قازاقستان رەسپۋبليكاسىنداعى «بالا قۇقىقتارى تۋرالى» زاڭعا «بۋللينگ»، ياعني، بالانى جابىرلەۋ تۇسىنىگى ەنگىزىلەدى.
سەنات دەپۋتاتتارى قولدانىستاعى زاڭناماعا وسىنداي وزگەرىس ەنگىزۋدى ۇسىندى، دەپ حابارلايدى Almaty-akshamy.kz 24.kz-كە سىلتەمە جاساپ.
"بۇل شارا كامەلەتكە تولماعاندار ورتاسىندا زورلىق-زومبىلىقتىڭ، كەمسىتۋدىڭ، قىسىم كورسەتۋدىڭ الدىن الۋعا كومەكتەسەدى. زاڭ ءتارتىبى كيبەربۋللينگ دەرەكتەرىنە دە قاتىستى قولدانىلادى. مەملەكەت بالاعا قاتىگەزدىكپەن قاراۋ جانە فيزيكالىق نە پسيحيكالىق كۇش كورسەتۋدەن قورعايدى"، - دەپ اتاپ ءوتتى كونستيتۋسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ مۇشەسى ءلاززات سۇلەيمەن. زاڭ جوباسى جەكەلەگەن ناقتىلاۋلار ەنگىزۋ ءۇشىن ماجىلىسكە قايتا جىبەرىلدى.
«بۇگىن سەنات دەپۋتاتتارى جۇرتشىلىق الاڭداتۋ تۋدىرىپ وتىرعان، جالپى اتاۋمەن ايتقاندا، كيبەربۋللينگ تۋرالى زاڭ جوباسىن قارادى. دەپۋتاتتار زاڭ جوباسىنداعى كيبەربۋللينگ دەپ تانىلعان اقپاراتتى جويۋ تۋرالى نورماعا ناقتىلاۋ ەنگىزدى. بۇل كونتەنت تەك قانا بالالارعا بايلانىستى بولۋ كەرەك. مۇنداي جاعدايدا اتا-انالار نەمەسە زاڭدى وكىلدەر وكىلەتتى ورگانعا ءوزىنىڭ وتىنىشىمەن بارۋى كەرەك بولادى. سونىمەن قاتار بۇل اقپارات كيبەربۋللينگ پە، باسقا ما، ونى وكىلەتتىك ورگان ءوزى شەشپەيدى. ونى ءتيىستى مامانداردان قۇرالعان ساپارتامالىق توپقا شەشۋ ۇسىنىلىپ وتىر»، - دەيدى ق ر پارلامەنتى سەناتىنىڭ دەپۋتاتى ءلاززات سۇلەيمەن.