«ازيا داۋىسى» جانە «جاس قانات» ءان بايقاۋلارىن وتكىزۋ ءۇشىن «ازيا داۋىسى» حالىقارالىق فەستيۆالى» قوعامدىق قورى مادەنيەت جانە سپورت مينيسترلىگى، الماتى قالاسى اكىمدىگىمەن كەلىسسوزدەر جۇرگىزۋدە.
بۇل تۋرالى قوعامدىق قوردىڭ ۆيسە-پرەزيدەنتى تەمىرلان تولەگەنوۆ ايتتى، دەپ حابارلايدى Almaty-akshamy.kz.
سپيكەر بيىل «ازيا داۋىسى حالىقارالىق فەستيۆالى» قوعامدىق قورى قۇرىلعانىن ايتتى.
«وكىنىشكە وراي، پاندەميا كەزىندە ازيا داۋىسىنىڭ نەگىزىن قالاۋشىلار مۇرات ەرعالييەۆ پەن الەكساندر پوناموريەۆ قايتىس بولدى. ءبىراق، ءۇشىنشى قۇرىلتايشى يرينا كوۆىرياكو ءبىزدىڭ كومەگىمىزبەن بارلىق قۇقىقتاردى قالپىنا كەلتىردى. ياعني، بيىل «ازيا داۋىسى»، «جاس قانات» ساۋدا اتاۋى مەن «ازيا داۋىسى» لوگوتيپىنە قاتىستى بارلىق قۇقىقتار قالپىنا كەلتىرىلدى.
سونداي-اق، بيىل «ازيا داۋىسى» حالىقارالىق فەستيۆالى» قوعامدىق قورىن قۇردىق. الماتىدا «ازيا داۋىسى» مەن «جاس قانات» ءان بايقاۋلارىن جانداندىرۋ ءۇشىن ءقازىر مادەنيەت جانە سپورت مينيسترلىگى، الماتى قالاسى اكىمدىگىمەن كەلىسسوزدەر جۇرگىزۋ ۇستىندەمىز. كەلەسى جىلى اتاقتى ءان بايقاۋلارى الماتىدا قايتا جانداناتىن بولادى دەپ ويلايمىز»،- دەدى تەمىرلان تولەگەنوۆ.
ەسكە سالايىق، الماتى اكىمى ەربولات دوسايەۆ مادەنيەت جانە سپورت مينيسترلىگىمەن بىرلەسە وتىرىپ، «ازيا داۋىسى» جانە باسقا دا مۋزىكالىق فەستيۆالدەردى جاڭعىرتۋ جوسپاردا بار ەكەنىن ايتقان بولاتىن.