قازاقستان رەسپۋبليكاسىنداعى مەرەكەلىك كۇندەردىڭ تىزبەسى «انالار كۇنى» جانە «اكەلەر كۇنى» مەرەكەلەرىمەن تولىقتى.
بۇل باستامانى اقپارات جانە قوعامدىق دامۋ مينيسترلىگى قولعا الدى، دەپ حابارلايدى Almaty-akshamy.kz.
ەندى «انالار كۇنى» مەرەكەسى مامىر ايىنىڭ ەكىنشى جەكسەنبىسىندە، «اكەلەر كۇنى» مەرەكەسى ماۋسىمنىڭ ءۇشىنشى جەكسەنبىسىندە اۋقىمدى تۇردە اتاپ وتىلەدى.
قازاقستاندا مەرەكەلىك كۇندەر كۇنتىزبەسىن بەكىتۋ تۋرالى قاۋلىعا تولىقتىرۋ ەنگىزىلدى. قۇجاتقا ۇكىمەت باسشىسى ءاليحان سمايىلوۆ قول قويدى.
«حالقىمىزدىڭ «وتان وتباسىنان باستالادى» دەگەن ناقىل ءسوزىنىڭ ءمانى تەرەڭدە جاتسا كەرەك. مەملەكەت باسشىسى قاسىم-جومارت توقايەۆ: «بەرەكەلى ءارى باقىتتى وتباسى قۋاتتى ەلدىڭ تىرەگى»، – دەگەنى بەلگىلى. وتباسىن نىعايتاتىن فاكتورلاردىڭ ءبىرى – اۋلەت مۇشەلەرىنىڭ بىرگە ۋاقىت وتكىزۋى، ورتاق قۋانىشتى بىرگە اتاپ ءوتۋى ەكەنى انىق. مينيسترلىككە قاراستى قازاقستاندىق قوعامدىق دامۋ ينستيتۋتىنىڭ «قازاقستاندىق وتباسىلار» ۇلتتىق بايانداماسىندا كورسەتىلگەندەي، ەلىمىزدەگى وتباسىلىق داستۇرلەردىڭ دىڭگەگى – اۋلەت مۇشەلەرىنىڭ تۋعان كۇنىن اتاپ ءوتۋ ەكەن. بۇل ساۋالناماعا قاتىسقان 86%-دان استام رەسپوندەنتتىڭ وي-پىكىرى ەسكەرىلدى. سونداي-اق وتباسىلاردىڭ جارتىسىنان كوبى جاڭا جىل، 8 ناۋرىز، 22 ناۋرىز جانە تاعى باسقا مەملەكەتتىك مەرەكەلەردى اتاعان»، دەپ جازدى مينيستر.
قۋانىشتى جاڭالىقتى بولىسكەن مينيستر جاڭا مەرەكەلەر وتباسى ينستيتۋتىن نىعايتۋعا، انالارىمىز بەن اكەلەرىمىزدىڭ مارتەبەسىن كوتەرۋگە، وتباسىلىق قۇندىلىقتاردى دامىتۋعا، اۋلەتتەگى جاقىندىقتىڭ، قۇرمەت-ىقىلاستىڭ بەرىك ورناۋىنا جانە وتباسىنداعى بەرەكە-بىرلىكتىڭ ارتۋىنا ىقپال ەتەتىنىنە سەنىم ءبىلدىردى.
«بۇگىنگى بالالار قۇقىعىن قورعاۋ كۇنىندە پايدا بولعان ءمانى زور مەرەكەلەر قۇتتى بولسىن! اكەلەرىمىز بەن انالارىمىز امان بولسىن!»، دەپ قورىتىندىلادى دارحان ءقىدىرالى.