وسى اپتادا ۇقك شەكارا قىزمەتى الماتى وبلىسى بويىنشا دەپارتامەنتىنىڭ رايىمبەك اۋدانى بويىنشا شەكارا باسقارماسىنا قاراستى «نارىنقول» شەكارا ءبولىمىنىڭ اتىس الاڭىندا مىقتىلاردى انىقتاۋعا ارنالعان قىزمەتتىك شاڭعى بياتلونى ءوتتى. سايىسقا اتالعان دەپارتامەنتتىڭ رايىمبەك جانە قاراساي اۋداندارى بويىنشا شەكارا باسقارمالارىنان ەكى قۇراما كوماندا قاتىستى.
بياتلوننىڭ باس تورەشىسى — دەپارتامەنتتىڭ جاۋىنگەرلىك دايارلىق جانە اسكەرلەر قىزمەتى باسقارماسىنىڭ اعا نۇسقاۋشىسى، پودپولكوۆنيك مۇراگەر مارات ۇلى. اشىلۋ سالتاناتى «نارىنقول» شەكارا بولىمىندە وتكەن سوڭ، كوماندالار بىردەن «قوستوبە» شەكارا بولىمشەسىندەگى شاعىن پوليگونعا اتتاندى. ولار بارعان كەزدە شىڭىلتىر اياز قارسى العانىمەن، ەشكىم دە وعان مويىعان جوق. جەڭىسكە جەتىپ، الدا شەكارا قىزمەتى اياسىندا وتەتىن بياتلونعا جولداما الۋ ءۇشىن كوماندالار كەز كەلگەن قيىندىقتى ەڭسەرۋگە ءتاس-تۇيىن دايىن بولدى.
سايىس بارىسىندا شاڭعىشىلار بەس شاقىرىمدىق قاشىقتىقتى باعىندىرۋمەن قاتار، گراناتا لاقتىرىپ، قوس قارۋدان — كالاشنيكوۆ اۆتوماتى مەن مەرگەندەر ۆينتوۆكاسىنان نىسانا كوزدەۋگە ءتيىس بولدى. تارتىپكە سايكەس، جاتتىعۋ كەزىندە نىساناعا ءدال تيمەگەن قاتىسۋشىلار 70 مەترلىك ايىپ الاڭىن اينالىپ وتەدى. سونداي-اق، ءار كوماندانىڭ قۇرامىندا ءبىر كينولوگ بار. ولار وزدەرىنىڭ قىزمەتتىك يتتەرىمەن بىرگە سايىسقا قاتىسىپ، جوعارى دايىندىق دەڭگەيىن كورسەتتى.
ايتا كەتۋ كەرەك، رايىمبەك اۋدانى بويىنشا شەكارا باسقارماسىنىڭ اتىنان قاتىسقان كوماندانىڭ كاپيتانى، «تەكەس» شەكارا بولىمشەسىنىڭ باستىعى كاپيتان نۇربول تەمىربايەۆ شاڭعى تەبۋدەن سپورت شەبەرلىگىنە كانديدات ەكەن. ونىڭ قار ۇستىندەگى قيمىل-قوزعالىسى دا ناعىز شەبەر ەكەنىن اڭعارتىپ تۇردى. نۇربول سايىس بارىسىندا ءبىرىنشى كەلىپ، وسىعان دەيىنگى رەكوردتى جاڭارتتى.
وسىلايشا، بىرنەشە ساعاتقا سوزىلعان قىزمەتتىك شاڭعى بياتلونىندا گراناتا لاقتىرىپ، نىسانا كوزدەۋدە وزدەرىنىڭ مەرگەندىگىن كورسەتكەن رايىمبەك اۋدانى بويىنشا شەكارا باسقارماسىنىڭ قۇراما كومانداسى ءبىرىنشى ورىندى يەلەندى. بۇعان «قوستوبە» شەكارا بولىمشەسىندە ءبىر اي بويى جۇرگىزىلگەن دايىندىقتىڭ زور كومەگى تيگەنى انىق.
جەڭىمپازداردى ماراپاتتاۋ ءراسىمى سۇمبە اۋىلىنداعى مادەنيەت ۇيىندە ءوتتى. 2023 جىلدىڭ جەلتوقسان ايىندا قۇرىلىسى اياقتالىپ، پايدالانۋعا بەرىلگەن زاماناۋي رۋحانيات ورداسىنىڭ قاسيەتتى ساحناسىندا بايگەدە باعى جانعان رايىمبەك اۋدانىنىڭ كومانداسى دەپارتامەنت باستىعى پولكوۆنيك ا.كايۋپوۆتىڭ گراموتاسىمەن ماراپاتتالىپ، مويىندارىنا مەدال تاعىلدى.
ءراسىمنىڭ سوڭى مادەنيەت ۇيىندەگى جاس ونەرپازداردىڭ شاعىن كونسەرتتىك باعدارلاماسىنا ۇلاستى. ۇلتتىق ناقىشتاعى كيىم كيگەن جاس بيشىلەر مەن انشىلەر جارىسقا قاتىسۋشىلار مەن «سۇمبە» شەكارا بولىمشەسىنىڭ جەكە قۇرامىنا كوتەرىڭكى كوڭىل كۇي سىيلادى.
ەندى بايگەدە توپ جارعان كوماندا اقمولا وبلىسىنىڭ دەرجاۆينسك قالاسىندا وتەتىن الاماندا ۇقك شەكارا قىزمەتى الماتى وبلىسى بويىنشا دەپارتامەنتىنىڭ نامىسىن قورعايتىن بولادى.