ناۋرىزدا باعانى تۇراقتاندىرۋ باعدارلاماسى بويىنشا الماتىدا العاشقى ازىق-تۇلىك ونىمدەرىن جەتكىزۋ باستالادى
تۇرعىننىڭ سۇراعى:
- باعانىڭ ءوسۋى ماسەلەسىنە تۇسىنىكتەمە بەرۋىڭىزدى سۇرايمىن. بۇل باعىتتا نە ىستەلۋدە؟ ولاردى بولدىرماۋ ءۇشىن قانداي شارالار قابىلدانۋدا؟
الماتى اكىمى ەربولات دوسايەۆتىڭ جاۋابى:
- باعانىڭ ءوسۋى - قالا اكىمدىگى ءۇشىن ماڭىزدى ماسەلە جانە باستى مىندەت. ءبىز وتكەن جىلدىڭ كۇزىندە نەگىزگى ونىمدەرگە توسقاۋىل قويۋ جانە تۇراقتاندىرۋ جۇمىستارىن باستادىق. ماۋسىمنان تىس ۋاقىتتا ارنايى شارتتار جاسالدى. الماتى باعانى تۇراقتاندىرۋعا ەڭ كوپ قاراجات ءبولدى - 15 ملرد تەڭگە. كوكتەمدە ناۋرىز ايىنىڭ ورتاسىنان باستاپ ءبىز العاشقى ونىمدەردى الامىز. ءبىز باعاسى شۇعىل كوتەرىلەتىن پوزيسيالار بويىنشا باعالاردى تۇراقتاندىرامىز دەپ ۇمىتتەنەمىز.
سونىمەن قاتار، الماتىدا مونوپوليالىق "التىن وردادان" باسقا كوتەرمە جەتكىزۋشىلەر پايدا بولدى (بۇگىندە قالاعا كوكونىستەردىڭ، جەمىستەر مەن ەتتىڭ 75%-ى "التىن وردا" ارقىلى جەتكىزىلەدى). "ماگنۋم" جەلىسى جەتكىزۋشىلەرمەن تىكەلەي جۇمىس ىستەي باستادى، سونىڭ ارقاسىندا باعالار تومەندەدى. قالعان ساۋدا جەلىلەرى باسقا جولداردى تابادى دەپ ۇمىتتەنەمىن.
ءبىز اقسۋ قانت زاۋىتىمەن 2،6 ملرد تەڭگەگە شارت جاسادىق. جازدا قانت باعاسى كوتەرىلمەيدى دەپ ۇمىتتەنەمىن. ءوزىڭىز بىلەسىز، ناننىڭ باعاسى كوتەرىلگەن جوق ويتكەنى ءبىز ونى سۋبسيديالايمىز - جەرگىلىكتى بيۋدجەتتەن قوسىمشا اقشا بولدىك.
وكىنىشكە وراي، ازىق-تۇلىك ەمەس تاۋارلاردىڭ باعاسى دا وسۋدە - بۇل فاكت. جالپى گەوساياسي جاعدايعا بايلانىستى كولىك لوگيستيكاسى بۇزىلدى، ءبىراق بىرتە-بىرتە ءبىزدىڭ كومپانيالار ءتۇرلى جولداردى ىزدەيدى، جاڭا جەتكىزۋشىلەر پايدا بولادى.
قالا باعا ماسەلەسىن ەرەكشە باقىلاۋدا ۇستايدى. تىكەلەي ناۋرىزباي اۋدانىنا كەلەتىن بولساق، كوتەرمە ساۋدا دەڭگەيى ناشار دامىعان، دۇكەندەر از، باسەكەلەستىك جوق. بۇل ماسەلەمەن اۋدان اكىمدىگىمەن دە جۇمىس ىستەيمىز، اۋدان تۇرعىندارىن ساپالى ساۋدامەن قامتاماسىز ەتۋ ءۇشىن كاسىپكەرلەردى تارتامىز.