ءباا قازاقستاندا جەل ەلەكتر ستانسياسىن سالادى

ەكى ەل اراسىنداعى كەلىسىمدى راتيفيكاسيالاۋ جوباسى ءماجىلىستىڭ قاراۋىنا ۇسىنىلماق، دەپ حابارلايدى Almaty-akshamy.kz Elorda.info-عا سىلتەمە جاساپ.

2023 جىلى 2 جەلتوقساندا قازاقستان مەن بىرىككەن اراب امىرلىكتەرى تاراپتارى جاساعان قازاقستاندا جالپى قۋاتى 1 گۆت بولاتىن جەل ەلەكتر ستانسياسىن سالۋ تۋرالى كەلىسىم قاعازعا ءتۇستى. قۇجات جوباسى ءماجىلىستىڭ قاراۋىنان كەيىن ەل پرەزيدەنتىنىڭ قول قويۋىنا ۇسىنىلادى. 

قۇجاتتا جوبانى جۇزەگە اسىرۋعا قاتىستى بۇرىن بەلگىلى بولماعان ءبىرقاتار مالىمەتتەر كەلتىرىلگەن.

ماسەلەن، جوبا شەڭبەرىندە 200-گە دەيىن تۇراقتى جۇمىس ورنى جانە 1600-گە دەيىن ۋاقىتشا جۇمىس ورنى قۇرىلاتىنى بەلگىلى بولدى. 

جوبانى جۇزەگە اسىرۋعا شامامەن 1،5 ميلليارد دوللار ينۆەستيسيا تارتىلاتىن بولسا، قوسىمشا 3500 ملرد كۆتساع جاسىل ەنەرگيا وندىرىلەدى. جاڭا جەل پاركى جامبىل وبلىسىندا سالىنادى. 

«جوبانى ىسكە اسىرۋ جەك سەكتورىن دامىتۋدى جالعاستىرۋعا، 2030 جىلعا قاراي – 15 پايىزعا قول جەتكىزۋدى كوزدەيتىن جەك دامۋىنىڭ قابىلدانعان ناقتى نىسانالى ينديكاتورلارىنا قول جەتكىزۋگە، سونداي-اق جىل سايىنعى كومىرقىشقىل گازىنىڭ (س02) شىعارىندىلارىن قىسقارتۋعا مۇمكىندىك بەرەدى»، – دەلىنگەن ۇكىمەت باسشىسى ءاليحان سمايىلوۆتىڭ تۇسىندىرمە جازباسىندا.