قازاقستاندا بالالاردى زورلىق-زومبىلىقتان قورعاۋ، ءسۋيسيدتىڭ الدىن الۋ جانە ولاردىڭ قۇقىقتارى مەن سالاماتتىلىعىن قامتاماسىز ەتۋ جونىندەگى 2023-2025 جىلدارعا ارنالعان كەشەندى جوسپار قابىلدانىپ، ىسكە اسىرىلۋدا، دەپ حابارلايدى Almaty-akshamy.kz وقۋ-اعارتۋ مينيسترلىگىنە سىلتەمە جاساپ.
«وڭىرلىك پسيحولوگيالىق قولداۋ ورتالىقتارىن دامىتۋ بويىنشا جۇمىس جۇرگىزىلۋدە، بۇل بالالاردىڭ كاسىبي پسيحولوگيالىق كومەككە قول جەتكىزۋىن قامتاماسىز ەتۋگە مۇمكىندىك بەرەدى. رەسپۋبليكادا وسىنداي 14 ورتالىق اشىلدى. زورلىق-زومبىلىقتان زارداپ شەككەن بالالاردى انىقتاۋ جانە ولارعا كومەك كورسەتۋ بويىنشا ادىستەمە قابىلداندى. بالالاردىڭ ءال-اۋقاتىن جانە ءارتۇرلى سالادا بالالارعا جاعداي جاساۋعا باعىتتالعان ۇلتتىق ساياساتتىڭ تيىمدىلىگىنىڭ دارەجەسىن باعالاۋ ءۇشىن بالالاردىڭ ءال-اۋقاتىنىڭ يندەكسى ازىرلەنىپ، ەنگىزىلدى»، - دەدى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.
بۇدان بولەك، بالالارعا قاتىستى زورلىق-زومبىلىق ءۇشىن جاۋاپكەرشىلىك زاڭنامالىق دەڭگەيدە كۇشەيتىلگەنىن جانە وڭىرلىك بالالار ومبۋدسمەندەرى قۇقىق قورعاۋ ينستيتۋتىنىڭ مارتەبەسى بەكىتىلگەنىن اتاپ ءوتتى. وتباسى، ايەلدەر جانە بالالاردىڭ قۇقىقتارىن قورعاۋ ماسەلەلەرى بويىنشا «111» مەملەكەتتىك ءبىرىڭعاي سەنىم تەلەفونى قۇرىلدى.