ءازىربايجاندىق تاريحشى، ساياساتتانۋشى تەيمۋر وكتايوگلى اتايەۆ «ابايدىڭ ۇلىلىعى» اتتى ەڭبەگىن جارىققا شىعاردى.
اۆتورعا تۋىندىنى جازۋ يدەياسى قازاقستانعا ساپارى بارىسىندا كەلگەن. ول قازاق ەلىمەن تانىسۋ بارىسىندا حاكىمنىڭ ەسىمىن ءجيى ەستىپ جانە ەستىپ قانا قويماي، ونىڭ شىعارمالارىمەن جاقىنىراق تانىسا باستاعان، دەپ حابارلايدى Almaty-akshamy.kz
اۋەلگىدە ماقالا جارىققا شىقان، كەيىن ول تولىق جيناققا اينالعان. جازۋشىنىڭ ايتۋىنشا، ابايدىڭ ارتىنا قالدىرعان مۇراسى ماڭگى. ونى كەشەگى كۇنمەن عانا ەمەس، بۇگىنمەن، ەرتەڭمەن تىعىز بايلانىستىرۋعا بولادى. ۇلى اقىننىڭ شىعارمالارى قازاققا عانا ەمەس ادامزاتقا ورتاق قۇندى مۇرا دەيدى ول. ايتا كەتەيىك، كىتاپتىڭ تانىستىرىلىمى ءازىربايجان رەسپۋبليكاسى ەلشىلىگىنىڭ قولداۋىمەن ەلوردادا ءوتتى.
"اباي – دارا تۇلعا. ونىڭ شىعارمالارى بۇگىنگى كۇندى ايتىپ وتىرعانداي. ياعني، عاسىر بۇرىن ونىڭ كوتەرگەن تاقىرىپتارى بۇگىنگى كۇنى وزەكتى. ابايدى تەك قازاقتىڭ عانا ەمەس، بارشا تۇركى الەمىنىڭ اعارتۋشىسى، عۇلاماسى دەپ جاتادى. شىنىنا كەلسەك، ول راس. ول ۇنەمى اۋقىمدى تاقىرىپتاردى كوتەرىپ، ايتىپ كەتكەن تۇلعا. مەن ونى كەيدە ءبىزدىڭ اعارتۋشىلارىمىز بەن مىرزا فاتالي احۋندوۆ، عابدوللا توقايمەن سالىستىرامىن. بۇل عۇلامالار ءعىلىم-بىلىمدى جاساپ تاستاپ كەتكەن ادامدار دەسەم، قاتە ايتقانىم بولماس"، - دەيدى كىتاپ اۆتورى تەيمۋر وكتايوگلى اتايەۆ.