ىشكى ىستەر مينيسترلىگى ازاماتتارعا قارسى كۇش قولدانۋدىڭ ءاربىر فاكتىسىن مۇقيات تەكسەرەدى. بۇل تۋرالى ۆەدومستۆونىڭ رەسمي وكىلى ءنۇردىلدا وراز مالىمدەدى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«ءىىم ازاماتتارعا قاتىستى كۇش قولدانۋ فاكتىلەرىنە باسا دەن قويادى. ءاربىر فاكت پوليسيا عيماراتتارىندا جانە قوعامدىق ورىنداردا ورناتىلعان بەينەكامەرالاردى تالداۋ ارقىلى مۇقيات زەرتتەلەدى»، - دەدى ول مينيسترلىكتىڭ اقپارات الاڭىندا وتكەن بريفينگىدە.
«قاڭتار ايىندا بولعان جاپپاي تارتىپسىزدىكتەر كەزىندە پوليسيا كۇشتەرى مەن اسكەري قىزمەتشىلەر ەلدە قۇقىقتىق ءتارتىپتى ورناتۋ بويىنشا اۋقىمدى وپەراسيالار جۇرگىزدى. تەرگەۋ يزولياتورىنىڭ ىشكى ءتارتىپ قاعيدالارىنا سايكەس، ۋاقىتشا ۇستاۋ يزولياتورىنا تۇسكەن بارلىق ادامدار COVID-19 ۆيرۋسىنا پتر-تەستەرىنىڭ تەرىس ناتيجەسىمەن قابىلدانادى جانە مىندەتتى تۇردە مەديسينالىق تەكسەرۋدەن وتەدى. دەنە جاراقاتتارى نەمەسە اۋرۋلارى انىقتالعان كەزدە، ولارعا دەرەۋ مەديسينالىق كومەك كورسەتىلۋدە. ءاربىر وسىنداي فاكت تۋرالى پروكۋراتۋرا ورگاندارىنا حابارلانادى. مەكەمەدە بىلىكتى مەديسينالىق كومەك كورسەتۋ بولماعان جاعدايدا، ولار ازاماتتىق دەنساۋلىق ساقتاۋ ۇيىمدارىنا جەتكىزىلىپ، كۇزەتىلەتىن پالاتالاردا ەمدەلەدى. بۇگىندە وسىنداي تارتىپپەن 23 ادام ەم الۋدا»، - دەدى ءنۇردىلدا وراز.