اباي ۋنيۆەرسيتەتى ازياداعى ۇزدىك ۋنيۆەرسيتەتىنىڭ 20%-نا كىردى
2022 جىلدىڭ 8 قاراشاسىندا QS World University Rankings: Asia 2023 حالىقارالىق رەيتينگىنىڭ ناتيجەلەرى جاريالاندى، وندا اباي ۋنيۆەرسيتەتى 760 قاتىسۋشىنىڭ اراسىندا 147ء-شى ورىندى يەلەنىپ، ازياداعى ۇزدىك ۋنيۆەرسيتەتىنىڭ 20%-نا كىردى. اباي ۋنيۆەرسيتەتى لايىقتى ناتيجە كورسەتىپ، ازيانىڭ توپ-100 ۋنيۆەرسيتەت قۇرامىنا جاقىندادى، - دەپ حابارلايدى almaty-akshamy.kz
ازيا ۋنيۆەرسيتتەرىنىڭ وركەندەۋى جانە جاھاندىق ءبىلىم بەرۋ كەڭىستىگىنىڭ شەتكى بولىگىنەن ورتالىعىنا اۋىسۋى - قازىرگى زامانننىڭ ماڭىزدى وقيعالارىنىڭ ءبىرى. ەگەر 2022 جىلى قازاقستان QS EECA University Rankings - ەۋروپا مەن ورتالىق ازيانىڭ دامۋشى ەلدەرى شەڭبەرىندە باعالانسا، بيىلعى جىلى العاش رەت ازيانىڭ بارلىق ەلدەرى جاپونيا، جۇڭگو، وڭتۇستىك كورەيا، وڭتۇستىك-شىعىس ازيا ەلدەرىن قوسا العاندا، ءبىر ءىرى مەگا-ايماققا بىرىكتىرىلىپ، الەمدىك ارەناداعى جوعارى ءبىلىم بەرۋ جۇيەسى بويىنشا باسەكەگە قابىلەتتىلىگى بارىن كورسەتتى. بۇل رەيتينگكە قازاقستاننان 32 جوعارى وقۋ ورنى قاتىستى. پەكين ۋنيۆەرسيتەتى، سينگاپۋر ۇلتتىق ۋنيۆەرسيتەتى، سينحۋا ۋنيۆەرسيتەتى (جۇڭگو) وسى ءۇش ۋنيۆەرسيتەت ازيا رەيتينگىندە كوش باستاپ، العاشقى ءۇش ورىندى يەلەندى.
ورتالىق ازيا ايماعىندا قازاقستاندىق جوعارى وقۋ ورىندارى سەنىمدى كوش باستاپ كەلەدى: ءال-فارابي اتىنداعى قازۇۋ، ل.ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى جانە ساتبايەۆ اتىنداعى ۋنيۆەرسيتەت، ولاردان كەيىن اباي اتىنداعى قازۇپۋ ءتورتىنشى ورىندا. ەڭ جاقىن كورشى ەلدەردەن ورتالىق ازياداعى امەريكا ۋنيۆەرسيتەتى (قىرعىزستان)، تاشكەنت يرريگاسيا جانە اۋىل شارۋاشىلىعىن مەحانيكالاندىرۋ ينجەنەرلەرى ينستيتۋتى (وزبەكستان) جانە تاجىكستان ۇلتتىق ۋنيۆەرسيتەتى (تاجىكستان) ۇسىنىلعان. ورتالىق ازيا وڭىرلىك رەيتينگىن قاراقالپاق مەملەكەتتىك ۋنيۆەرسيتەتى، قازاق ۇلتتىق قىزدار پەداگوگيكالىق ۋنيۆەرسيتەتى جانە نيزامي اتىنداعى تاشكەنت مەملەكەتتىك پەداگوگيكالىق ۋنيۆەرسيتەتى جاۋىپ وتىر.
QS رەيتينگىنىڭ ادىستەمەسى «اكادەميالىق بەدەل»، «جۇمىس بەرۋشى اراسىنداعى بەدەل»، «پوق مەن ستۋدەنتتەردىڭ سانىنىڭ اراقاتىناسى»، «PhD دارەجەسى بار قىزمەتكەرلەر»، «ماقالاعا دايەكسوزدەر»، «جاريالانىمدار سانى»، «حالىقارالىق زەرتتەۋ بايلانىستارى»، «شەتەلدىك پوق مەن ستۋدەنتتەردىڭ ۇلەسى»، سونداي-اق «اكادەميالىق ۇتقىرلىق (كىرىس جانە شىعىس)» سياقتى نەگىزگى كورسەتكىشتەردى تالداۋعا نەگىزدەلگەن. ولاردىڭ ىشىندە ءۇش ينديكاتور بويىنشا ۋنيۆەرسيتەت رەيتينگتە وتە جوعارى ورىندارعا يە بولدى.
«شەتەلدىك پوق ۇلەسى» ينديكاتورى بويىنشا ۇزدىك ناتيجە كورسەتىپ، رەيتينگتىڭ 61 ورنىنا يە بولدى، بۇل كوبىنەسە شەتەلدىك عالىمدارمەن، اسىرەسە سوربوننا-قازاقستان ينستيتۋتىنىڭ قىزمەتى اياسىندا دامىعان ىنتىماقتاستىققا بايلانىستى.
«وقىتۋشىلار قۇرامىنىڭ ءبىلىم الۋشىلار سانىنا قاتىناسى» كورسەتكىشى بويىنشا 79 ورىندا. بۇل كورسەتكىش ۋنيۆەرسيتەتتىڭ ساپاعا دەگەن ۇمتىلىسىنىڭ جاناما دالەلى بولىپ تابىلادى جانە شتاتتىق وقىتۋشىلاردىڭ ءجۇز ستۋدەنتكە قاتىناسىن باعالايدى. وقىتۋدى، تالىمگەرلىكتى، وقۋ باعدارلامالارىن ازىرلەۋدى قامتيتىن ءبىلىم بەرۋ پروسەسىندە جۇمىس ىستەيتىن اكادەميالىق رەسۋرس نەعۇرلىم كوپ بولسا، وقۋ ساپاسى دا سوعۇرلىم جوعارى بولادى.
جاھاندىق اكادەميالىق كەڭىستىكتە ۋنيۆەرسيتەتتىڭ تۇراقتىلىعى مەن تانىلۋىن كورسەتەتىن ماڭىزدى كورسەتكىش «اكادەميالىق بەدەل» كورسەتكىشى بويىنشا QS ساراپشىلار قاۋىمداستىعى تاراپىنان وڭ باعالانىپ، 84-ورىنعا يە بولعانىن ايتا كەتكەن ءجون. ونى باعالاۋ Scopus دەرەكتەر بازاسىندا يندەكستەلەتىن حالىقارالىق جۋرنالداردا جاريالانىمدارى بار بەدەلدى عالىمدار اراسىندا جۇرگىزىلگەن ساۋالناما ءادىسىن قولدانۋعا نەگىزدەلگەن. بيىلعى جىلى زەرتتەۋ كومپونەنتى بويىنشا الەمنىڭ جەتەكشى ۋنيۆەرسيتەتتەرىن انىقتاۋ ءۇشىن الەمنىڭ تۇكپىر-تۇكپىرىنەن 150 مىڭنان استام عالىمنىڭ پىكىرى ەسكەرىلدى.
ەكى سانات بويىنشا «اكادەميالىق الماسۋ (شىعىس ۇتقىرلىق)» جانە «جۇمىس بەرۋشىلەر اراسىنداعى بەدەل» سايكەسىنشە ءبىز 133 جانە 138 پوزيسيالاردى يەلەندىك. اكادەميالىق ۇتقىرلىقتى دامىتۋ ۋنيۆەرسيتەتتى ينتەرناسيونالداندىرۋ كورسەتكىشتەرىنىڭ ءبىرى جانە ءبىلىم الۋشىلارعا حالىقارالىق ءبىلىم بەرۋ كەڭىستىگىنە كىرىگۋىنە مۇمكىندىك بەرەدى. الداعى ۋاقىتتا ءبىز شىعىس اكادەميالىق ۇتقىرلىقتى جەتكىلىكتى قارجىلاندىرۋ ماسەلەلەرىنە نازار اۋدارىپ، ونىڭ كورسەتكىشتەرىن ارتتىرۋعا ۇمتىلۋىمىز كەرەك. Abai University جۇمىس بەرۋشىلەر اراسىندا بەدەلى ارتىپ كەلە جاتقانىن بىلەمىز، بۇل ەڭ الدىمەن پەداگوگيكالىق ماماندىقتاردى بىتىرۋشىلەرگە دەگەن سۇرانىستان كورىنەدى، بۇل ءوز كەزەگىندە بەرىلەتىن ءبىلىمنىڭ ساپاسىن ايعاقتايدى. بۇگىنگى تاڭدا ۋنيۆەرسيتەت تۇلەكتەرى ەلىمىزدىڭ ەڭ شالعاي بۇرىشتارىندا دا، سونداي-اق ءىرى قالالاردا جانە كورشىلەس ورتالىق ازيا ەلدەرىندە دە قىزمەت ەتۋدە.
ۋنيۆەرسيتەتتىڭ عىلىمي-زەرتتەۋ قىزمەتى سوڭعى جىلدارى تۇراقتى ءوسۋ ديناميكاسىن كورسەتىپ كەلە جاتقانىنا ءبارىمىز كۋامىز. يمپاكت-فاكتورى مەن پايىزدىق كورسەتكىشى جوعارى حالىقارالىق جۋرنالدارداعى جاريالانىمدار، سونداي-اق ولاردىڭ دايەكسوزدەرى ارتىپ كەلەدى. عىلىمي ونىمدىلىك، ۋنيۆەرسيتەت ونىمدىلىگى ايتارلىقتاي ءوستى، عىلىمي بايلانىستار بەلسەندى تۇردە دامىپ كەلەدى. جيىنتىق عىلىمي كورسەتكىشتەر بويىنشا الىنعان ورىن 301+ سايكەس كەلەدى. بۇل پوزيسيا دامۋدىڭ بولاشاق ۆەكتورىن كورسەتەدى - حالىقارالىق عىلىمي بايلانىستار ءبىزدىڭ ءوسۋ نۇكتەمىزگە اينالادى.
اباي ۋنيۆەرسيتەتى العاش رەت QS Asia University Rankings 2023 رەيتينگىنە قاتىسىپ، الەمدىك جوعارى ءبىلىم بەرۋ جۇيەسىندە ءوزىنىڭ ورنىقتى دەڭگەيىن ايقىندادى.
وسىنى نەگىزگە الا وتىرىپ، ايماقتىق جانە ورتالىق ازيا دەڭگەيىندە ۋنيۆەرسيتەت جاڭا فورماسياداعى وقىتۋشىلاردى دايارلاي وتىرىپ، پەداگوگيكالىق ءبىلىم بەرۋدىڭ كوشباسشىسى بولۋ جونىندەگى ستراتەگيالىق كوزقاراسىن جۇزەگە اسىردى. قازاقستان دەڭگەيىندە ۋنيۆەرسيتەت ۇستازدىق ءبىلىمنىڭ داۋسىز فلاگمانى بولىپ تابىلادى. رەيتينگ ناتيجەلەرىن تالداۋ QS Asia ۋنيۆەرسيتەتتەرىنىڭ كۇشتى جانە ءالسىز جاقتارىنا نەگىزدەلىپ، ۋنيۆەرسيتەت حالىقارالىق رەيتينگتە كورسەتكىشتەردى ودان ءارى جەتىلدىرۋ جانە ىلگەرىلەتۋ ءۇشىن جۇيەلى جانە جوسپارلى تۇردە جۇمىس ىستەۋ كەرەكتىگىن ايقىندادى.