پرەزيدەنت مەملەكەت رەتتەيتىن باعالاردى بەلگىلەۋ كەزىندەگى جەمقورلىقتى جويۋدى تاپسىردى
بۇل تۋرالى ق ر پرەزيدەنتى قاسىم-جومارت توقايەۆتىڭ سىبايلاس جەمقورلىققا قارسى ءىس-قيمىل جونىندەگى كەڭەستە سويلەگەن سوزىندە ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بىلتىر ەلىمىزدە باعا كۇرت كوتەرىلدى. ارينە، الەمنىڭ بارلىق مەملەكەتىندە ينفلياسيا دەڭگەيى جوعارى بولدى. دەگەنمەن، ءتيىستى ۋاكىلەتتى ورگاندار باعانى بەلگىلەگەن كەزدە، ونىڭ قانشالىقتى نەگىزدى ەكەنىن مۇقيات قاراۋى كەرەك. مۇنىڭ استارىندا ەكونوميكالىق سەبەپتەن بولەك، بىرەۋدىڭ جىمىسقى ارەكەتى جاتقان جوق پا دەگەن ساۋال تۋىندايدى.
مىسالى، وتاندىق ءونىم وندىرۋشىلەر تەمىرجول سالاسىن جەمقورلىق جايلاعانىن ايتىپ، ۇنەمى شاعىمدانادى. كاسىپكەرلەر ناقتى ءبىر نىسانعا اپاراتىن تەمىرجولدى پايدالانعانى ءۇشىن تولەيتىن اقىنىڭ كولەمىنە بايلانىستى نارازىلىق بىلدىرۋدە. وسىعان وراي، ءبىر ۋاقىتتا بىرنەشە وڭىردەن – قوستاناي، شىعىس قازاقستان، تۇركىستان، اقمولا جانە پاۆلودار وبلىستارىنان ارىز تۇسكەن. مونوپوليست كومپانيالار باعانى ءوز بەتىمەن ەسەلەپ وسىرگەن. بۇل حالىق تۇتىناتىن تاۋارلاردىڭ باعاسىنا بىردەن اسەر ەتەدى. مەن ءبىر جىل بۇرىن باسەكەلەستىكتى قورعاۋ اگەنتتىگىنە باس پروكۋراتۋرامەن بىرلەسىپ، وسى ماسەلەمەن اينالىسۋدى تاپسىردىم.
ءبىراق، «باياعى جارتاس – ءبىر جارتاس» كۇيىندە قالدى. كەيبىر ادامداردىڭ تۇتىنۋشى مەن كاسىپكەردىڭ ەسەبىنەن عانا پايدا تاۋىپ وتىرۋى دۇرىس ەمەس. پرەزيدەنت اكىمشىلىگىنە بۇل ماسەلەنى باقىلاۋعا الۋدى تاپسىرامىن. مونوپوليستەردىڭ زاڭسىز تاپقان تابىسىن قايتارىپ، اتقارىلعان جۇمىستار جونىندە ماعان بايانداڭىزدار. ءوز پايداسى ءۇشىن وزگەلەرمەن سىبايلاسقان شەنەۋنىكتەر بار ما، سونى دا انىقتاۋ كەرەك. جالپى، باعانى قولدان وسىرۋگە مۇلدەم جول بەرمەۋ قاجەت»، - دەدى مەملەكەت باسشىسى.