بالالار ادەبيەتى جىلى اياسىندا مەملەكەتتىك تاپسىرىسپەن جارىققا شىققان 40 كىتاپتىڭ تۇساۋكەسەرى ءوتتى
بيىل بالالار ادەبيەتىنىڭ جىلى بولىپ بەلگىلەنگەن ەدى. ەندى بالالار ادەبيەتىن قولداۋ 2023 جىلعا دەيىن سوزىلادى. بيىل قازاق ادەبيەتىندە ەرەكشە جاڭالىق بولدى. 168 اتالىممەن 492 مىڭ دانا كىتاپ باسىپ شىعارىلىپ، رەسپۋبليكانىڭ مەملەكەتتىك كىتاپحانالارىنا تەگىن تاراتىلدى. ونىڭ 40-ى بالالار ادەبيەتىنە ارنالعان. جالپى تارالىمى 120 مىڭ دانا، دەپ حابارلايدى Almaty-akshamy.kz 24.kz-كە سىلتەمە جاساپ.
«ارنايى لوگوتيپپەن جالپى تارالىمى 120 مىڭ دانادا باسىلىپ شىعىپ، ەلىمىزدىڭ بۇكىل كىتاپحانالارىنا، بۇكىل ايماقتارىنا تاراتىلدى. باسىلىپ شىققان ادەبيەتتەردىڭ 34ء-ى وتاندىق قالامگەرلەردىڭ شىعارماسى بولسا، التاۋى – الەم بالالار ادەبيەتىنىڭ اۋدارمالارى. وسىنداي وڭ باستامانى جالعاستىرۋ ماقساتىندا بالالار مەن جاسوسپىرىمدەردىڭ كىتاپ وقۋىن قولداۋ جىلىن 2023 جىلعا دەيىن جالعاستىرۋ تۋرالى شەشىم قابىلداندى. وسىنداي يگى شارا بارشاڭىزعا قۇتتى بولسىن»، - دەدى ق ر مادەنيەت جانە سپورت ءمينيسترى اقتوتى رايىمقۇلوۆا.
كىتاپتاردىڭ ىشىندە بالالار مەن جاسوسپىرىمدەرگە ارنالعان وتاندىق شىعارمالار جارىق كوردى: «ادامنىڭ ءبىر قىزىعى بالا دەگەن...»، «بالالىقتىڭ سوڭعى كۇزى»، «ۇلى دالانىڭ ۇلاندارى»، «ءسابي بولعىم كەلەدى»، تاعى باسقا تۋىندىلار بار.
سونداي-اق الەم بالالار ادەبيەتى اۆتورلارىنىڭ قازاق تىلىندەگى اۋدارمالارى جارىق كوردى. سونىڭ ىشىندە جاپون بالالار ادەبيەتى جاس وقىرماندار ءۇشىن قىزىقتى ءارى تىڭ شىعارما ەكەنىن اتاپ وتۋگە بولادى. «كوك ءبورىنىڭ كوزى؛ كاستريۋچيننىڭ «ەرجۇرەك قۇمىرسقا»، «قازىنا ارالى»، دانيەل دەفونىڭ "روبينزون كرۋزو" شىعارمالارى قازاقشالاندى.