ويىندا ولاردىڭ توعىزى بار. ولاردىڭ جارامدىلىق مەرزىمى ءارتۇرلى – 20-دان 100 كۇنگە دەيىن جانە ولار ءار ءتۇرلى كىرىستىلىك اكەلەدى.
الىقشىلار كۇن سايىن ساتىلۋعا ءتيىس «بالىقتى» اۋلايدى. پايدالانۋشىلار جالقاۋ بولماۋى كەرەك، «پايدا» كۇيىپ كەتپەس ءۇشىن ويىنعا كۇن سايىن كىرۋ كەرەك. سودان كەيىن، بەلگىلى ءبىر مولشەردە ۆيرتۋالدى اقشا جينالعان كەزدە، ولاردى ناقتى اقشاعا اينالدىرىپ، شىعارىپ الۋعا بولادى. ارينە، شىن مانىندە بۇل ولاي ەمەس.
ۇقساس قاعيدات بويىنشا جۇمىس ىستەيتىن ونلاين-جوبالاردىڭ تاعى ءبىرى – «قاراڭعى ويىن»، ونى جاساۋشىلار كۇنىنە 70%-عا دەيىن، ال جاڭا ويىنشىنى تارتقانى ءۇشىن – ۆيرتۋالدى دەپوزيتكە 20% پايدا تابۋعا ۋادە بەرەدى، تانىمال «فەرما» ويىنى نەگىزىندە قۇرىلعان «اقشا فەرماسى» جانە باسقالارى دا وسىعان ۇقسايدى.
«اقشا تابۋدى» باستاۋ ءۇشىن ويىنشىلار سايتتا ءوز دەرەكتەرىن قالدىرىپ، ونلاين-ويىنعا تىركەلىپ، پايدالانۋشىنىڭ كەلىسىمىن قابىلداۋى كەرەك، وسىلايشا رەسۋرسقا جەكە دەرەكتەردى وڭدەۋگە كەلىسىم بەرۋى كەرەك. كەيبىر كومپانيالار پايدالانۋشىنىڭ كەلىسىمىندە، كەيدە ۇساق قارىپتەرمەن قايتارۋعا مۇلدەم كەپىلدىك جوق ەكەنىن كورسەتەدى. مىسالى، «باي قۇستار» ويىنىنىڭ سيپاتتاماسىندا «ۇيىمداستىرۋشى سىزگە ويىن ءىشىنارا قارجى پيراميداسىنىڭ قاعيداتتارىنا نەگىزدەلگەنىن ەسكەرتەدى جانە كەز كەلگەن ۋاقىتتا ءسىز بارلىق قاراجاتىڭىزدى جوعالتۋىڭىز مۇمكىن، بۇل رەتتە سايت ۇيىمداستىرۋشىسىنا ەشقانداي شاعىم بولمايدى!» دەپ جازىلعان.
كوپتەگەن ادامدار بۇل ويىندارعا ايتارلىقتاي ءمان بەرىپ، ولاردىڭ اينالاسىندا دۇربەلەڭ تۋدىرادى. ولار ەگەر ويىندا ۆيرتۋالدى كىرىس السام، ناقتى شوتقا دا قاراجات تۇسەدى دەپ سەنەدى. ناتيجەسىندە ويىن ىشىندەگى «ينۆەستيسيالىق ونىمگە» سۇرانىس ارتا تۇسەدى، ءبىراق ودان تىس جەردە ويىنعا قاتىسۋشىلار اقشاعا نەمەسە كريپتوۆاليۋتاعا ساتىپ الاتىن بۇل «ءونىمنىڭ»، ادەتتە، ەشقانداي قۇندىلىعى بولمايدى.
اقشانىڭ دا، جاڭا پايدالانۋشىلاردىڭ دا اعىنى توقتاعان كەزدە، ويىن جابىلادى، سالىنعان قاراجاتتى الۋ مۇمكىن ەمەس. ءسويتىپ، ويىنشى ينۆەستورلار سان سوعىپ قالادى. وكىنىشكە وراي، مۇنداي الاياقتىق سحەمالارعا وقۋشىلار مەن ستۋدەنتتەر ءجيى ءتۇسىپ قالادى، ولار وزدەرىنىڭ سەنگىشتىگى مەن قۇمارپازدىعىنىڭ سالدارىنان قارجى پيراميدالارىنا قارسى تۇرا المايدى.