قازاقستان رەسپۋبليكاسىنىڭ ەلشىلىگى ازەربايجاننىڭ حالىقارالىق قاتىناستاردى تالداۋ ورتالىعىمەن (حقتو) بىرگە «ادىلەتتى قازاقستاننىڭ ەكونوميكالىق باعدارى» اتتى پرەزيدەنت ق. توقايەۆتىڭ جولداۋىن تالقىلاۋعا ارنالعان دوڭگەلەك ۇستەل وتكىزدى.
ءىس-شاراعا قازاقستاننىڭ ازەربايجانداعى ەلشىسى ءالىم بايەل، حقتو ءتوراعاسى ەلشى فاريد شافييەۆ، ازەربايجان ميللي ءماجىلىسىنىڭ دەپۋتاتى راسيم مۋسابەكوۆ، ديپلوماتتار، ازەربايجاننىڭ ساياساتتانۋ، حالىقارالىق قاتىناستار جانە ەكونوميكا سالاسىنداعى جەتەكشى ساراپشىلارى، سونداي-اق ب ا ق وكىلدەرى قاتىستى. كەزدەسۋدە قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، قازاقستان مەن ازەربايجان پارلامەنتارالىق ىنتىماقتاستىق توبىنىڭ جەتەكشىسى ايدوس سارىم جانە ازەربايجاننىڭ قازاقستانداعى ەلشىسى اگالار اتاموگلانوۆ بەينەكونفەرەنس بايلانىس ارقىلى قوسىلىپ، ءسوز سويلەدى، دەپ حابارلايدى اlmaty-akshamy.kz.
ازەربايجاننىڭ جەتەكشى تالداۋ ورتالىعى سانالاتىن حقتو-دا وتكەن دوڭگەلەك ۇستەل بارىسىندا قاتىسۋشىلار ەكىجاقتى ىنتىماقتاستىقتىڭ جاعدايى مەن پەرسپەكتيۆالارىن، وڭىردەگى احۋالدى، سونداي-اق قازاقستان رەسپۋبليكاسى پرەزيدەنتى جولداۋىنىڭ نەگىزگى اسپەكتىلەرىن تالقىلادى.
ەلشى ءا.بايەل ءوز سوزىندە مەملەكەت باسشىلارىنىڭ سەنىمدى ديالوگىنىڭ ارقاسىندا قازاق-ازەربايجان قاتىناستارىنىڭ جاڭا دەڭگەيگە كوتەرىلگەنىن اتاپ ءوتتى. بۇعان سوڭعى ءتورت ايدا قازاقستاننان ازەربايجانعا ءماجىلىس ءتوراعاسى، سەنات ءتوراعاسىنىڭ ورىنباسارى، پرەمەر-مينيستر، كونستيتۋسيالىق سوت ءتوراعاسى، مادەنيەت، كولىك جانە توتەنشە جاعدايلار مينيسترلەرى دەڭگەيىندەگى دەلەگاسيالاردىڭ كەلگەنى دالەل بولىپ وتىر.
ءا.بايەل جولداۋدىڭ قازاقستان ءۇشىن عانا ەمەس، بۇكىل ءوڭىر ءۇشىن دە ماڭىزدىلىعىنا نازار اۋداردى. اتاپ ايتقاندا، جولداۋدا كولىك-لوگيستيكالىق ىنتىماقتاستىق جانە تحكب-نى (ورتا ءدالىز) دامىتۋ ماسەلەلەرى قوزعالعان.
«قازاقستانعا كۇشتى جانە تۇراقتى ازەربايجان، ال ازەربايجانعا ىقپالدى جانە باقۋاتتى قازاقستان كەرەك»، - دەپ تۇيىندەدى ديپلومات.
حقتو ءتوراعاسى فاريد شافييەۆ قازاقستانداعى ىشكى ساياسي پروسەستەرگە وڭ باعا بەرىپ، ترانسكاسپيي حالىقارالىق كولىك باعىتىن دامىتۋ ماسەلەسىنە كوڭىل ءبولۋ دەڭگەيىنە قۋاناتىندىعىن ءبىلدىردى.
ءماجىلىس دەپۋتاتى ا. سارىم ءوز سوزىندە قورعانىس جانە قاۋىپسىزدىك سالاسىنداعى ىنتىماقتاستىق ماسەلەلەرىن قوزعادى.
«قازاقستان ازەربايجاننىڭ اسكەري-تەحنيكالىق سالاداعى تاجىريبەسىن زەرتتەۋدە. تاعى ءبىر ماڭىزدى ماسەلە – تۇركى ىنتىماقتاستىعىن دامىتۋ. ءبىز دامىتۋىمىز كەرەك جاقسى فورماتتار بار»، - دەپ ايتتى ماجىلىسمەن.
ميللي ءماجىلىس دەپۋتاتى ر. مۇسابەكوۆ قازاقستان مەن ازەربايجاننىڭ كاسپيي تەڭىزىنىڭ قۇقىقتىق مارتەبەسىن ايقىنداۋ پروسەسىنە قوسقان شەشۋشى ۇلەسىن تىلگە تيەك ەتتى. ول تۇركى ەلدەرىنىڭ مادەني-گۋمانيتارلىق جاقىنداسۋىن دا اتاپ ءوتتى.
جالپى، ازەربايجان ساراپشىلارى قازاقستان پرەزيدەنتى جولداۋىنىڭ ماڭىزدىلىعىن جوعارى باعالاپ، وندا ناقتى جانە اۋقىمدى ماقساتتار كورسەتىلگەنىن اتاپ ءوتتى.
«ق.توقايەۆتىڭ جولداۋى وتە پراگماتيكالىق سيپاتقا يە، وندا ۇزاق مەرزىمدى قيالي ماقساتتار جوق»، – دەپ ازەربايجان پرەزيدەنتى جانىنداعى مەملەكەتتىك باسقارۋ اكادەمياسىنىڭ وقىتۋشىسى زاۋر مامەدوۆ مالىمدەدى.
