25 قازان – رەسپۋبليكا كۇنىنە وراي №169 مەكتەپ-ليسەيىندە «مەنىڭ قالام – مەنىڭ ماقتانىشىم» اتتى مەرەكەلىك كونسەرت ءوتتى. ءىس-شارا بارىسىندا وقۋشىلار مەن ارداگەرلەر كەزدەستى. مەرەكەلىك كونسەرتكە الماتى قالاسىنىڭ ارداگەرلەر كەڭەسىنىڭ مۇشەلەرى، ۇستازدار مەن وقۋشىلار قاتىستى.
– بۇگىنگى ءىس-شارا جالپى ءبىرتۇتاس تاربيەگە باعىتتالعان. ءتۇرلى تاربيە جۇمىستارىنا بايلانىستى ءارتۇرلى شارالار ۇيىمداستىرىپ جاتىرمىز. نەگىزگى ماقساتىمىز – جاستار اراسىندا بىلىممەن قاتار تاربيەنى ناسيحاتتاۋ. رەسپۋبليكا كۇنى قارتتار ايلىعىنا سايكەس كەلىپ وتىر. وسى مەرەكەنى پايدالانىپ، العا جەتەكتەۋشى ۇرپاقپەن كەيىنگى بۋىندى كەزدەستىرىپ جاتىرمىز. سەبەبى قازاقتا «قارتتار – ءبىزدىڭ قازىنامىز» دەگەن جاقسى ءسوز بار. ولار وزدەرىنىڭ اقىل-كەڭەستەرىمەن ءبولىسىپ، وقۋشىلارعا ىزگى تىلەكتەرىن ايتادى، – دەدى №169 مەكتەپ-ليسەيىنىڭ ديرەكتورى پاتشاگۇل الماعامبەتوۆا.
مەرەكەلىك كونسەرت بارىسىندا وقۋشىلار ونەرلەرىمەن كورەرمەندەردى تاڭعالدىردى. ءبىرى ءان شىرقاسا، ءبىرى قالامىزعا ارناپ ولەڭ شۋماقتارىن وقىدى. ارداگەرلەر وقۋشىلاردىڭ ونەرىنە ءتانتى بولىپ، ىزگى تىلەكتەرىن ءبىلدىردى.
– بۇگىن ۇلكەن مەرەكە ءوتىپ جاتىر. بۇل مەكتەپ تۋرالى كوپ ءسوز ايتۋعا بولادى. ءبارىمىز بىلەتىندەي، 1990 جىلى بۇۇ 1 قازاندى قارتتار كۇنى دەپ بەلگىلەگەن بولاتىن. ال بىزدە الماتى قالاسىندا بۇل اي قارتتار ايلىعى دەپ اتالادى. بۇل اي ءبىز ءۇشىن ۇلكەن مەرەكە. ءارتۇرلى ءىس-شارالار، سپورتتىق جارىستار مەن كەزدەسۋلەر وتكىزەمىز. مۇنداي شارالاردى وتكىزۋدەگى ماقساتىمىز – جاستاردى مەكتەپ تابالدىرىعىنان باستاپ پاتريوتتىققا تاربيەلەۋ. ۇلكەندى سىيلاۋ، وتاندى ءسۇيۋ، كىشىگە ىزەت كورسەتۋ سياقتى جاقسى قاسيەتتەردى ناسيحاتتايمىز، – دەدى الاتاۋ اۋدانى ارداگەرلەر كەڭەسىنىڭ ءتوراعاسى ساعاتۋللا تاۋبالدى.