ازەربايجاندىق تانىمال ساياحاتشى-بلوگەرلەر ورحان اسلانوۆ، سەيمۋر الييەۆ جانە اياز كارا الماتى مەن «شىمبۇلاق» تاۋ-شاڭعى كۋرورتىنا باردى. شەتەلدىك ينفليۋەنسەرلەردىڭ مەگاپوليستىڭ تاۋ بوكتەرىندەگى دەمالىس ورىندارىنا قىزىعۋشىلىق تانىتۋى قالانىڭ قىسقى جانە بەلسەندى تۋريزم باعىتى رەتىندەگى تارتىمدىلىعى ارتىپ كەلە جاتقانىن اڭعارتادى. بۇل تۋرالى الماتى قالاسىنىڭ تۋريزم باسقارماسىنىڭ وكىلدەرى حابارلادى.
ساپار بارىسىندا قوناقتار شىمبۇلاقتىڭ ينفراقۇرىلىمىمەن تانىسىپ، شاڭعىشىلار مەن سنوۋبوردشىلارعا ارنالعان ءتۇرلى دەڭگەيدەگى تراسسالاردى، سونداي-اق تاۋ كورىنىستەرى مەن قالا پانوراماسىنىڭ ەرەكشە ۇيلەسىمىن جوعارى باعالادى.
الماتىعا بۇعان دەيىن دە بىرنەشە رەت كەلگەن ورحان اسلانوۆ بۇل جولعى ساپارىنىڭ دا اسەرگە تولى بولعانىن ايتتى. اسىرەسە، شىمبۇلاقتاعى تۇنگى سىرعاناۋ ەرەكشە اسەر سىيلاعان.
«تەڭىز دەڭگەيىنەن شامامەن 3200 مەتر بيىكتىكتەن تۇنگى قالا اياسىندا تومەن سىرعاناۋدى سوزبەن جەتكىزۋ قيىن. مۇنى مىندەتتى تۇردە سەزىنىپ كورۋ كەرەك»، – دەدى بلوگەر.
سەيمۋر الييەۆ ءوز كەزەگىندە ءازىربايجان مەن قازاقستان اراسىنداعى ءتۋريزمنىڭ تاجىريبە الماسۋدىڭ الەۋەتى جوعارى ەكەنىن اتاپ ءوتتى.
«الماتى مادەنيەتىمەن، قوناقجايلىعىمەن جانە تاۋ-شاڭعى كۋرورتتارىنىڭ قالاعا جاقىن ورنالاسۋىمەن تارتىمدى. بۇل دەمالىستى جايلى ءارى مازمۇندى ەتەدى»، – دەدى ول.
اياز كارا قازاقستانعا العاش رەت كەلگەنىن ايتتى. وعان اسىرەسە شىمبۇلاقتاعى تۇنگى سىرعاناۋ ەرەكشە اسەر قالدىرعان.
«مۇندا شىنايى قوناقجايلىق پەن دوستىق كوڭىل ايقىن سەزىلەدى»، – دەدى بلوگەر.
«بلوگەرلەردىڭ الەۋمەتتىك جەلىلەردەگى جاريالانىمدارى الماتىنىڭ حالىقارالىق تۋريستىك كەڭىستىكتەگى ءيميدجىن نىعايتىپ، قىسقى، تاۋ جانە بەلسەندى دەمالىس باعىتى رەتىندە ودان ءارى تانىلۋىنا ىقپال ەتەدى»، - دەدى قالالىق تۋريزم باسقارماسىنىڭ وكىلدەرى.