ق ر اكىمشىلىك قۇقىق بۇزۋشىلىق تۋرالى كودەكسىندە (ق ر اقبتك) بەس ءتۇرلى جول قوزعالىسى ەرەجەسىن بۇزعان جاعدايدا جۇرگىزۋشىلەرگە قايتادان تەوريالىق ەمتيحان تاپسىرۋ مىندەتتەلگەن، دەپ حابارلايدى aqshamnews.kz
بۇل بۇزۋشىلىقتار بىردەن جۇرگىزۋشى كۋالىگىنەن ايىرۋعا اكەلمەيدى، الايدا ەكى اي ىشىندە تەوريالىق ەمتيحاندى قايتا تاپسىرۋ قاجەت. ەگەر جۇرگىزۋشى بەلگىلەنگەن مەرزىمدە ەمتيحان تاپسىرماسا، سوت شەشىمىمەن كۋالىك كۇشىن جويادى. قۇجاتتى قايتارۋ ءۇشىن تەوريالىق جانە پراكتيكالىق ەمتيحاندى قايتا تاپسىرۋعا تۋرا كەلەدى.
بۇزۋشىلىقتار ءتىزىمى
594-باپ، 4-بولىك
جىل ىشىندە قايتالانعان جاعدايدا: جول قيىلىسىنا نەمەسە جولدىڭ قيىلىسقان بولىگىنە كەپتەلىس كەزىندە كىرىپ، كولدەنەڭ باعىتتاعى كولىكتەردىڭ قوزعالىسىنا كەدەرگى كەلتىرۋ.
جازا: 7 ايلىق ەسەپتىك كورسەتكىش (30 275 تەڭگە).
596-باپ، 4-بولىك
جىل ىشىندە قايتالانعان جاعدايدا: جاياۋ جۇرگىنشىلەر جولىمەن، تروتۋارمەن نەمەسە جول جيەگىمەن ءجۇرۋ؛ كولىكتى جولدا دۇرىس ورنالاستىرماۋ؛ قارسى قوزعالىس نەمەسە مانيەۆر ەرەجەسىن بۇزۋ؛ ۇيىمداستىرىلعان كولىك نەمەسە جاياۋ كولوننانى كەسىپ ءوتۋ نەمەسە ونىڭ قۇرامىنا زاڭسىز قوسىلۋ.
جازا: 13 ايلىق ەسەپتىك كورسەتكىش.
598-باپ، 2-بولىك
جىل ىشىندە قايتالانعان جاعدايدا: ارنايى جارىق جانە دىبىس سيگنالدارىن قوسقان ارنايى كولىكتەرگە جول بەرمەۋ.
جازا: 40 ايلىق ەسەپتىك كورسەتكىش نەمەسە 20 ساعات قوعامدىق جۇمىس.
599-باپ، 2-بولىك
جىل ىشىندە قايتالانعان جاعدايدا: باعدارشامنىڭ تىيىم سالاتىن سيگنالىنا نەمەسە رەتتەۋشىنىڭ تىيىم سالاتىن قيمىلىنا قاراماي ءوتۋ.
جازا: 15 ايلىق ەسەپتىك كورسەتكىش.
600-باپ، 2-بولىك
جىل ىشىندە قايتالانعان جاعدايدا: جاياۋ جۇرگىنشىلەرگە نەمەسە باسقا جول قوزعالىسىنا قاتىسۋشىلارعا (ارنايى كولىكتەردەن باسقا) جول بەرمەۋ.
جازا: 15 ايلىق ەسەپتىك كورسەتكىش.